Frayde, Julay 5, 2013, di Bɛtɛlayt dɛn we de na Amɛrika bin gladi we dɛn yɛri Brɔda Antoni Mɔris we na Gɔvnin Bɔdi mɛmba anawns se: “Dɛn dɔn gri fɔ mek dɛn sɛl di siks bildin dɛn dat na di wan dɛn we de na 117 Adams Strit ɛn 90 Sands Strit na Bruklin. * Fɔ mek dɛn go ebul fɔ sɛl fayv pan dɛn bildin dɛn ya, dɛn fɔ dɔn kɔmɔt de bay Ɔgɔst insay dis ia.”

Wan dawt nɔ bin de fɔ se dis nɔ to bin izi wok fɔ du. Di say we dɛn fayv bildin dɛn ya de, na lɛk say usay ilɛvin futbɔl fil dɛn we dɛn kin yuz fɔ ple intanashɔnal gem! Ɛn dɛn fɔ kɔmɔt de insay 60 dez!

Fɔ lɔng tɛm naw, dɛn bin gɛt bɔku tin dɛn we dɛn de yuz fɔ print insay dɛn bildin dɛn ya, bɔt insay 2004 dɛn bin pul ɔl dɛn tin dɛn de we dɛn de yuz fɔ print ɛn kɛr dɛn go na wan nyu say na Wɔlkil, Nyu Yɔk.

Frɔm da tɛm de, dɛn dɔn yuz dɛn bildin dɛn de fɔ kip tin dɛn we dɛn de yuz fɔ bil, ɔfis fɔnichɔ dɛn, ɛn tin dɛn we dɛn de yuz fɔ sɔpɔt ɔda bildin wok dɛn na Amɛrika ɛn ɔda say dɛn.

Dɛn bin nid fɔ tek tɛm plan gud wan fɔ mek dɛn go ebul fɔ kɔmɔt na dɛn bildin dɛn ya insay di tɛm we dɛn dɔn gi dɛn. Fɔs, dɛn rayt ɔl di tin dɛn we de insay di bildin so dat dɛn go no wetin fɔ sɛl, wetin dɛn go trowe, ɔ wetin dɛn go kip. Afta dat, dɛn tray fɔ arenj aw dɛn go du di wok sef ɛn fayn.

Di Bɛtɛlayt dɛn tray tranga wan fɔ sɔpɔt di wok. Apat frɔm dat, dɛn invayt 41 pipul dɛn fɔ kam na Bɛtɛl fɔ ɛp fɔ du di wok. Di wan dɛn we kam fɔ ɛp fɔ du di wok kɔmɔt frɔm difrɛn say dɛn na Amɛrika. Bɔku pan dɛn ɛn gɛt trɛnk. Dɛn bin gri fɔ kam fɔ lɛk siks wik ɔ tɛn wik. Dɛn lɛf dɛn fambul dɛn, padi dɛn, ɛn ivin di wok we dɛn bin de du jɔs fɔ kam wok na Bɛtɛl. Aw dɛn fil bɔt di wok?

Jɔdan, ol 21 ia, i kɔmɔt na Wɔshintin Stet. I bin tɔk se: “A wish a fɔ dɔn aplay lɔn lɔntɛm.”

Stivin, ol 20 ia, i kɔmɔt na Tɛkas. I bin tɔk se: “A fil lɛk a de insay wan big famili we gladi ɛn lɛk fɔ wok.”

Jɔstin, ol 23 ia, i bin rayt se: “We a de na Bɛtɛl a kin fil lɛk se a de na os. Di tin dɛn we wi de lan na Bɛtɛl de ɛp di kayn padi biznɛs we wi gɛt wit Gɔd ɛn i de mek wi lɛk wisɛf. Di kayn padi biznɛs we de na Bɛtɛl rili fayn.”

Adla, ol 20 ia, i kɔmɔt na Poto Riko, i bin tɔk se: “Fɔ wek kwik na mɔnin nɔ to izi tin fɔ mi, bɔt a dɔn ebul fɔ gɛt padi dɛn we mi ɛn dɛn wi padi biznɛs go de sote go.”

Wiliam, we ol 21 ia, bin tɔk se: “Frɔm we a smɔl a bin want fɔ kam na Bɛtɛl. A bin tink se a go fil lɛk se na mi wan de, bɔt a bin rɔng. Bɛtɛl na di bɛst tin we dɔn apin na mi layf! A nɔ de tink bɔt ɛnitin sɛf we bɛtɛ pas fɔ de na ya.”

Di wan dɛn we de du di wok bin mitɔp di taym we dɛn gi dɛn? Yɛs, dɛn mitɔp—insay 55 dez.