Wi dɔn si se bɔku pipul dɛn we kin gɛt dɛn yon rilijɔn, kin ɛnjɔy we wi kin tɔk bɔt di Baybul wit dɛn. Wi rili rɛspɛkt di rayt we ɔlman gɛt fɔ mek dɛn biliv ɛnitin, ivin tin dɛn we difrɛn frɔm wetin wi biliv; ɛn wi nɔ de fos pipul dɛn fɔ yɛri wi mɛsej.

 We wi kin tɔk bɔt rilijɔn, wi kin tray fɔ fala di advays we di Baybul gi fɔ se wi “nɔ fɔ fos pipul fɔ biliv pan Krays” ɛn wi fɔ “lisin to wetin dɛn de tɔk,” we min se wi fɔ rɛspɛkt dɛn. (Pita In Fɔs Lɛta 3:16) Wi no se sɔm dɛn nɔ go alaw wi fɔ tɔk to dɛn bɔt di mɛsej we wi gɛt. (Matyu 10:14) Bɔt, wi nɔ go no if pipul dɛn go lisin to wi mɛsej ɔ dɛn nɔ go lisin, pas te wi go mit dɛn. Wi no bak se di tin dɛn we kin apin to pipul dɛn kin chenj.

 Fɔ ɛgzampul, pɔsin go bizi wan de we wi go kam fɔ prich to am bɔt go gladi fɔ mek wi tɔk wit dɛn ɔda tɛm. Ɛn pipul dɛn go gɛt nyu prɔblɛm we go mit dɛn, ɛn dat kin mek dɛn want fɔ yɛri di Baybul in mɛsej. So wi kin tray fɔ tɔk to pipul dɛn pas wan tɛm.