Yugo we ol tɛn ia, bin gɛt Dayna Awɔd frɔm wan British ɔganayzeshɔn fɔ di wok we i du fɔ ɛp in kɔmpin dɛn fɔ no wetin fɔ du we dɛn kɔmpin dɛn tek advantej pan dɛn.

Yugo tɔk se: “Na di katun fim we nem Beat a Bully Without Using Your Fists na in rili ɛp mi fɔ gɛt dis awɔd. Di tin dɛn we a lan frɔm da fim de na jw.org na in ɛp mi fɔ du mi wok fayn as pɔsin we de bifo fɔ de agens di wan dɛn we kin tek advantej pan dɛn kɔmpin.”

Fɔs, Yugo bin ple di katun fim we nem Beat a Bully fɔ in ticha dɛn. Dis bin tɔch dɛn at, ɛn dɛn arenj fɔ mek ɔl di studɛnt dɛn gɛt di jw.org wɛbsayt. Bɔku pan di pikin dɛn we ol et to tɛn ia na Yugo in skul de yuz di jw.org fast fast. Dɛn bin se i dɔn ɛp dɛn nɔto fɔ jɔs bia wit prɔblɛm dɛn lɛk we dɛn kin tek advantej pan dɛn bɔt i dɔn ɛp dɛn fɔ ansa kwɛstyɔn dɛn lɛk, Aw a go gɛt rial padi dɛn?

Na wan ɔda skul we de na Briten dɛn bin de tek advantej pan Ilayja we ol et ia. In ɛn in famili bin tek tɛm fɔ wach di fim we nem Beat a Bully. Dɛn ɔl bin praktis togɛda wetin dɛn go se ɔ du if pɔsin tek advantej pan am. Dis bin ɛp Ilayja fɔ no aw fɔ sɔlv di prɔblɛm fayn wan. Afta dat, insay di wik we dɛn gɛt di program fɔ fɛt agens di wan dɛn we de tek advantej pan dɛn kɔmpin dɛn, Ilayja in ɛdmasta bin ple di fim fɔ di wan ol skul.

Nɔto Briten nɔmɔ dɛn kin tek advantej pan ɔda pipul dɛn. Na tin we de apin ɔlsay na di wɔl, ɛn dis katun fim de ɛp yɔŋ wan dɛn ɔlsay na di wɔl.

Insay Amɛrika, Ayvi we ol tɛn ia bin de fred in klasmet we bin de tek advantej pan am. Afta i wach di fim we nem Beat a Bully Ayvi bin gɛt kɔrej fɔ lɛf fɔ fred di titi. I bin tɔk to in ticha we bin ɛp am fɔ sɔlv di prɔblɛm. In klasmet bin beg am, ɛn dɛn ɔl tu bin kam fɔ bi padi.

Jiova Witnɛs dɛn bisin bɔt yɔŋ pipul dɛn. Wi go kɔntinyu fɔ mek tin dɛn we gɛt advays we go ɛp dɛn fɔ sɔlv prɔblɛm dɛn we dɛn kin gɛt ɛvride lɛk we ɔda pɔsin kin tek advantej pan dɛn.