Di Giliad klas we mek 138 bin gradyuet Mach 14, 2015, na di say usay Jiova Witnɛs dɛn kin ol dɛn skul dɛn na Patasin insay Nyu Yɔk. I pas lɛk 14,000 pipul dɛn we bin atɛnd di program. Sɔm pan di wan dɛn we bin atɛnd bin rili de usay di program bin de apin ɛn dɛn bin kɔnɛkt sɔm ɔda wan dɛn we bin de wach di program na skrin usay dɛn de. Di program bin bigin wit 4 pan di nyu Kiŋdɔm siŋ dɛn ɛn leta ɔl di wan dɛn we bin atɛnd di program bin siŋ dɛn. *

Brɔda Jɛfri Jaksin, we na wan pan di Gɔvni Bɔdi mɛmba dɛn fɔ Jiova Witnɛs dɛn, na in na bin di chiaman fɔ di program. We i bigin fɔ tɔk, i bin ɛnkɔrej di studɛnt dɛn nɔ fɔ kip wetin dɛn dɔn lan to dɛnsɛf bɔt dɛn fɔ yuz di trenin we dɛn dɔn gɛt fɔ ɛp ɔda pipul dɛn.​—Sɛkɛn Lɛta To Timoti 2:⁠2.

Brɔda Jaksin bin tɔk bɔt di ɛgzampul we Mozis bin sɛt. Fɔ sɔm tɛm, di tɛnt we Mozis bin de yuz, na de di Izrɛlayt dɛn bin de go fɔ wɔship. Bɔt we dɛn dɔn fɔ bil di tabanakul, na di tabanakul kam fɔ bi di say we di Izrɛlayt dɛn bin de go fɔ wɔship Gɔd di rayt we. Mozis nɔ bin gɛt rayt fɔ go na di say we oli pas ɔl insay di tabanakul; na di ay prist nɔmɔ bin gɛt da rayt de. Natin nɔ de we sho se Mozis bin grɔmbul fɔ dat. Bifo dat, i kɔntinyu fɔ sɔpɔt Erɔn fɔ du in nyu wok as ay prist. (Ɛksodɔs 33:​7-​11; 40:​34, 35) Wetin na di lɛsin we wi lan frɔm dis? Brɔda Jaksin bin se: “Valyu ɛni wok we yu gɛt, bɔt nɔ kip am to yusɛf.”

“Yu Go Fred we Yu Yɛri Dray Lif in Sawnd?” Na Brɔda Kɛnɛt Flodin we na wan pan di wan dɛn we de ɛp di Tichin Kɔmiti fɔ di Gɔvnin Bɔdi, bin gi dis tɔk. I bin gri se di studɛnt dɛn go gɛt prɔblɛm dɛn we go mek dɛn fred, prɔblɛm dɛn lɛk we pipul dɛn go mek dɛn sɔfa ɔ we dɛn go go na say we nɔ izi fɔ dɛn. I yuz sɔm wɔd dɛn frɔm Lɛvitikɔs 26:​36, fɔ ɛnkɔrej di studɛnt dɛn fɔ no se natin nɔ de we go mit dɛn we dɛn nɔ go ebul fɔ bia, bɔt di tin dɛn we go apin to dɛn go jɔs tan lɛk lif we dɔn dray. Brɔda Flodin bin tɔk bɔt aw di apɔsul Pɔl bin ebul fɔ bia plɛnti prɔblɛm dɛn bikɔs i bin abop pan Jiova.​—Sɛkɛn Lɛta Fɔ Kɔrint 1:​8, 10.

“Wetin Yu De Luk Fɔ?” Brɔda Mak Sandasin, we na wan pan di Gɔvnin Bɔdi mɛmba dɛn, na in bin gi di nɛks tɔk na di program. I bin tɔk bɔt di advays we de na Prɔvabs 13:​12 we se: “Drɛg fut pan prɔmis de gi brok at.” I sɔri fɔ no se, bɔku pipul dɛn at pwɛl bikɔs dɛn nɔ kin ebul fɔ du di tin dɛn we dɛn bin dɔn plan fɔ du lɛk fɔ gɛt bɔku mɔni ɔ fɔ lɛ bɔku pipul dɛn sabi dɛn.

