Seiyaa Chɛhowaa soliŋ niŋ Baabuila bɔɔbɔɔ waŋnda hivi laŋ kpeku le Diom Mɛlɛkaa pɛɛkoo. Kɛ, te o wa pɛ mi Baabui nda veelu aa, New World Translation of the Holy Scriptures wo wa o suɛi nɛi maŋgalɛi niŋ, ndu naŋ hiou yeema. Le yɛɛ? Le mɛɛ o nɔ diola Mɛlɛkalaŋ leniŋ yɛ. O nɔ biondɔŋ te, nduyɛ o cho vɛlɛ nyɛkɛndɛ walaŋ.

•   O Nɔ Diola Mɛlɛkalaŋ. Wanaa hivi Baabuiyo wa apum kɛɛ le Wana nɔ Baabuiyo wo bɛɛleŋ kioo. Le tamaseliiyo, o Baabuiyo opum niŋ, ma poonyiaa diola wanaa toolu le ndu hivioo wa leniŋ hiouwɔɔ ŋwaŋ 70. Kɛ pɛ pɛ bɛɛ Baabuiyo hoo pel diola Chɛhowa Mɛlɛkalaŋ te, Mɛlɛka vem waŋnda le Baabuiyo poonyiaa wo!

   Kɛ o baa opilɔɔ choo, o cho lende le New World Translation cho le. Baabuiyo hoo nɔ diola Mɛlɛkalaŋ leniŋ o waalaŋ niŋ. Fonda o fonda diola Mɛlɛkalaŋ la cho o yaula masindɛla nda poonyiaa Baabuiyo laŋ niŋ, ma miŋgi laŋ poonyiaa kpou. Kɛ, pɛ pɛ bɛɛ wanaa soli ndu wa poonyiaa diola ndalaŋ leniŋ te.

•  O Nɔ Biondɔŋ Te. O cho Baabuilaŋ kpou le la hivi yooŋgu kpeekpei cho o Baabuiyo niŋndo nyɛkɛndɛi le. Le tamaseliiyo, o Baabuiyo opum niŋ, ma hivi Maatiu 7:​13 aa: “La keeku o dio sɔɔkɛnyɛɛ wo. Kanifuule, dioo le luɛiyɔɔ o yiŋndeŋ niŋ, o tuaŋgaa o cho ni. Nduyɛ nɛi kuɛi loŋ ndo o kindu lakɔ le.” Kɛ diom kpeekpei yaula masindɛlaŋ la soliŋ kpeku wo cho “tambei” ni, o cho “yiŋndeŋ” te. Kɛlɛŋgaa wanaa hivi Baabuiyo hoo wa wou “yiŋndeŋ” ni, kanifuule a laalaŋ maa wanaa yɔɔŋ wɔɔŋnda cho wa saŋgaa o yiŋndeŋ niŋ lefafɛɛŋ. Kɛ, Baabuiyo toolu pɛɛku waa naa kposoŋ te. Lelaŋ, New World Translation binduŋ te. Mbo hivi fondaa hoo aa: “La keeku o dio sɔɔkɛnyɛɛ wo, kanifuule dio yaa wana o tambei niŋndo cho o bɛndu, nduyɛ nɛi ndɔɔ cho o tuaŋgaa.”

•  O Cho Walaŋ. Te a chaa pɛ nyɔɔ hivi, o cho ko biondɔŋndo le o kɛɛ nɔɔ le, kɛ mɛɛ mbo wa vɛlɛ walaŋ, mi waŋnda bii ndu bila chɔ chɔ. Nuawɔ tamaseliiyo. O Luomaŋnda 12:​11, mi kiilanɔɔ Pɔɔl dimi suɛi pum. Te wana hivi pɛ nyɛ o dimi koŋ ndo mɛɛ o cho o Kilikiiye niŋ yɛ, o sim le “nyinaa ŋolɔɔ.” Wana kue le nyɛ Pɔɔl dimi hoo wo bila biyɔɔ le. Le hei, New World Translation hivi ndu mɛɛ waŋnda nɔla ma bii ndu bila yɛ. O dimi maa Kilisiɔŋnda nɔ ma “chɛl mi nyina Mɛlɛkaa tosa ma nɔ dialuŋ fulaŋ.”

 O fulawɔ o diola Mɛlɛkala cho leniŋ ndaŋ kɔɔli, biondɔŋ o nɔ le wo, a mɛɛ o cho walaŋ yɛ, New World Translation cho vɛlɛ teŋgeŋ o nɛi cheleŋ niŋ. Ndu cho ni, a pisi ikani le ndu sɔla le. Le hei, waŋnda o miiliɔŋndaŋ niŋ nɔla hau ma veelu diomndaŋ o Baabuiyo niŋ o suɛi ndɛi maŋgalɛi niŋ. Wanaa tiuba le Baabuiyo piondɔɔ a ba nda le wa bɛɛ nɔ niŋ hau Baabuiyo.