Ebi ebi ren we nɔ blant kam, bin kam na Sɛntral Yurop insay Jun 2013. Insay Ɔngari, i lɛf smɔl fɔ mek di wan ol Danobe Riva ful-ɔp di kayn we we i nɔ wande fulɔp yet.

Di imajɛnsi bin mek di Hungarian Ministry of Human Resources bin aks di brɔda dɛn we de na Jiova Witnɛs dɛn branch ɔfis na Ɔngari if dɛn go ebul fɔ ɛp fɔ mek di bɔku bɔku wata nɔ kɔz damej. Di branch bin sɛn wɔd na di kɔngrigeshɔn dɛn we de bay di Danobe Riva fɔ ɛp pan di wok we di big man dɛn de ɔganayz fɔ du.

Di kɔngrigeshɔn dɛn bin rili ɛp. As dɛn bin de du di wok, i pas lɛk 900 Jiova Witnɛs dɛn we kɔmɔt frɔm 72 kɔngrigeshɔn dɛn we bin kam fɔ ɛp fɔ ad pan di tin dɛn we dɛn bin de yuz fɔ blɔk di wata. Dɛn bin tɛl dɛn ɔl fɔ fiks baj usay dɛn rayt “Jiova Witnɛs,” wit dɛn nem ɛn di siti usay dɛn kɔmɔt.

Insay wan siti, sɔmbɔdi we de wok na di Hungarian Red Cross we de na di eria bin sɛn mɛsej to wan kɔngrigeshɔn fɔ se: “A rili want fɔ tɛl una tɛnki ɛn a rɛspɛkt una fɔ di kayn we aw una gɛt wanwɔd ɛn una rɛdi fɔ ɛp. Una kɔmɔt fa say dɛn fɔ kam ɛp! A kin fil prawd fɔ tɔk bɔt una fayn ɛgzampul na wi siti!”

Wan palimɛnterian we na di chiaman fɔ di ɔganayzeshɔn we de ɛp pipul dɛn we ebi ren ɛn briz pwɛl dɛn tin dɛn, bin sɛn lɛta na Jiova Witnɛs dɛn branch ɔfis fɔ tɛl dɛn tɛnki fɔ we dɛn ɛp.