Insay Jizɔs in tɛm, sɔm pipul dɛn bin tek Jɔn we de baptayz pipul dɛn fɔ udat i nɔ bi. (Lyuk 7:​24-​28) Fɔ ɛgzampul, dɛn bin de op se i fɔ bi masta sabi bukman we go de tɔk big big wɔd dɛn we nɔ izi fɔ ɔndastand we i de tich dɛn. If na so i bi, dɛn at go dɔn pwɛl, bikɔs Jɔn bin de rili tich tin we na tru. Ɔda wan dɛn go dɔn luk fɔ sɔm kayn pɔsh pɔsin we de drɛs lɛk jɛntriman. Bɔt na klos we po pipul dɛn bin de wɛr na in Jɔn insɛf bin de wɛr. Bɔt di wan dɛn we bin de luk fɔ prɔfɛt, nɔ go gɛt pwɛl at bikɔs Jɔn nɔto bin jɔs prɔfɛt bɔt na in bin kam bifo fɔ anawns se di Mɛsaya de kam!​—Jɔn 1:⁠29.

We Brɔda Sandasin bin de tɔk bɔt di lɛsin frɔm in tɔk, i bin ɛnkɔrej di studɛnt dɛn fɔ luk fɔ di rayt tin. Dɛn nɔ fɔ tink se na dɛn fɔ de bifo pan ɔltin ɔ de tink se dɛn fɔ de trit dɛn fayn pas ɔda pipul dɛn, bifo dat, dɛn fɔ pe atɛnshɔn mɔ fɔ yuz wetin dɛn dɔn lan fɔ bɛnifit ɔda pipul dɛn. Dɛn kin du dis bay we dɛn tɛl ɔda pipul dɛn wetin dɛn dɔn lan na Giliad, bay we dɛn ɛp brɔda ɛn sista dɛn fɔ gɛt mɔ fet, ɛn bay we dɛn lɛk dɛnsɛf. Brɔda Sandasin bin tɔk bak se: “Una fɛn we fɔ put unasɛf dɔŋ to una brɔda ɛn sista dɛn, una du ɔl wetin una ebul fɔ du wetin Jiova want ɛn una at nɔ go pwɛl.”

“Ɛnkɔrej Ɔda Pipul dɛn.” Dis na bin di tim fɔ di tɔk we Brɔda Jems Katin we na wan pan di ticha dɛn na di Tiokratik Skul Dipatmɛnt, bin gi. Brɔda Katin bin tɔk bɔt aw ɔlman want mek pipul dɛn lɛk dɛn, sho se dɛn gladi fɔ wetin dɛn de du, ɛn notis dɛn. Jizɔs insɛf bin want dat, ɛn Jiova bin du dat fɔ Jizɔs bay we i tɔk fayn tin dɛn bɔt am di tɛm we i bin de baptayz.​—Matyu 3:​16, 17.

Jiova dɔn gi wi di pawa fɔ ɛnkɔrej ɛn ɛp ɔda pipul dɛn wit wetin wi de tɔk, ɛn i want wi fɔ yuz di pawa we i dɔn gi wi. (Prɔvabs 3:​27) Brɔda Katin bin ɛnkɔrej di studɛnt dɛn se: “Una tren unasɛf fɔ luk fɔ di gud tin dɛn we ɔda pipul dɛn de du ɛn una nɔ fred fɔ tɛl dɛn tɛnki fɔ wetin dɛn dɔn du.” We wi tɛl wi brɔda ɛn sista dɛn tɛnki frɔm wi at fɔ wetin dɛn de du, dat go ɛp dɛn fɔ no se wetin dɛn de du rili impɔtant.

“Una Du Ɔl Wetin Una Ebul fɔ Ɛp Ɔda Pipul Dɛn.” Brɔda Mak Numia we na wan pan di wan dɛn we de ɛp di Tichin Kɔmiti na in bin gi di nɛks tɔk na di program. Brɔda Numia bin yuz di apɔsul Pɔl in ɛgzampul fɔ ɛnkɔrej di studɛnt dɛn fɔ se dɛn nɔ fɔ jɔs fil se i du so fɔ jɔs du smɔl tin we dɛn fɔ du. Bɔt lɛk Pɔl, dɛn go rili gladi if dɛn du ɔl wetin dɛn ebul fɔ ɛp ɔda pipul dɛn ɔltɛm.​—Lɛta Fɔ Filipay 2:​17, 18.

