Ɛni ia, bɔku bɔku pipul dɛn kin kam fɔ si di wok we Jiova Witnɛs dɛn de du na dɛn branch ɔfis we de na Amɛrika ɛn dɛn wɔl ɛdkwata we de na Nyu Yɔk. Dɛn kɔl dɛn ples dɛn ya Bɛtɛl. Bɛtɛl na Ibru nem we min “Gɔd in Os.” Pipul dɛn kin kɔmɔt fa say fɔ kam si aw wi de mek wi buk dɛn, trakt dɛn, ɛn magazin dɛn. Sɔm dɛn kin kam bak fɔ si aw wi de ɔganayz wi wok ɛn fɔ kam fɛn dɛn padi dɛn we de na Bɛtɛl. Wan pɔsin we bin kam dis biɛn tɛm bin rili tek lɔng tɛm fɔ plan ɛn i bin mekɔp in maynd fɔ kam.

Masɛlɔs, na wan pan Jiova Witnɛs dɛn we de na Ankɔrej, Alaska, insay Amɛrika. Dis brɔda ya so nɔ ebul fɔ tɔk bɛtɛ bikɔs i dɔn te we i gɛt strok. * Na wilchia i de sidɔm so pas pɔsin ɛp am fɔ du tin dɛn. Pan ɔl dat, i bin rili want fɔ kam waka na Bɛtɛl. I bin ebul fɔ du dat dis biɛn tɛm.

Kɔri na Masɛlɔs in padi ɛn na in bin de ɛp am fɔ arenj in travul biznɛs. Kɔri bin tɔk se: “I nɔ bin givɔp, i bin de kɔl mi fast fast fɔ no wetin ɛn wetin a bin dɔn du. Ɛniti Masɛlɔs nɔ bin de tɔk bɛtɛ na ‘Yɛs’ ɛn ‘Nɔ,’mɔ i bin de tɔk so a kin nid fɔ aks am bɔku bɔku kwɛstyɔn dɛn we i kɔl mi.” Na so dɛn tɔk kin tan lɛk:

“Yu want mek a kam?”

“Nɔ.”

“Yu want mek a kɔl di dɔktɔ?”

“Nɔ.”

“Yu kɔl mi fɔ no bɔt yu travul wan fɔ go waka na Bɛtɛl?”

“Yɛs.”

“A kin gɛt fɔ ɛksplen wetin ɛn wetin a dɔn du fɔ arenj in go wan. A bin rili gladi we i ebul fɔ go.”

Masɛlɔs bin bia difrɛn difrɛn tin dɛn we bin want fɔ ambɔg in travul wan. Ɛniti i nɔ bin de gɛt bɛtɛ mɔni, i bin tek tu ia fɔ mek i ebul fɔ kip di mɔni we go du fɔ mek i travul go na Nyu Yɔk. Frɔm usay i de to Nyu Yɔk na lɛk 5,400-kilomita (3,400 mayl). Bikɔs i nɔ bin ebul fɔ du ɔltin fɔ insɛf, i bin nid fɔ fɛn pɔsin we go ebul fɔ ɛp am fɔ mek dɛn travul. Afta dat, in dɔktɔ bin nid fɔ gri fɔ mek i go. Insay lɛk tu tri dez so we i fɔ travul na in di dɔktɔ gri.

We Masɛlɔs rich na Nyu Yɔk, pɔsin bin de fɔ sho sho am insay di bildin dɛn na Bruklin, Patasin, ɛn Wɔlkil. I bin si dɛn big big mashin dɛn we de print buk ɛn Baybul dɛn, i bin ebul fɔ no bak aw wi de ɔganayz wi wok. I bin go bak na wan say usay dɛn put tin dɛn we pipul dɛn kin kam wach, dɛn kɔl di say, “The Bible and the Divine Name” ɛn “A People for Jehovah’s Name.” I bin gɛt nyu padi dɛn. Rili na ples we a nɔ go ɛva fɔgɛt!

Bɔku pipul dɛn kin tɔk se dɛn nɔ ebul fɔ ɛksplen aw dɛn fil we dɛn go waka na Bɛtɛl. Bɔt we dɛn aks Masɛlɔs if ɔl di tin dɛn we i du fɔ kam waka na Bɛtɛl, na bin fayn tin? I bin se “Yɛs. Yɛs. Yɛs!” Na da we de nɔmɔ i bin ebul fɔ tɔk aw i bin fil.

If yu ɛn yu famili kam waka na Bɛtɛl, una go rili ɛnjɔy am jɔs lɛk aw Masɛlɔs bin ɛnjɔy am di tɛm we i kam. Ɔlman wɛlkɔm fɔ kam waka na wi branch ɔfis. Yu nɔ tink se i go fayn fɔ mek yu kam fɛn wi?