We wan sista bin lisin to wan impɔtant lɛta we Brɔda Stivin Lɛt we na wan pan di Gɔvnin Bɔdi fɔ Jiova Witnɛs Dɛn, di sista bin tɔk se, “Wi fil lɛk se dɛn was wi wit lɔv!” Dis sista na bin wan pan di 165,000 Jiova Witnɛs dɛn we bin yɛri Brɔda Lɛt in tɔk di tɛm we i bin kam fɛn dɛn Me 10 ɛn 11, 2014.

Dɛn bin translet di tɔk dɛn ɛn di lɛta insay fayv langwej dɛn ɛn sɛn am to lɛk 700 Kiŋdɔm Ɔl dɛn na Yukren.

Da sem wikɛnd de, Brɔda Mak Sandasin we insɛf na wan pan di Gɔvnin Bɔdi mɛmba dɛn, bin rid di lɛta pan di program we bin de na Rɔshia fɔ di brɔda dɛn. Dɛn translet di program insay 14 langwej dɛn ɛn lɛk 180,413 pipul dɛn we de na lɛk 2,500 kɔngrigeshɔn dɛn na Bɛlarɔs ɛn Rɔshia bin wach di program.

Di Gɔvnin Bɔdi bin rayt di lɛta fɔ ɔl di kɔngrigeshɔn dɛn we de na Rɔshia ɛn Yukren. Brɔda Sandasin rid am insay Rɔshian ɛn dat bin mek di Rɔshia branch ɔfis bin rayt se: “Di brɔda ɛn sista dɛn rili gladi fɔ we di Gɔvnin Bɔdi bisin bɔt dɛn. Wi ɔl fil lɛk se di Gɔvnin Bɔdi ɔg wi.”

Di men rizin we mek dɛn rayt di lɛta na fɔ mek dɛn ɛnkɔrj di brɔda dɛn bikɔs pɔlitiks prɔblɛm bin de usay dɛn de. Dɛn ɛnkɔrej di brɔda dɛn fɔ mek “dɛn nɔ si di we aw pipul dɛn na di wɔl de si.”—Jɔn 17:16.

So di Gɔvnin Bɔdi bin ɛnkɔrej di brɔda dɛn fɔ kɔntinyu fɔ gɛt tayt padi biznɛs wi Jiova bay we dɛn de pre, stɔdi, ɛn tink gud wan bɔt wetin dɛn de stɔdi na Gɔd in Wɔd. Dɛn mɛmba di ɔdiɛns fɔ se ilɛk uskayn prɔblɛm go kam dɛn we, dɛn fɔ biliv di prɔmis we de na Ayzaya 54:17 we se: “Nɔn wɛpɔn we dɛn mek fɔ kil yu, nɔ go wok.”

Di Gɔvnin Bɔdi bin dɔn di lɛta bay we dɛn se: “Wi rili lɛk una ɔl. Duya una mɛmba se wi de tink bɔt una ɔltɛm ɛn wi de pre to Jiova fɔ una.”

Di brɔda dɛn we de na Jiova Witnɛs dɛn branch ɔfis na Yukren bin rayt se: “Di brɔda dɛn rili gladi fɔ we di Gɔvnin Bɔdi pe atɛnshɔn dɛn. We Brɔda Lɛt ɛn Brɔda Sandasin kam na Yukren ɛn Rɔshia di sem wikɛnd, dat jɔs de sho di wanwɔd we Gɔd in pipul dɛn gɛt ɛn i sho bak se Jiova ɛn Jizɔs bisin bɔt dɛn. Wi ɔl gri se dɛn kam fɛn wi di rayt tɛm, ɛn dɛn rili ɛnkɔrej wi fɔ kɔntinyu fɔ sav Jiova ilɛk uskayn prɔblɛm kam wi we.”