We wan papa we de na Maleshya bin wach di fim dɛn we gɛt di taytul, Bi Jiova in Padi i bin tɔk se, “I tan lɛk se Jiova de lisin to wetin de insay mama ɛn papa dɛn at.”

Frɔm di tɛm we dɛn mek di fɔs wan, Jiova Witnɛs dɛn dɔn kɔntinyu fɔ de mek katun fim dɛn bɔt Kelɛb ɛn in famili. Di fim dɛn de na jw.org, i de tich pikin dɛn tin dɛn we go mek dɛn kɔmɔt fayn ɛn gɛt tayt padi biznɛs wit Gɔd. Dɛn kin lan tin dɛn lɛk, wetin mek dɛn nɔ fɔ tif ɛn aw dɛn kin pre to Gɔd.

Dɛn dɔn translet di fɔs fim we dɛn mek insay 131 langwej dɛn ɛn dɛn fim ya de ɛp pikin dɛn we de difrɛn say dɛn na di wɔl.

Wan mama we gɛt fayv pikin dɛn bin rayt se: “Frɔm di tɛm we wi gɛt di DVD we nem, Lisin, Obe, ɛn Gɛt Blɛsin, insay wan wik wi wach am fɔ lɛk 50 tɛm so.”

Mili de Ingland ɛn i ol 12 ia. I gɛt wan in brɔda we nem Tɔmɔs we ol 15 ia ɛn i gɛt wan sik we nem Down syndrome. Mili bin rayt se: “Tɔmɔs gɛt Kelɛb in fim dɛn na in iPad, so i kin sho di fim to in padi dɛn na skul. I lɛk di siŋ dɛn ɛn i kin siŋ dɛn fayn, wan de i mek wan sista kray we di sista yɛri am we i de siŋ. I kin rili fayn fɔ si.”

Ava, we se i ol 8 ia, 9 mɔnt, ɛn 25 dez, bin rayt se: “Kelɛb ɛn in sista dɛn de rili du wɛl fɔ tich pikin dɛn.”

Mikayla bin rayt: “A ol siks ia. Tɛnki fɔ di DVD we nem, Lisin, Obe, ɛn Gɛt Blɛsin. I tich mi fɔ lisin to mi mama ɛn papa bikɔs dat de mek Jiova gladi.”

Wan yɔŋ pɔsin we de mek katun fim bɔt we nɔto Jiova Witnɛs, bin wach di fim we nem, Stealing Is Bad. I bin rili gladi mɔ we i kam fɔ no se nɔto bɔku pipul dɛn mek dis katun fim. I bin tɔk se: “A sabi pipul dɛn we de wok na big ɛn smɔl studio dɛn usay dɛn de mek katun fim dɛn, ɛn sɔntɛnde a kin de wɔnda wetin i min fɔ wok na dɛn kayn say dɛn de. Pan ɔl di tranga wok we dɛn de du, dɛn kin jɔs mek tin dɛn we de mek pipul dɛn laf fɔ shɔt tɛm. Una yon katun fim dɛn de chenj pikin dɛn layf, i de tich dɛn wetin rayt ɛn wetin rɔng, ɛn ɛp dɛn fɔ disayd fɔ du di rayt tin. Una de du sɔntin we gɛt minin, sɔntin we de ɛp pipul dɛn.”

Mama ɛn papa dɛn we de difrɛn say dɛn na di wɔl go kwik fɔ gri wit dat. Wan mama bin rayt se: “Mi tri ia ol bɔy pikin we nem Kwin, bin de wach di fim we nem, Gaining Jehovah’s Friendship. We di siŋ dɔn go fa smɔl, i luk mi, put in an na in chɛst, ɛn tɔk se: ‘Mɔmi, we a de wach dis i de mek a gladi.’ ”