Pan ɔl we Pɔl bin de gɛt tin dɛn we de mɔna am, i nɔ bin giv ɔp. Bikɔs Pɔl bin kɔntinyu fɔ wok tranga wan te to di tɛm we i bin de day, i bin du ɔl wetin i ebul fɔ ɛp ɔda pipul dɛn. Dat bin mek i ebul fɔ tɔk tru tru wan se: “Di rɔn we a bin de rɔn fɔ mi Masta dɔn dɔn, a dɔn rich di say we a fɔ tap.” (Sɛkɛn Lɛta To Timoti 4:​6, 7) Brɔda Numia bin ɛnkɔrej di studɛnt dɛn fɔ falamakata Pɔl bay we dɛn kɔntinyu fɔ sɔpɔt di Kiŋdɔm wok ɔltɛm na di say we dɛn go sɛn dɛn.

Ɛkspiriɛns Dɛn. Brɔda Maykɛl Bɔnɛt we na wan pan di ticha dɛn na Giliad Skul na in bin du di nɛks pat na di program usay di studɛnt dɛn bin de akt sɔm ɛkspiriɛns dɛn we dɛn bin gɛt na fil savis we dɛn bin de na Patasin.

Bɔku tɛm, di studɛnt dɛn bin gɛt gud rizɔlt bay we dɛn de luk fɔ ɛni chans fɔ prich ɛn bay we dɛn de tray fɔ tich di tru tin dɛn na di langwej we di pipul dɛn rili de ɔndastand. Fɔ ɛgzampul wan studɛnt bin tɔk se bɔku pipul dɛn we de tɔk Spanish bin de na di say usay i bin plan fɔ prich. So wan de bifo i go prich i bin yuz di JW Language ap fɔ lan sɔm wɔd dɛn na Spanish. Da sem de de, i bin mit wan man na strit we de tɔk Spanish. Di studɛnt bin yuz di smɔl Spanish we i bin dɔn lan fɔ tɔk to di man ɛn dat bin mek di man ɛn 4 pan in fambul dɛn bigin stɔdi di Baybul.

Intavyu Dɛn. Afta dat Brɔda Wiliam Tɔna, Jinyɔ we na wan pan di wan dɛn we de ɛp di Savis Kɔmiti fɔ di Gɔvnin Bɔdi bin intavyu 4 studɛnt dɛn bɔt dɛn ɛkspiriɛns bifo dɛn kam Giliad Skul ɛn di trenin we dɛn dɔn gɛt frɔm di skul.

Di studɛnt dɛn tɔk bɔt sɔm tin dɛn we dɛn lan na di skul we bin ɛnkɔrej dɛn. Fɔ ɛgzampul, wan studɛnt bin tɔk bɔt wetin i dɔn lan frɔm Lyuk chapta 10. Di 70 disaypul dɛn we Jizɔs bin sɛn bin gladi we tin bin kɔmɔt fayn fɔ dɛn we dɛn bin go prich. Pan ɔl we Jizɔs insɛf bin gladi, i tɛl in disaypul dɛn fɔ lɛ dɛn nɔ jɔs gladi bikɔs tin kɔmɔt fayn fɔ dɛn bɔt dɛn fɔ gladi bikɔs Jiova rili lɛk wetin dɛn de du. Dis de mɛmba wi se di tin dɛn we de apin to wi nɔto in kin mek wi gɛt tru tru gladi at bɔt wi go gɛt tru tru gladi at we wi no se Jiova rili lɛk wetin wi de du.

Brɔda Tɔna bin yuz di wɔd dɛn we de na Lɛta Fɔ Filipay 1:​6 fɔ ɛnkɔrej di studɛnt dɛn fɔ se Jiova dɔn “bigin du dis gud wok” insay dɛn at ɛn i go kɔntinyu fɔ de wit dɛn.

