Frɔm Novɛmba 13 to 16, 2014, di Mɛtro Toronto Kɔnvɛnshɔn Sɛnta bin mek di Toronto International Book Fair usay dɛn de sho buk dɛn we dɛn dɔn print ɛn sɔm ɔda ilɛktronik wan dɛn we pɔsin kin ebul fɔ gɛt na in fon, kɔmpyuta, ɔ tablɛt. I pas lɛk 20,000 pipul dɛn we bin atɛnd di program fɔ 4 dez.

Sɔm pan di pipul dɛn we bin kam wit tin dɛn, na bin Jiova Witnɛs dɛn. Dɛn bin gɛt fayn bafa ɛn stand dɛn usay dɛn de put tablɛt fɔ sho pipul dɛn aw fɔ yuz jw.org.

Wan pan di maneja dɛn we bin de na di program bin tɔk se: “Una Wɛbsayt rili fayn. A tink se ɔda pipul dɛn we kam wit dɛn yon buk dɛn na di program fɔ lan frɔm una.” Di wan dɛn we bin atɛnd di program bin se di wɛbsayt rili fayn ɛn i izi fɔ go na ɔda say dɛn na di wɛbsayt ɛn i de tɔk bɔt impɔtant kwɛstyɔn dɛn. Dɛn bin admaya bak fɔ si se di wɛbsayt gɛt tin dɛn we de ɛp pipul dɛn fɔ ebul bia wit dɛn prɔblɛm dɛn ɛn tin dɛn we dɛn bisin bɔt.

As di brɔda ɛn sista dɛn bin de ɛp fɔ kia fɔ di bafa, dɛn bin de tɔk wit pipul dɛn ɛn dɛn kam fɔ no se bɔku pan di pipul dɛn we kam di program nɔ wande yɛri bɔt jw.org yet. Ɔl di wan dɛn we bin atɛnd di program bin gri fɔ tek di kɔntakt kad ɔ wan trakt we nem Usay Wi Go Fɛn di Ansa to Sɔm Impɔtant Kwɛstyɔn dɛn we Wi Kin Aks? Bɔku pipul dɛn se dɛn go wach di wɛbsayt bak, ɛn sɔm pan dɛn se dɛn go want fɔ mek Jiova Witnɛs dɛn kam fɛn dɛn na dɛn os.

Frayde na bin di “Pikin dɛn De” na di program, so di wan dɛn we bin de na di bafa bin gri fɔ ple di katun fim frɔm jw.org. Sɔm skulpikin dɛn we bin de wit dɛn ticha dɛn bin tinap fɔ wach di katun fim.

Wan man we kɔmɔt Chikago we de wok fɔ wan kɔmni we de print Baybul bin kɔle pan di kayn we we dɛn mek di New World Translation of the Holy Scriptures. I bin want fɔ no di wan dɛn we print am ɛn dɛn bin gi am kɔntakt kad.

I pas lɛk 700 langwej dɛn we de na di wɛbsayt. Di wan dɛn we bin kam di program bin ebul fɔ luk 16 pan di langwej dɛn; Amarik, Bɛngali, Chayniz, Inglish, Frɛnch, Grik, Gujarati, Indi, Korian, Pɔtyugiz, Spanish, Swidish, Tamil, Tigrinya, Ɔdu, ɛn Vɛtnamiz.

Wan Jiova Witnɛs we bin wɛlkɔm sɔm pipul dɛn na di bafa bin si se fɔ tɛl pipul dɛn bɔt di wɛbsayt kin difrɛn frɔm we yu de rili sho dɛn aw fɔ yuz am. I bin se, “Wi gɛt fayn chans fɔ sho pipul dɛn di wɛbsayt.”