Insay Julay 2013, di Gɔvnin Bɔdi fɔ Jiova Witnɛs dɛn bin rayt wan fayn lɛta to di mishɔnari dɛn ɛn pipul dɛn we de yuz ɔl dɛn tɛm fɔ prich di gud nyus na ɔda kɔntri dɛn. Di Lɛta bin tɔk bɔt wan arenjmɛnt we dɛn dɔn mek fɔ ɛp di wan dɛn we de yuz ɔl dɛn tɛm fɔ prich di gud nyus na ɔda kɔntri fɔ travul ɛn go atɛnd di kɔnvɛnshɔn we dɛn bin gɛt insay 2014 ɛn we 2015 jɔs bigin.

Di rizin fɔ da arenjmɛnt de nɔto fɔ jɔs ɛp di wan dɛn we de yuz ɔl dɛn tɛm fɔ prich di gud nyus na ɔda kɔntri dɛn fɔ go kɔnvɛnshɔn bɔt na fɔ mek dɛn go ebul fɔ spɛn tɛm wit dɛn fambul dɛn ɔ padi dɛn. Di lɛta se di ɔganayzeshɔn go bay tikɛt fɔ dɛn fɔ go ɛn kam.

Pan ɔl we dɛn bin de mek dɛn kayn arenjmɛnt dɛn ya trade, di arenjmɛnt fɔ dis ia go difrɛn. Di Tichin Kɔmiti fɔ di Gɔvnin Bɔdi bin gri fɔ mek wan nyu dipatmɛnt we na Wɔl Ɛdkwata Travul ɛn na dɛn go mek di arenjmɛnt dɛn fɔ travul.

Jɔs afta we dɛn sɛn di lɛta dɛn, pipul dɛn bigin aks fɔ tikɛt dɛn na di Wɔl Ɛdkwata Travul dipatmɛnt. Insay Janwari 2014, bɔku pipul dɛn bigin aks fɔ tikɛt dɛn.

Di wan dɛn we de mek di arenjmɛnt fɔ travul bin tray fɔ nɔ mɔ bɔt aw di wan dɛn we de yuz ɔl dɛn tɛm go ebul go na di kɔntri dɛn we dɛn dɔn bay tikɛt fɔ. Afta dat dɛn arenj aw dɛn go travul fɔ go na dɛn kɔntri dɛn ya.

Sɔm pan di arenjmɛnt dɛn nɔ bin izi. Di wan dɛn we bin kɔmɔt frɔm Reykjavík, Aysland, bin gɛt fɔ go na Cochabamba, insay Bolivia. Ɔda wan dɛn we bin kɔmɔt frɔm Nouméa, insay Nyu Kalidonia bin nid fɔ travul go Antananarivo, insay Madagaska. Sɔm dɛn we kɔmɔt frɔm Port Moresby, insay Papwa Nyu Gini bin go na Seattle, Washington, insay Amɛrika, ɛn ɔda wan dɛn we kɔmɔt frɔm Ouagadougou, insay Bukina Faso, fɔ go na Winnipeg, insay Kanada.

Di fayv pipul dɛn we de na di Wɔl Ɛdkwata Travul dipatmɛnt bin buk lɛk 19,000 flayt dɛn. Na di mɔni we brɔda ɛn sista dɛn gi na in dɛn yuz fɔ bay ɛn sɛn tikɛt dɛn to lɛk 4,300 pipul dɛn we de na 176 kɔntri dɛn.

Di wan dɛn we bin bɛnifit frɔm dis arenjmɛnt bin rili gladi. Wan brɔda ɛn in wɛf we na mishɔnari bin tɔk se: “Tide wi de go bak na Sawtist pat na Eshia usay dɛn bin sɛn wi fɔ go prich. Wi rili de tɛl una tɛnki fɔ we una ɛp wi fɔ go bak na Ingland, usay wi bɔn fɔ go de wit wi fambul dɛn afta fayv ia. If una nɔ bin ɛp wi, wi nɔ bin fɔ ɛva ebul fɔ go bak. So wi rili gladi fɔ tɛl tɛnki to ɔl di wan we mek dat pɔsibul.”

Wan mishɔnari we de prich na Paregwa bin tɔk se: “Mi ɛn mi wɛf want fɔ tɛl tɛnki fɔ di chans we wi gɛt fɔ atɛnd di kɔnvɛnshɔn na New Jersey, insay Amɛrika. We 2011 jɔs bigin, wi bin dɔn plan se wi go travul go na Amɛrika fɔ go si di Wɔl Ɛdkwata. Wi bin dɔn kip sɔm mɔni fɔ dat. Bɔt insay Jun, da sem ia de dɛn bin invayt wi fɔ go fɛn di sayn-langwej kɔngrigeshɔn we de na Paregwa. Dis bin mek wi gɛt fɔ travul bɔku. Afta sɔm tɛm we wi dɔn tink gud wan, wi bin disayd nɔ fɔ go na Amɛrika igen bifo dat wi go yuz di mɔni fɔ bay motoka so dat wi go ebul fɔ du mɔ na di nyu say we dɛn sɛn wi fɔ prich. Na dat tɛm de wi gɛt di inviteshɔn fɔ atɛnd di intanashɔnal kɔnvɛnshɔn. So wetin wi bin dɔn plan bin apin! Wi rili tɛl Jiova tɛnki fɔ ɔl di gud tin dɛn we i dɔn du fɔ wi ɛn di lɛk we i sho se i lɛk wi.”

Wan maredman ɛn in wɛf we kɔmɔt na Malawi bin rayt se: “Wi jɔs want fɔ imel una fɔ tɛl una bɔku bɔku tɛnki! Wi nɔ go rili ebul fɔ imajin ɔmɔs tɛm, mɔni ɛn di kayn bɔku wok we una bin gɛt fɔ du fɔ ebul fɔ kia fɔ mek bɔku pipul dɛn travul. Wi rili gladi fɔ di wok we una wok tranga wan ɛn apat frɔm dat, di gud tin dɛn we Jiova in ɔganayzeshɔn dɔn du fɔ wi bay we i mek am pɔsibul fɔ mek wi travul fɔ go atɛnd di intanashɔnal kɔnvɛnshɔn ɛn fɔ spɛn tɛm wit wi fambul dɛn ɛn wi padi dɛn.”

Di wan dɛn we de wok na di Wɔl Ɛdkwata Travul dipatmɛnt bin lɛk di wok we dɛn de du. Wan sista we nem Malyevi bin tɔk se: “Na bin spɛshal tin fɔ ɛp di mishɔnari dɛn fɔ go bak usay dɛn kɔmɔt fɔ go si dɛn fambul dɛn ɛn dɛn padi dɛn.” Dɔrays bin tɔk se: “I bin ɛp mi fɔ rili gladi fɔ di kayn lɔv we di ɔganayzeshɔn gɛt fɔ di wan dɛn we de yuz ɔl dɛn tɛm fɔ prich na ɔda kɔntri.” Ɛn Rɔdni we na bin di ovasia fɔ di dipatmɛnt bin tɔk se: “A bin rili gladi fɔ ɛp fɔ du dis wok.”