JW.ORG—De Chenj Pipul dɛn Layf fɔ Gud
Pipul dɛn we de difrɛn say dɛn de bɛnifit frɔm jw.org. Dɔŋ ya na sɔm ɛgzampul dɛn bɔt wetin sɔm pipul dɛn bin rayt ɛn sɛn na Jiova Witnɛs dɛn wɔl ɛdkwata fɔ tɛl dɛn tɛnki.
De Ɛp Smɔl Pikin Dɛn
“Mi pikin we de nɔzri kin kam na os wit in kɔmpin dɛn pɛnsil, dɛn ple tin dɛn, ɛn ivin dɛn glasis dɛn we dɛn kin wɛr fɔ san. Wi dɔn tray te fɔ ɛp am fɔ no se dɛn tin dɛn de we i de du nɔ fayn ɛn na tif. Ɔl wetin wi du nɔ wok pas we wi dawnlod wan fim na jw.org. Di fim in taytul na, Stealing Is Bad. Dat bin tan lɛk di rayt mɛrɛsin fɔ wi bɔy pikin. We i wach am dɔn, i bin gri fɔ kɛr ɔl di tin dɛn we i bin dɔn tek frɔm in padi dɛn bikɔs insɛf bin gri se dat na tif ɛn Gɔd nɔ lɛk dat. Dis wɛbsayt dɔn rili ɛp wi!”—D. N., Afrika.
“Di jw.org fim we gɛt di taytul Stealing Is Bad . . . dɔn tan lɛk di rayt mɛrɛsin fɔ wi bɔy pikin”
“Mi pikin dɛn rili lɛk dis wɛbsayt. Dɛn kin dawnlod shɔt katun fim dɛn we de ɛp dɛn fɔ fala di tin dɛn we dɛn de lan na di Baybul fɔ se i nɔ fayn fɔ tif ɛn lay. Dɛn dɔn lan fayn abit dɛn bak we dɛn go gɛt te dɛn big ɛn we go mek dɛn bi bɛtɛ pipul dɛn na di eria.”—O. W., Wɛst Indiz.
De Ɛp di Wan dɛn We De Go Skul
“A bin de si skul as ebi wok, ɛn a bin want fɔ lɛf fɔ go skul. Bɔt wan de a rid wan atikul na jw.org wɛbsayt. Di atikul in taytul na, ‘Should I Quit School?’ I ɛp mi fɔ tink di rayt we bɔt skul. A lan frɔm di atikul se, we a de go skul, dat go tren mi fɔ tumara bambay ɛn i go ɛp mi fɔ bi pɔsin we ebul fɔ du tin fɔ misɛf.”—N. F., Afrika.
“Di advays we de na dis wɛbsayt fɔ yɔŋ pipul dɛn, dɔn tich mi aw fɔ kɔntinyu fɔ biev fayn na skul”
“Di advays we de na dis wɛbsayt fɔ yɔŋ pipul dɛn, dɔn tich mi aw fɔ kɔntinyu fɔ biev fayn na skul. A dɔn lan aw fɔ pe atɛnshɔn pan mi stɔdi ɛn aw fɔ avɔyd tin dɛn we go ambɔg mi.”—G., Afrika.
“Wan mi wokmet bin de kɔmplen se wan patikyula titi de tek advantej pan in gyal pikin na skul. Dis bin de mek di pikin fil bad ɛn dis bin mek, fɔ sɔm dez i bin de fred fɔ go skul. A bin tɔk to mi wokmet bɔt di pɔynt dɛn frɔm wan katun fim we de na jw.org di fim in taytul na Beat a Bully Without Using Your Fists. I bin lɛk di advays we se wi fɔ tɔk ɔ du sɔntin we go mek di tɔk nɔ go bifo. I bin tɔk to in pikin bɔt wetin fɔ du we dɛn tek advantej pan am. Dat bin mek di pikin gɛt maynd fɔ go na skul. Afta sɔm tɛm, di prɔblɛm bin bɛtɛ ɛn di wan we bin de tek advantej pan am bin bigin biev fayn to am.”—V. K., Istɛn Yurop.
