Satide, Ɔktoba 5, 2013, na 257,294 pipul dɛn we de na 21 difrɛn kɔntri dɛn bin atɛnd di mitin we di Watch Tower Bible and Tract Society of Pennsylvania kin gɛt wan tɛm pan ia. Sɔm pan dɛn pipul ya bin rili de na di ples fɔ di program ɛn sɔm dɛn bin wach di program bay wɛbkast. Leta da sem wikɛnd de, ɔda Jiova Witnɛs dɛn bin ebul fɔ wach di program bak. Na 1,413,676 pipul dɛn we de na 31 kɔntri dɛn bin ebul fɔ wach di program. Di wan dɛn we bin ebul fɔ atɛnd ɛn wach di program fɔ di mitin dis ia bin pas di 1,327,704 pipul dɛn we bin atɛnd di spɛshal program we dɛn bin gɛt Epril 28, 2013 na Mɛksiko ɛn Sɛntral Amɛrika.

Frɔm dɛn 1920, Jiova Witnɛs dɛn dɔn de yuz tɛlifon layn dɛn ɛn redio program dɛn fɔ mek bɔku pipul dɛn no bɔt dɛn kɔnvɛnshɔn dɛn. Naw, Intanɛt tɛknɔlɔji dɔn mek pipul dɛn we de fa frɔm di siti, dɛnsɛf kin ebul fɔ si ɔ yɛri di program as i de apin ɔ shɔt tɛm afta di program dɔn apin. Wiliam na Jiova Witnɛs we de na Amɛrika. I bin atɛnd wan kɔnvɛnshɔn na Richmɔn, Vajinia insay 1942 ɛn i lisin to di program bay tɛlifon. We i kɔmpia wetin bin apin da ia de wit di we aw dɛn sho di program fɔ di mitin we dɛn kin gɛt wan tɛm pan ia, i bin tɔk se: “Yu de ɛnjɔy di program mɔ we yu de si am. Yu nɔ go kɔmpia am to ɔda tin.”

Fɔ lɛk wan ia, brɔda ɛn sista dɛn we de na difrɛn difrɛn branch ɔfis dɛn dɔn spɛn bɔku tɛm fɔ gɛt wɛbkast. Di wikɛnd we dɛn fɔ sho di wɛbkast, tɛknishian dɛn bin de na di kɔntrol sɛnta na Bruklin, Nyu Yɔk ol de ɛn nɛt bikɔs dɛn bin gɛt fɔ sho di program na say dɛn we gɛt 15 difrɛn taym dɛn we nɔ to di sem. Rayan, na wan pan di wan dɛn we bin ɛp we dɛn de mek di wɛbkast ɛn we dɛn de sho di program ol de ɛn nɛt. I bin tɔk se, “Wi nɔ bin ebul fɔ slip bɔt we wi no se bɔku pipul dɛn de bɛnift frɔm di program, dat bin mek wi fil fayn.”