Laybri we Yu kin Waka Wit
Ɔktoba 7, 2013, Jiova Witnɛs dɛn gɛt wan ap we pɔsin go yuz fɔ rid ɛn stɔdi di Baybul. Di ap in nem na, JW Library. Dis fri Baybul ap gɛt siks Inglish Baybul transleshɔn dɛn ɛn di King James Version ɛn di nyu New World Translation of the Holy Scriptures we dɛn mek insay 2013 insɛf de de. *
Wetin Mek Dɛn Mek Am?
Bɔku pipul dɛn de yuz fon, tablɛt, ɔ ɔda ilɛktronik tin dɛn fɔ wok ɛn fɔ tɔk to ɔda pipul dɛn. Pan ɔl we pipul dɛn we de yuz ilɛktronik tin dɛn we pɔsin kin muv wit fɔ rid ɛn stɔdi na jw.org, wetin mek dɛn mek JW Library?
Fɔs, yu nɔ nid Intanɛt kɔnɛkshɔn we yu de yuz dis ap wans yu bin dɔn gɛt am. Sɛkɔn, dɛn mek am fɔ ɛp di wan we de yuz am fɔ ebul fɔ rid di skripchɔ dɛn izi wan ɛn stɔdi di Baybul fayn. Aw?
JW Library De Ɛp fɔ Du Baybul Stɔdi
Di fɔs tɛm we pɔsin opin JW Library, i de sho di Baybul buk dɛn nem dɛn. We yu pik ɛni Baybul buk, di nɛks skrin de sho di chapta dɛn we de insay di wan we yu pik. Dis de mek i izi fɔ mek yu si di vas ɔ pasej insay di chapta. Di ap gɛt bɔku ɔda tin dɛn fɔ Baybul stɔdi:
Futnot dɛn we de sho ɔda kayn tin dɛn we dɛn bin dɔn rayt ɔ sɔm ɔda tin dɛn we yu go nid fɔ no bɔt wetin yu de rid
Krɔs rɛfrɛns dɛn we gɛt fɔ du wit di vas we yu de rid
Wan we aw yu go ebul fɔ fɛn ɔ si ɔmɔs tɛm wan wɔd ɔ sɔm wɔd dɛn de insay di chapta we yu de rid
Wan say de bifo usay dɛn rayt smɔl tin bɔt di Baybul buk
Wan tebul we de sho di wan we rayt ɛni Baybul buk, usay ɛn ustɛm di pɔsin rayt di buk, ɛn ɔmɔs ia di pɔsin tek fɔ rayt di buk
Wan sɛkshɔn we gɛt map dɛn, chat dɛn, taym layn, ɛn drɔin dɛn we gɛt kɔlɔ
Lɛk ɔl di buk dɛn, magazin dɛn trakt dɛn we Jiova Witnɛs dɛn de mek, JW Library na fri. Bɔku pipul dɛn dɔn dawnlod dis fri Baybul ap ɛn na mɔni dɛn we wi ɛn ɔda pipul dɛn kin mekɔp fɔ gi, na in wi de yuz fɔ mek dis wok go bifo. (Sɛkɛn Lɛta Fɔ Kɔrint 9:7) Yu nɔ tink se i go fayn fɔ mek yu tray fɔ yuz di laybri we pɔsin kin waka wit?
^ par. 2 Insay Janwari 2014, dɛn ɔpdet di ap. Naw i gɛt di deli tɛks ɛn di siŋbuk we Jiova Witnɛs dɛn de yuz.