De Ɛp Yɔŋ Pipul Dɛn
“Tɛnki fɔ di atikul na di wɛbsayt we gɛt di taytul, ‘Why Do I Cut Myself?’ I dɔn te we a gɛt dis prɔblɛm. A bin tink se na mi wan de ɛn if a tɛl ɔda pipul dɛn, dɛn nɔ go ɔndastand mi. Di ɛgzampul dɛn we de insay di atikul dɔn rili ɛp mi. Sɔm pipul dɛn de ɔndastand mi!”—Wan yɔŋ uman we de na Ɔstrelia.
“Di ɛgzampul dɛn we de insay di atikul dɔn rili ɛp mi. Sɔm pipul dɛn de ɔndastand mi!”
“Di jw.org wɛbsayt dɔn mek am izi fɔ mek a rid bɔt tin dɛn we de apin to yɔŋ pipul dɛn. Wan patikyula atikul dɔn ɛp mi fɔ no di difrɛn we dɛn aw pipul dɛn kin fos ɔda pipul dɛn fɔ du mami ɛn dadi biznɛs wit dɛn ɛn a dɔn lan bak di rayt tin we a fɔ du we dɛn kayn tin dɛn de apin.”—T. W., Wɛst Indiz.
De Ɛp Mama ɛn Papa Dɛn
“Mi bɔy pikin nɔ de stɛdi ɛn i bɛt bɛt. Sɔntɛnde, a kin sɔprayz we i kin biev difrɛn difrɛn we. Dat kin mek i nɔ izi fɔ mek mi ɛn in tɔk. Wan de a go na jw.org ɔnda di say we de fɔ mared pipul dɛn ɛn fɔ mama ɛn papa dɛn. A si bɔku atikul dɛn we fit di tin dɛn we de apin to mi ɛn dat dɔn tich mi aw fɔ tɔk wit mi bɔy pikin. Insɛf dɔn bɛnifit frɔm di wɛbsayt. Naw i kin tɛl mi bɔt di tin dɛn we de mek i gladi ɛn di tin dɛn we de mek i wɔri.”—C. B., Afrika.
“Sɔntɛnde, wan atikul go jɔs kam na jw.org di rayt tɛm fɔ ɛp wi wit di prɔblɛm we wi pikin dɛn kin gɛt”
“Fɔ wi mama ɛn papa dɛn, jw.org de ɛp wi fɔ tich wi pikin dɛn bay ple ple. Fɔ ɛgzampul, di katun fim bɔt aw fɔ fɛn rial padi dɔn ɛp wi pikin dɛn fɔ tink di rayt we bɔt padi biznɛs ɛn aw fɔ fɛn padi dɛn we go ɛp dɛn fɔ bi gud pipul dɛn. Sɔntɛnde, wan atikul go jɔs kam na jw.org di rayt tɛm fɔ ɛp wi wit di prɔblɛm we wi pikin dɛn kin gɛt. Na wɛbsayt we gɛt bɔku advays.”—E. L., Yurop.
De Ɛp Mared Pipul Dɛn
“Mi ɛn mi wɛf dɔn mared fɔ siks ia. Lɛk ɔl ɔda mared pipul dɛn, wisɛf dɔn gɛt prɔblɛm dɛn we i kam pan di difrɛn we aw wi dɔn yus fɔ tɔk, di difrɛn we aw wi dɔn yus fɔ du tin, ɛn di difrɛn we aw wi dɔn yus fɔ tink. Di atikul we de na jw.org we gɛt di taytul, ‘How to Be a Good Listener’ bin rili ɛp mi. I gi fayn advays bɔt aw fɔ bi pɔsin we de lisin fayn. A rid di atikul ɛn sho mi wɛf. Wi tray fɔ fala di tin dɛn we wi dɔn lan na di atikul.”—B. B., Wɛst Indiz.
“Dis wɛbsayt dɔn sev mi mared”
“A bin dɔn de go Jiova Witnɛs dɛn mitin fɔ lɛk wan ia naw, ɛn a rili want fɔ tɛl dɛn tɛnki fɔ di jw.org wɛbsayt. A dɔn lan bɔku tin frɔm dis wɛbsayt. Tin dɛn lɛk aw fɔ kɔntrol misɛf fɔ mek a nɔ vɛks ɛn aw fɔ bi gud maredman ɛn papa. A kin tɔk fɔ tru se dis wɛbsayt dɔn sev mi mared.”—L. G., Wɛst Indiz.
