Odval de na Mɔngolia. I nɔ shɔ bɔt ɔmɔs ia i ol, bɔt i tink se na insay 1921 i bɔn. We i bin smɔl, i bin de mɛn in mama ɛn papa dɛn animal dɛn. Na wan ia nɔmɔ i go skul fɔ. I nɔ sabi rid. Bɔt dis biɛn tɛm, wan buk we gɛt bɔku kɔlɔ dɛn bin ɛp am fɔ sabi Gɔd ɛn fɔ lan bɔt di fayn fayn tin dɛn we di wan dɛn we lisin to Gɔd go ɛnjɔy. Dis tin we i lan dɔn rili tɔch in at.

Di smɔl buk we Jiova Witnɛs dɛn mek insay 2011 gɛt tu kayn. Dɛn ɔl tu gɛt fayn fayn drɔin dɛn bɔt wan gɛt bɔku raytin pas in kɔmpin.

I nɔ go tu te igen di Lisin to Gɔd ɛn De Sote Go, we gɛt bɔku raytin go de insay lɛk 583 langwej dɛn; di ɔda wan we na Lisin to Gɔd, go de insay lɛk 483 langwej dɛn. Kɔmpia dis wit di United Nations Universal Declaration of Human Rights, we bay Ɔktoba, 2013 dɛn bin translet am insay 413 langwej dɛn. Apat frɔm dat, dɛn dɔn sheb sheb lɛk 80 milyɔn kɔpi dɛn.

Insay Brazil, wan ol mami bin gladi fɔ tek di Lisin to Gɔd buk ɛn i bin tɔk se: “I fayn fɔ no se pipul dɛn de we kia fɔ pipul dɛn lɛk mi. A nɔ bin de gri fɔ tek una magazin dɛn bikɔs a nɔ sabi rid. Bɔt a want dis buk.”

Brigita, na wan uman we nɔ go skul we de na Frans, i bin tɔk se: “Ɛvride, a de luk di pikchɔ dɛn we de insay di buk.”

Wan Jiova Witnɛs frɔm Sawt Afrika bin rayt se: “A nɔ ebul fɔ fɛn di rayt buk we a fɔ yuz fɔ bigin prich to pipul dɛn we de tɔk Chayniz. A dɔn prich to pipul dɛn we dɔn kɔmɔt kɔlɛj, pipul dɛn we rili gɛt sɛns, ɛn pipul dɛn we nɔ sabi rid fayn di wan we fit dɛn ɔl; Lisin to Gɔd ɛn De Sote Go dɔn ɛp mi fɔ ebul tich simpul tin dɛn bɔt di Baybul kwik kwik wan. Insay 30 minit, a kin ebul fɔ le fawndeshɔn.”

Insay Jamani, Jiova Witnɛs dɛn stɔdi wit wan maredman ɛn in wɛf we lan buk. Di man bin rili gladi fɔ di buk ɛn i bin tɔk se: “Wetin mek una nɔ bin dɔn gi min dis buk kwik? I de rili ɛp mi fɔ ɔndastand tin dɛn we bin apin insay di Baybul simpul wan.”

Wan dɛf uman we de na Ɔstrelia bin tɔk se: “Fɔ lɔng tɛm a bin de wit mɔda dɛn. A bin yus to di bigman dɛn na di chɔch pas ɔlman. Bɔt wande, nɔn pan dɛn nɔ ɛva tich mi wetin Gɔd in Kiŋdɔm min. Di pikchɔ dɛn insay dis buk dɔn ɛp mi fɔ ɔndastand wetin Matyu 6:10 rili min.”

Dɛn bin rayt frɔm Jiova Witnɛs dɛn branch ɔfis na Kanada fɔ se: “We bɔku Salon pipul dɛn si di Lisin to Gɔd buk insay Krio, dɛn bin tɔk se Jiova Witnɛs dɛn rili de tray tranga wan fɔ mek pipul dɛn lan bɔt di Baybul. Sɔm dɛn dɔn tɔk se, ‘Una bisin bɔt pipul dɛn, bɔku ɔda wan dɛn nɔ bisin.’ ”