Di Giliad Klas we mek 137, bin gradyuet Sɛptɛmba 13, 2014, na di say usay Jiova Witnɛs dɛn kin ol dɛn skul dɛn na Patasain insay Nyu Yɔk. Dis skul de tren Jiova Witnɛs dɛn we gɛt ɛkspiriɛns fɔ no mɔ aw fɔ ɛp di kɔngrigeshɔn dɛn ɛn di branch ɔfis dɛn usay dɛn de sɛn dɛn. Na lɛk 12,333 pipul dɛn bin atɛnd di program. Sɔm pan di wan dɛn we bin atɛnd di program bin rili de na Patasin, Nyu Yɔk usay dɛn mek di program ɛn sɔm ɔda wan dɛn we de na Kanada, Jameyka, Poto Riko, ɛn Amɛrika bin ebul fɔ wach di program in vidio.

Samiɛl Ad, we na wan pan di Gɔvnin Bɔdi mɛmba dɛn fɔ Jiova Witnɛs dɛn, na in na bin di chiaman fɔ di program. We i bigin in tɔk, i bin tɔk mɔ bɔt aw di we aw Jiova de tink ay pas di we aw wi de tink. (Ayzaya 55:​8, 9) I bin tɔk se pan ɔl we di Giliad studɛnt dɛn dɔn spɛn fayv mɔnt fɔ lan bɔt di we aw Gɔd de tink, i se dɛn jɔs dɔn krach, “lilibit pan di tin dɛn we [Gɔd] de du.” (Job 26:14) Brɔda Ad bin tɔk bak se wi kin bɛnifit ɛnitɛm we wi tɔk bɔt di we aw Gɔd de tink ɛn di gradyueshɔn program sɛf go bɛnifit wi.

“Gɔd in Spirit Go Mek . . . Una Ebul Bia Trɔbul.” (Lɛta Fɔ Galeshya 5:​22) Jɔn Lasin, wan pan di Branch Kɔmiti mɛmba dɛn na Amɛrika, bin tɔk bɔt tu we dɛn aw wi go ebul fɔ sho se wi de bia trɔbul. Fɔs, wi fɔ peshɛnt wit Jiova as i de tren wi ɛn ɛp wi fɔ gɛt mɔ fet. (1 Pita 5:​10) Ebraam bin sɛt fayn ɛgzampul bay we i peshɛnt as Jiova bin tren am ɛn du wetin i bin dɔn prɔmis am.​—Di Ibru Pipul Dɛn 6:​15.

Sɛkɔn, wi fɔ peshɛnt wit wi wiɛsf. Afta di trenin we una dɔn gɛt na Giliad, una go tink se una fɔ de du ɔltin fayn naw. If ɔl tin nɔ kɔmɔt fayn wantɛm wantɛm, una go de wɔnda se, ‘Wetin du mi?’ Brɔda Lasin bin tɛl dɛn in yon ɛkspiriɛns ɛn gi dɛn op se dɛn kin ebul fɔ bia dɛn prɔblɛm dɛn de bay we dɛn peshɛnt wit dɛnsɛf as Gɔd de tren dɛn.​—Di Ibru Pipul Dɛn 6:​11, 12.

“Una Kɔntinyu fɔ Ɔmbul ɛn Una Liv Lɔŋ!” Antoni Mɔris we na wan pan di Gɔvnin Bɔdi mɛmba dɛn bin pul in tim frɔm Sam 22:26. We dɛn translet da skripchɔ de wɔd fɔ wɔd in kin min “mek yu at de sote go.” Fɔ mek wi go gɛt dis blɛsin wi fɔ ɔmbul. Brɔda Mɔris bin tɔk mɔ fɔ se Jiova nɔ go kɔntinyu fɔ yuz wi if wi nɔ ɔmul. Ilɛksɛf i dɔn te we wi de sav Jiova, wi ɔl kin fɔgɛt se i impɔtant fɔ mek wi falamakata Jizɔs.​—2 Pita 1:9.

Di Baybul gɛt bɔku ɛgzampul dɛn bɔt pipul dɛn we bin ɔmbul ɛn pipul dɛn we nɔ bin ɔmbul. Ɛrɔd Agripa bin fil gud we dɛn prez am ɛn gi am di glori we dɛn fɔ gi Gɔd, ɛn Gɔd in enjɛl bin mek “wɔrɔm it in bɔdi.” (Akt 12:21-​23) Bɔt afta Jizɔs bin tɛl Pita se yu “nɔ de tink di we aw Gɔd de tink, yu de tink aw mɔtalman de tink,” Pita nɔ bin vɛks. (Matyu 16:21-​23) I bin gri fɔ tek di kɔrɛkshɔn ɛn i bin ɔmbul.​—1 Pita 5:5.