De Ɛp di Wan dɛn We Dɛf
“Di jw.org wɛbsayt dɔn ɛp mi fɔ fil lɛk a gɛt layf bak. Di Amɛrikin Sayn Langwej fim dɛn dɔn ɛp mi fɔ sabi sayn mɔ. A bin de tink se a nɔ go ebul fɔ du ɛni bɛtɛ tin na layf, bɔt we a wach di fim we nem, Seeing God’s Word in My Language, dat dɔn ɛp mi fɔ mekɔp mi maynd ɛn tink di rayt we bɔt layf.”—J. N., Afrika.
“Di jw.org wɛbsayt dɔn ɛp mi fɔ fil lɛk a gɛt layf bak”
“Di wɛbsayt rili gɛt valyu. Mi na pɔsin we de ɛp dɛf pipul dɛn mɔ dɛn yɔŋ wan dɛn. Di bɔku bɔku tin dɛn we de insay sayn langwej dɔn ɛp misɛf fɔ sabi aw fɔ sayn mɔ. Di wɛbsayt dɔn ɛp mi fɔ ɛp di wan dɛn we want fɔ mek dɛn famili kɔmɔt fayn ɛn we want fɔ gɛt gud padi dɛn.”—K. J., Wɛst Indiz.
De Ɛp di Wan dɛn We Blaynd
“Mi na blaynd pɔsin we dɔn bɛnifit frɔm jw.org. I dɔn mek naw a de gɛt tin dɛn we kin tek sɔm mɔnt fɔ mek a gɛt am bay mel. Di wɛbsayt dɔn ɛp mi famili ɛn i dɔn mek misɛf ebul fɔ ɛp na mi eria. I dɔn mek misɛf ebul fɔ gɛt tin dɛn fɔ rid di sem tɛm we mi padi dɛn we de si kin gɛt dɛn yon.”—C. A., Sawt Amɛrika.
“Di wɛbsayt dɔn ɛp mi famili ɛn i dɔn mek misɛf ebul fɔ ɛp na mi eria”
“Fɔ di wan dɛn we nɔ de rid Brel ɔ we nɔ gɛt bɛtɛ mɔni fɔ bay brel buk dɛn, jw.org go ɛp dɛn. Di odio rɛkɔdin dɛn we de de go ɛp di wan dɛn we blaynd fɔ lan bɔku tin dɛn. Dis wɛbsayt de fɔ ɛp ɔlman. I de ɛp di wan dɛn we blaynd fɔ fil gud bɔt dɛnsɛf ɛn mek dɛn no se dɛnsɛf impɔtant.”—R. D., Afrika.
De Ɛp di Wan dɛn We Want fɔ No bɔt Gɔd
“Di tin we mek una wɛbsayt difrɛn frɔm ɔda wɛbsayt dɛn na bikɔs una nɔ de yuz big big wɔd dɛn we na prist dɛn nɔmɔ de ɔndastand. Ɛn una nɔ kin rayt bɔku bɔku tin dɛn we kin mek pɔsin nɔ ɔndastand. Una wɛbsayt simpul. I nɔ de mek pɔsin fil lɛk se i at fɔ gɛt fet. Bifo dat, i de mek pɔsin no se fet na sɔntin we ɔlman kin ebul fɔ gɛt.”—A. G., Eshia.
“Una wɛbsayt simpul . . . i de mek pɔsin no se fet na sɔntin we ɔlman kin ebul fɔ gɛt”
“Mi layf nɔ fɔ dɔn min ɛnitin if jw.org nɔ bin de. Insay dis kayn wɔl we pipul dɛn de na dak we i kam pan Gɔd biznɛs, dis wɛbsayt tan lɛk layt we a kin put ɔn. Wantɛm wantɛm, a kin si ɛn rid atikul dɛn we de ɛksplen wetin Gɔd tink bɔt sɔm tin dɛn ɛn a kin gɛt ansa fɔ bɔku kwɛstyɔn dɛn.”—J. C., Wɛst Indiz.
“A rili gladi fɔ di tin dɛn we a de gɛt we de ɛp mi fɔ gɛt tayt padi biznɛs wit Gɔd pan ɔl we a de insay dis jɔngul na Sawt Amɛrika. If dis wɛbsayt nɔ bin de, a fɔ dɔn lɔs.”—M. F., Sawt Amɛrika.
You May Also Like
BI JIOVA IN PADI
I Nɔ Fayn fɔ Tif
Wetin Jiova tɔk bɔt tif? Rid Ɛksodɔs 20:15. Wach di fim ɛn lan mɔ wit Kɛli.