“Put Yu Yay pan Jiova.” Brɔda Samiɛl Ad, we na wan pan di Gɔvnin Bɔdi mɛmba dɛn, na in bin gi di men tɔk na di program. I bin gri se wi nɔ de si Jiova wit wi ɔdinari yay. Bɔt aw i go pɔsibul fɔ mek wi put wi yay pan am?

Wan we wi go si Jiova na bay we wi de tek tɛm luk di tin dɛn we i dɔn mek, we de tich wi bɔt am. Apat frɔm dat, Jiova dɔn “opin [wi] at.” (Lɛta Fɔ Ɛfisɔs 1:​18) Di mɔ wi de rid di Baybul na di mɔ wi de lan bɔt Jiova. Ɛn di mɔ wi de lan bɔt Jiova na di mɔ wi de go nia am.

Wi fɔ rili pe atɛnshɔn to wetin de na Matyu, Mak, Lyuk, ɛn Jɔn bikɔs dɛn Baybul buk dɛn de de ɛp wi fɔ no Jiova klia wan bikɔs dɛn sem buk dɛn de tɔk bɔt di tin dɛn we in Pikin bin de se ɛn du. Jizɔs bin rili fiba Jiova ɛn dat bin mek i tɔk se: “Ɛnibɔdi we dɔn si mi, dɔn si mi Papa.”​—Jɔn 14:⁠9.

Brɔda Ad bin ɛnkɔrej di wan dɛn we bin atɛnd di program fɔ se dɛn nɔ fɔ jɔs si Jiova pan di ɛgzampul we Jizɔs sɛt, bɔt dɛn fɔ falamakata wetin dɛn si. Fɔ ɛgzampul, jɔs lɛk aw Jizɔs bin de du ɔl wetin i ebul fɔ ɛp ɔda pipul dɛn, wisɛf want fɔ wok tranga wan fɔ tɛl ɔda pipul dɛn wetin wi dɔn lan bɔt Gɔd.

Us bɛnifit wi go gɛt if wi put wi yay pan Jiova? Wi go gɛt di sem kɔnfidɛns we wan pan di man dɛn we rayt di Sam buk bin rayt we i se: “A de mɛmba se PAPA GƆD de wit mi ɔltɛm ɛn bikɔs i de wit mi, a nɔ de fred natin.”​—Sam 16:⁠8.

Fɔ Dɔn di Program. Afta di studɛnt dɛn dɔn gɛt dɛn diploma dɛn, wan pan di wan dɛn we gradyuet bin rid wan fayn lɛta we di klas bin rayt fɔ tɛl tɛnki. Dɔn Brɔda Jaksin dɔn di program bay we i tɛl di studɛnt dɛn se dɛn nɔ fɔ fil lɛk se ɔl wetin dɛn fɔ tich fɔ bi nyu tin dɛn ɔ tin dɛn we at fɔ ɔndastand. Bɔt di men tin we dɛn fɔ de du na fɔ de mɛmba dɛn brɔda ɛn sista dɛn bɔt di tin dɛn we dɛn ɔlrɛdi sabi. Brɔda Jaksin bin tɔk bak se dɛn rili nid fɔ put dɛnsɛf dɔŋ. Di wan dɛn we gradyuet fɔ pe atɛnshɔn to di Baybul ɛn to di buk ɛn magazin dɛn we di ɔganayzeshɔn mek fɔ wi. Dɛn nɔ fɔ du tin we go mek ɔda pipul dɛn notis dɛn ɔ di trenin we dɛn dɔn gɛt na Giliad. So bifo dɛn mek di wan dɛn we nɔ go ɛva gɛt di chans fɔ go Giliad dɛn at pwɛl, di wan dɛn we gradyuet fɔ ɛnkɔrej dɛn kɔmpin Kristian dɛn bay we dɛn de ɛp dɛn fɔ bɛnifit frɔm di ɔda tin dɛn we dɛn go ebul fɔ lan frɔm Jiova in ɔganayzeshɔn. Ɔl di wan dɛn we bin atɛnd di program bin fil fayn ɛn rɛdi fɔ du ɔl wetin dɛn ebul fɔ du fɔ dɛn brɔda ɛn sista dɛn.