Pipul dɛn we de difrɛn say dɛn na di wɔl de rid Jiova Witɛns dɛn buk ɛn magazin dɛn. Bɔku pipul dɛn kin yuz ilɛktronik tin dɛn lɛk aw yusɛf de du naw. Yu go sɔprayz fɔ no di kayn we aw wi de du wi printin wok. Frɔm 2013, wi de mek buk ɛn magazin dɛn we de tɔk bɔt di Baybul insay 700 langwej dɛn ɛn sheb sheb am na 239 kɔntri dɛn.

Bifo di ia 1920, na ɔda pipul dɛn bin de print fɔ wi. Bɔt insay da ia de, wi bigin fɔ print wi yon buk ɛn magazin dɛn na wan smɔl ples we wi rɛnt na Bruklin, Nyu Yɔk. Wi bigin smɔl smɔl bɔt naw wi gɛt 15 difrɛn say dɛn usay wi de print. Sɔm say dɛn de na Afrika, Eshia, Ɔstrelia, Yurop, Nɔt Amɛrika, ɛn Sawt Amɛrika.

Di buk we impɔtant pas ɔl na di Baybul. Insay di ia 1942, wi print di fɔs Baybul we na di King James Version. I bin de insay Inglish. Frɔm di ia 1961, Jiova Witnɛs dɛn dɔn mek ɛn translet di wan ol New World Translation of the Holy Scriptures. Bay 2013, wi dɔn mek pas 184 milyɔn kɔpi dɛn insay 121 langwej dɛn.

Di nɔmba dɛn we wi de mek nɔ de tɔk ɔltin. Di Baybul dɛn we wi dɔn mek de rili te. Di pej dɛn nɔ gɛt asid we go mek di kɔlɔ tɔn yɛlo, ɛn dɛn put di pej dɛn fayn fɔ de togɛda. Di rizɔlt, na Baybul we rili strɔng pan ɔl we dɛn de yuz am ɛvride

Wi de print buk ɛn ɔda tin dɛn we de ɛp pipul dɛn fɔ ɔndastand di Baybul. Luk sɔm nɔmba dɛn we wi bin gɛt insay 2013:

• Di Wachtawa, na wi men magazin, ɛn i pas 210 langwej dɛn we wi de print am pan. Na magazin we de bɔku bɔku wan na difrɛn say dɛn na di wɔl. Fɔ ɛni 16 pej magazin, wi de print 45,000,000 kɔpi dɛn.

• Wi de print Awake! we na Di Wachtawa in kɔmpin, insay 99 langwej dɛn. Fɔ ɛni Awake! na 44,000,000 kɔpi dɛn wi de print.

• Wetin Rili di Baybul De Tich? na 224 pej buk we gɛt sɔft kɔva. Dis buk de fɔ ɛp di wan dɛn we de rid am fɔ ɔndastand di tin dɛn we di Baybul de tich. Frɔm 2005, i dɔn pas 214 milyɔn kɔpi dɛn we wi dɔn print insay 240 langwej dɛn.

• Lisin to Gɔd, na buk we gɛt 32 pej ɛn i de fɔ ɛp di wan dɛn we nɔ sabi rid fayn. Di pikchɔ dɛn ɛn shɔt raytin dɛn we de insay de, de ɛp dɛn fɔ ɔndastand di tru tin dɛn we de insay di Baybul. I pas 400 langwej dɛn we dɛn dɔn print pas 42 milyɔn kɔpi pan.

Apat frɔm di wan dɛn we wi dɔn tɔk bɔt, Jiova Witnɛs dɛn de print difrɛn buk dɛn, smɔl buk dɛn, ɛn trakt dɛn we de ɛp pɔsin fɔ fɛn ansa to kwɛstyɔn dɛn bɔt aw fɔ bia prɔblɛm dɛn na layf, ɛn aw fɔ gɛt gladi at na famili dɛn. Insay 2012 Jiova Witnɛs dɛn print pas 1.3 bilyɔn magazin dɛn ɛn 80 milyɔn buk dɛn ɛn Baybul dɛn.

Pipul dɛn we kin kam waka na di say usay wi de print kin kɔle di kayn we aw wi de du di wok. Ɔl dɛn man ɛn uman dɛn ya de yuz dɛn tɛm ɛn trɛnk. We dɛn kin kam na Bɛtɛl, dat na nem we min “Gɔd in Os,” bɔku pan dɛn nɔ kin gɛt ɛkspiriɛns fɔ du printin wok. Bɔt dɛn kin tren dɛn ɛn we ɔda pipul dɛn de ɛnkɔrej dɛn, dat kin mek ɔltin kɔmɔt fayn. Fɔ ɛgzampul, na kɔmɔn tin fɔ mek yu si yɔŋ man dɛn we ol lɛk 20 ia fɔ de ɔpret mashin dɛn we de print 200,000 16 pej magazin dɛn insay dɛn wan awa.

Na mɔni dɛn we wi ɛn ɔda pipul dɛn de gi, na in wi kin yuz fɔ sɔpɔt di wok we wi de du. Di Ɔgɔst 1879 Zion’s Watch Tower, we wi de kɔl naw Di Wachtawa, bin tɔk se: “ ‘Zion’s Watch Tower’ biliv se, JIOVA na in de bak wi, ɛn bikɔs dat na tru wi nɔ de ɛva beg ɔ aks pɔsin fɔ sɔpɔt wi.” Na da sem we de wi de fil.

Wetin mek wi de yuz bɔku tɛm, mɔni, ɛn trɛnk fɔ du dis wok? Na bikɔs ilɛksɛf na wan pan di buk ɛn Baybul dɛn we wi de print yu de rid ɔ yu de rid am na di Intanɛt, wi op se i go ɛp yu fɔ kam nia Gɔd.