Insay 2013 frɔm Jun 6 to Jun 16, bɔku bɔku pipul dɛn we kɔmɔt difrɛn say dɛn na di wɔl bin mitɔp na Ruan abɔ we de na di nɔt pat na Frans. Dɛn bin gɛda de fɔ kam si wan fayn say we dɛn kɔl, di Amada.

Afta dɛn dɔn travul bay ship fɔ lɛk 120 kilomita (75 mayl) te dɛn rich Sen, we na wan riva we gɛt kɔv kɔv. Dis riva ya so de na picturesque Normandy. Dis ship we lɔng ɛn fayn pas ɔl di ship dɛn we de na di wɔl, bin stɔp lɛk sɛvin kilomita (4 mayl)so na di vilej we dɛn de gɛt dis fɛstival. Fɔ lɛk tɛn dez, di wan dɛn we bin kam waka na dis ples, bin ebul fɔ go insay dɛn 45 lɔng lɔng ship dɛn ya we bin de na di fɛstival.

Wetin mek bɔku bɔku pipul dɛn we yɔŋ ɛn ol bin atɛnd di Amada? Di wan we mek di program ɛn we stat di Amada bin tɔk se, di Amada de gi dɛn chans fɔ “kam nia di ‘Si Gayant dɛn’ we de mek wi drim.” Fɔ bɔku pipul dɛn, ilɛksɛf dɛn yɔŋ ɔ dɛn ol, dɛn ship dɛn ya de mek dɛn mɛmba lɔng tɛm aw dɛn bin de travul bay si ɛn i de mek dɛn mɛmba bɔt fridɔm.

Bɔku bɔku pipul dɛn we kɔmɔt na ɔda kɔntri dɛn bin ebul fɔ yɛri bɔt wan ɔda kayn fridɔm, dat na di wan we di Baybul de tɔk bɔt. (Jɔn 8:31, 32) Di wan dɛn we bin kam waka na Roan bin notis di kat dɛn we Jiova Witnɛs dɛn bin de yuz fɔ prich. We di wan dɛn we bin de waka ɛn di wan dɛn we bin de kɔntrol di ship dɛn, kam nia di kat, dɛn kin tɛl dɛn fɔ tek ɛni buk, magazin, ɔ trakt, fɔ fri. Bɔku pan di wan dɛn we bin de pas bin want fɔ no mɔ bɔt wan atikul we gɛt di taytul, “A World Without Prejudice—When?” Dis atikul de insay di Wachtawa magazin. Dɛn bin de invayt dɛn bak fɔ kam lisin to pɔblik tɔk dɛn we dɛn go gi insay Frɛnch, Inglish, ɔ Spanish.

Di wan dɛn we de na dis eria bin gladi fɔ dis. Wan man we na in fɔs tɛm fɔ si Jiova Witnɛs dɛn tinap nia kat fɔ prich, bin tɔk se: “A gladi fɔ si una na strit. A rɛspɛkt pipul dɛn we de tinap tranga wan fɔ di tin dɛn we dɛn biliv, pan ɔl we a nɔ biliv di tin dɛn we una biliv.” Tu ol pa dɛn bin mit sɔm yɔŋ Jiova Witnɛs dɛn we bin de prich wit kat, di pa dɛn bin se: “Una fɔ prawd bɔt udat una bi!”