Sɔm studɛnt dɛn gɛt fɔ go wok na Bɛtɛl na wan pan wi branch ɔfis dɛn ɛn Brɔda Mɔris bin wɔn dɛn se if dɛn nɔ ɔmbul dɛn nɔ go ɛnjɔy dɛn wok. Bɔt i nɔ kin izi fɔ mek pɔsin no se i nɔ ɔmbul. Fɔ mek pipul dɛn ɔndastand wetin i bin de se, i tɛl dɛn bɔt wan ɛlda we dɛn bin advays se i fɔ ɔmbul. I bin tɔk se di ɛlda bin rayt to di branch ɔfis ɛn tɛl dɛn se, “A ɔmbul pas ɔlman we a sabi.” Brɔda Mɔris ɛnkɔrej di studɛnt dɛn nɔ fɔ biev da kayn we de. Dɛn go kɔntinyu fɔ ɔmbul if dɛn avɔyd fɔ tink tumɔs bɔt dɛnsɛf ɛn di pawa we dɛn gɛt, bifo dat dɛn fɔ no no se na Jiova ɛn Jizɔs gɛt ɔl di pawa.

“I De Gi ‘Ɔl di di Pawa we In Spirit De Gi.’” (Jɔn 3:​34) Maykɛl Bɔnɛt, we na wan pan di ticha dɛn na Giliad skul, bin mɛmba di studɛnt dɛn se di oli spirit go ɛp dɛn fɔ bia prɔblɛm dɛn ɔ dawt dɛn we dɛn go gɛt. Gɔd in spirit bin mek Bɛzalɛl ebul fɔ bia di tin dɛn we bin de ambɔg am fɔ bil di tabanakul. (Ɛksodɔs 35:30-​35) Di oli spirit nɔ bin jɔs mek Bɛzalɛl sabi aw fɔ du di wok, bɔt i bin ɛp am fɔ ebul fɔ tich ɔda pipul dɛn. Di oli spirit go du di sem fɔ di wan dɛn we de gradyuet frɔm Giliad mɔ we dɛn de fala di Baybul in tichin we dɛn dɔn lan na klas.

Insay Bɛzalɛl in tɛm, di Izrɛlayt uman dɛnsɛf bin ɛp fɔ bil di tabanakul. (Ɛksodɔs 35:25, 26) Semweso, di sista dɛn we de na di klas dɔn sho se dɛn na uman dɛn we “sabi” du tin as dɛn de sɔpɔt dɛn man dɛn. Brɔda Bɔnɛt bin dɔn in tɔk bay we i advays di studɛnt dɛn se: “As una de du di tin dɛn we una sabi, una fɔ ɔmbul ɛn una fɔ obe. If una du dat, Jiova go gi una ɔl di pawa we in spirit de gi.”

“Yu Go Dans Wit Mi?” Mak Numia, na wan pan di wan dɛn we de ɛp di Tichin Kɔmiti. I pul in tim frɔm Kiŋ Devid in ɛgzampul di tɛm we dɛn bin kam wit di agrimɛnt bɔks na Jerusɛlɛm. (2 Samiɛl 6:​12-​14) Devid bin ɔmbul ɛn i bin gladi fɔ dans wit di “savant gyal dɛn” as dɛn de kam wit di bɔks. (2 Samiɛl 6:​20-​22) Dɛn savant gyal dɛn de nɔ go ɛva fɔgɛt di tɛm we Kiŋ Devid bin dans wit dɛn. Brɔda Numia bin tɛl di studɛnt dɛn fɔ ‘dans wit di savant gyal dɛn.’ I bin aks dɛn se: “Dɛn sabi una as pipul dɛn we de ɛp di wan dɛn we nɔ gɛt bɛtɛ wok fɔ du na di ɔganayzeshɔn? . . . Una valyu ɔda pipul dɛn fɔ di fayn kwaliti dɛn we dɛn gɛt?”

Di wan dɛn we gradyuet go falamakata Jiova if dɛn kɔntinyu fɔ de biɛn am. (Sam 113:​6, 7) Ilɛksɛf pipul dɛn we de arawnd dɛn nɔ sho se dɛn ɔmbul, di studɛnt dɛn nɔ fɔ mek di pafɛkt we dɛn kɔmpin dɛn nɔ pafɛkt, afɛkt dɛn. Brɔda Numia bin tɛl dɛn se: “Nɔ tek yusɛf mek ɛnitin, trit Jiova in ship dɛn di kayn we aw Jiova go trit dɛn.”

