Insay Ɔgɔst 2014, Jiova Witnɛs dɛn ɔlsay na di wɔl bin gi wan trakt we de tɔk mɔ bɔt jw.org. Dat bin mek di nɔmba fɔ di wan dɛn we kin go na di wɛbsayt bin go ɔp bay 20 pasɛnt insay di mɔnt; di nɔmba rich lɛk 65 million. Na lɛk 10,000 pipul dɛn aks fɔ Baybul stɔdi fɔ fri ɔlsay na di wɔl​—dis nɔmba go ɔp bay 67 pasɛnt pas di ɔda mɔnt dɛn! Dis spɛshal prichin bin ɛp pipul dɛn ɔlsay na di wɔl.

Wan Jiova Witnɛs na Kanada bin grit Madalin we dɛn de insay lift ɛn sho am di spɛshal trakt, Usay Wi Go Fɛn di Ansa to Sɔm Impɔtant Kwɛstyɔn dɛn We Wi Kin Aks? Madalin tɔk se i bin de biɛn in viranda di nɛt bifo dɛn mitɔp de pre to Gɔd fɔ ɛp am fɔ fɛn ansa dɛn to kwɛstyɔn lɛk di wan dɛn we de na di pepa. I bin dɔn kɔl difrɛn chɔch dɛn fɔ aks fɔ Baybul stɔdi, bɔt dɛn nɔ ɛva kɔl am bak fɔ ansa am. I nɔ te i bigin stɔdi di Baybul wit Jiova Witnɛs dɛn.

Na di Filipins, Rowana tɔk wit wan Chayniz man we bin tinap bifo wan say usay dɛn de sɛl it. I gi am di trakt ɛn ɛksplen to am se Jiova Witnɛs dɛn want fɔ ɛp pipul dɛn fɔ bɛnifit frɔm fri Baybul stɔdi program.

Di man tɔk se i nɔ wande si Baybul. Wetin ɛn wetin dɛn tɔk mek i atɛnd wan asɛmbli we Jiova Witnɛs dɛn bin gɛt. Afta dat i tɔk se i want fɔ no mɔ bɔt di Baybul ɛn i plan fɔ dawnlod am frɔm wi wɛbsayt.

Gidɛmo, we dɛf na Jiova Witnɛs ɛn i de na Spen. I bin mitɔp Jɔj we na bin in skulmet bɔt insɛf dɛf. Jɔj tɛl am se in mama jɔs day ɛn i gɛt bɔku kwɛstyɔn dɛn ɛn tin dɛn we de mek i dawt. Gidɛmo gi am di trakt ɛn ɛksplen to am se i go fɛn ansa to in kwɛstyɔn dɛn na jw.org. Ɔl dis go de insay sayn langwej. Gidɛmo invayt Jɔj fɔ atɛnd di mitin dɛn na di Kiŋdɔm Ɔl. Jɔj bin kam, ɛn frɔm da tɛm i nɔ mis mitin, pan ɔl we i bin de lɛk 60 kilomita (37 mayl) frɔm di Kiŋdɔm Ɔl.

Tu Jiova Witnɛs dɛn ɛn dɛn wɛf dɛn we de Grinland bin spɛn bɔku mɔni fɔ go na wan vilej we gɛt 280 pipul dɛn. Dɛn spɛn siks awa insay wan smɔl bot fɔ ebul rich de. Dɛn prich de, gi trakt dɛn, ɛn sho dɛn wan jw.org fim insay Grinlandik. Dɛn bin stat Baybul stɔdi wit wan man ɛn in wɛf we dɛn mit. Naw dɛn de yuz tɛlifon fɔ stɔdi dɛn di Baybul tu tɛm insay di wik.

Nɔto jɔs fa fa say dɛn na di nɔt nɔmɔ dɛn kayn tin dɛn ya de bi. Witnɛs dɛn we de na in Nikaragwa bin arenj fɔ sheb di trakt to di Mayangna pipul dɛn we de na di Karebian fɔrɛst. Afta dɛn travul fɔ lɛk 20 awa so insay wan pwɛl pwɛl bɔs ɛn pan rod we gɛt bɔku pɔtol, dɛn waka fɔ 11 awa ɛn sɔntɛnde insay dip pɔtɔpɔtɔ, fɔ rich na di ples. We dɛn rich de, dɛn sheb trakt dɛn ɛn sho fim dɛn we de insay Mayangna langwej. Di pipul dɛn na di eria bin gladi pasmak.

Ɛstɛla bin gi di trakt to wan man we bin de pas na wan smɔl tɔŋ we de na di Amazon ren fɔrɛst na Brazil. Di man tek di trakt, bɔt i put am na in pɔkit ɛn i nɔ bin rili mek lɛk se i want fɔ no mɔ. As i de go bak na in os, di injin na in bot pwɛl so i nɔ bin ebul go. We di man bin de wet fɔ mek dɛn ɛp am, i bin de rid di trakt. I yuz in fon fɔ go na jw.org. We i go de i rid bɔku bɔku atikul dɛn ɛn dawnlod sɔm pan di fim dɛn. Afta sɔm dez, di man mitɔp Ɛstela in man ɛn tɛl am fɔ tɛl Ɛstela tɛnki fɔ di trakt. I bin tɔk se: “Di atikul dɛn we a rid we di bot in injin bin pwɛl bin ɛp mi nɔ fɔ panik te ɔda bot kam sev mi. Mi pikin dɛn lɛk Kelɛb in fim dɛn. A go kɔntinyu fɔ de go na jw.org.”