“Yuz Ɛni Chans we Yu Gɛt fɔ Prich.” Wiliam Samiɛlsin, we de oba di Tiokratik Skul Dipatmɛnt, bin tɔk bɔt di apɔsul Pɔl as pɔsin we bin de yuz ɛni chans we i gɛt fɔ prich di gud nyus. (Akt 17:17) Brɔda Samiɛlsin bin gayd di studɛnt dɛn as dɛn bin de akt wan ɛkspiriɛns we dɛn bin gɛt we dɛn bin de prich di tɛm we dɛn bin de na Giliad skul. Fɔ ɛgzampul, wan brɔda ɛn in wɛf bin mit wan uman usay dɛn de sɛl it. Dɛn wet te bɛtɛ pipul dɛn nɔ bin de kam igen fɔ kam bay, na in dɛn sho am di fim we nem Wetin Mek I Fayn fɔ Stɔdi di Baybul? Dɛn sho am bak na jw.org, usay i go ebul fɔ fɛn mɔ tin dɛn insay in langwej we na Laotian. Di brɔda ɛn in wɛf bin go bak fɔ ɛp di uman fɔ no mɔ.

“Kɔntinyu fɔ Rɛdi fɔ Du Ɛnitin fɔ di Kiŋdɔm.” Wiliam Nɔnks, we de na di Savis Dipatmɛnt na di Amɛrika branch, bin intavyu 4 studɛnt dɛn we bin de gradyuet. Lɛk wetin Ayzaya 6:8 bin se, dɛn bin dɔn rɛdi dɛnsɛf fɔ du ɛnitin fɔ sɔpɔt di Kiŋdɔm wok. Sista Snolia Maseko bin ɛksplen se Giliad dɔn sho am difrɛn say we i fɔ du mɔ, ɛn fɔ yuz in tɛm di rayt we pan ɔl we i kin dɔn dɔn ɔl in wok dɛn. I bin tɔk se, “Di trenin dɔn mek a de du mɔ pas wetin a bin tink se a ebul fɔ du.” Brɔda Dennis Nielsen bin lan aw wetin de na Zɛfinaya 3:​17 go ɛp am fɔ mek i nɔ fil bad we i de du di prichin wok. Brɔda Nielsen bin se, “If a de na fil savis ɛn bɛtɛ pipul dɛn nɔ lisin, a fɔ mɛmba se Jiova gladi ɛn misɛf fɔ du di sem.”

“Una Luk dɛn Bɔd.” (Matyu 6:​26) Stivin Lɛt wan pan di Gɔvnin Bɔdi mɛmba dɛn na in bin gi di men tɔk na di program. I bin yuz Jizɔs in ɛgzampul bɔt fɔ “luk di bɔd dɛn,” ɔ fɔ tek tɛm luk di bɔd dɛn gud wan ɛn i bin tɔk bɔt difrɛn lɛsin dɛn we dat kin tich wi.​—Job 12:7.

Fɔ ɛgzampul, jɔs lɛk aw Jiova de fid di bɔd dɛn, na so i go kia fɔ wisɛf. Wisɛf na Gɔd “in yon,” ɛn i dɔn tɛl wi se i go “kia fɔ di wan dɛn we de na in famili.” (1 Timoti 3:​15; 5:8) Wisɛf fɔ du wi pat. Jɔs lɛk aw di bɔd dɛn de fɛn di it we Gɔd de gi, wisɛf fɔ “kɔntinyu fɔ put di Kiŋdɔm fɔs” fɔ mek i go blɛs wi.​—Matyu 6:​33.

Brɔda Lɛt bin tɔk bak se bɔku bɔd dɛn kin mek sawnd we dɛn no se denja de. Semweso, wi de wɔn ɔda pipul dɛn, fɔ ɛgzampul, we brɔda “de du bad tin.” (Lɛta Fɔ Galeshya 6:1) Ɛn di prichin wok we wi de du de ɛp fɔ wɔn pipul dɛn bɔt Jiova in “big de.” (Zɛfinaya 1:​14) Insay wan ɔda ɛgzampul, Brɔda Lɛt bin ɛksplen bak se jɔs lɛk aw bɔd dɛn kin travul go ɔdasay ɛn dɛn kin flay oba ay mawnten dɛn, na so Jiova kin ɛp wisɛf fɔ bia wit prɔblɛm dɛn we wi kin gɛt.​—Matyu 17:20.

Fɔ dɔn di Program. Afta di studɛnt dɛn dɔn gɛt dɛn diploma, wan pan dɛn bin rid lɛta we di klas bin rayt fɔ tɛl tɛnki. Brɔda Ad bin dɔn di tɔk bay we i kɔmpia di we aw wi de kam fɔ tink di we aw Jiova di tink, to we pɔsin de nel dɛn big big nel dɛn na relwe. Yu go rili nid fɔ nak di ama at wan pan di nel fɔ mek i go ol fayn. Semweso, di wan dɛn we dɔn gradyuet fɔ kɔntinyu fɔ du di tin dɛn we dɛn dɔn lan na Giliad. Brɔda Ad bin tɛl dɛn se, “Una tek tɛm fɔ nak am go dɔŋ una at gud gud wan.” Dɔn i tɔk bak se, “Una fala di we aw Gɔd de tink, ɛn i go blɛs una.”