Le Yɛɛ Seiyaa Chɛhowaa Kue O Chɔuwo Le?
Seiyaa Chɛhowaa kue o chɔuwo le le sabulaŋ ndaŋ amatou,
Ŋ diikuŋ Mɛlɛka. Baabuiyo dimi maa “buɛiyaa Mɛlɛka wa cho mɔɔŋ ndaŋ chɔuwoŋ chɔuwɔɔ wolɔɔla wali.” Nduyɛ maa, “a cho lɛ pɛɛku le kɔlaŋ o chɔu le.”—Aisaiya 2:4, New World Translation.
Ŋ diikuŋ Chiisu. Mi Chiisu dimul kiilanɔɔ Pitɛ aa, “Mingi muɛi numnde o boo niŋ. Kani fuule, wanaa sɔŋga a muɛi ya, a muɛi nda dii nda ni.” (Maatiu 26:52) O hei niŋ, Chiisu chɔm kpendekele maa buɛiyaa nduaa nɔ ma chua nyɛm chɔuwoŋ le kɔlaŋ o chɔuwo le.
O cho ko keŋ te. Mi Chiisu dimi vɛlɛ maa buɛiyaa nduaa “a cho le chieeŋndo hoo le”. hoo cho chɔmndo ni maa, a nɔ ma wou laba o sɔɔŋ lemasaŋ chieeŋndo hoo niŋ te. (Chɔŋ 17:16) A sim masaa o labolo le sɔɔŋ puaa chɔuwa cho tosaa woŋ te. A wou sondo nda o sɔɔŋ wanaa hɛli le tosaa baala puaa chɔuwa wa le.
Ŋ kaala chaaŋaa naa. Mi Chiisu dumul buɛiyaa nduaa maa a nɔ ma “kaaliaŋ vellaa velle.” (Chɔŋ 13:34, 35) Buɛiyaa nduaa cho wa ba o ba fee o chieeŋndo choo. Lelaŋ, a chue niŋ nyɛm ŋchɔu le kɔlaŋ chaaŋaa ndaa laalaŋnda diyɔɔ le.—Chɔŋ Tasoo 3:10-12.
Tamaselii Kilisiɔŋaa Tasiaa. Yau suaa a sɔɔŋ okɔɔ wo ma veelu ndu o puuluei niŋ aa, Encyclopedia of Religion and War dimi aa, “Wanaa tasiaa tol Chiisu kɔɔli wa wou laba o chɔu niŋ kposoŋ te. Nduyɛ, a wou vɛlɛ bala nda o baala puaa chɔuwa niŋ te”. Mbo hiau a dimioo aa, “mi waŋnda haa cha kɔlaŋ o chɔuwo a baala puaa chɔuwa maa o chɛlaŋ a nyɛ Chiisu dimi le yaamɔɔnɔ numndo kaalaa wo le.” Le hei chɛlɔɔ, mi Chamaŋnɔ pum o pɛɛku a kaŋnde okɔɔ diolaŋ aa Pitɛ Manhol, mbo dimi aa, “Kilisiɔŋndeŋ a baala puaa chɔuwa chɛlaŋ kposoŋ te.”
Tooloo yɔŋgoo o tanda naŋ cho wo niŋ
Tanda o tanda Seiyaa Chɛhowaa wa pɛ, a cho wanaa laasiaa le. Nduyɛ, luei yoomula chaaŋaa ndaa o kpundɔɔ niŋ te. Ŋ ke masaa lelɛŋnda bɛɛleŋ. Nyɛ Baabuiyo dimi wo cho hoo ni,
“Nya kpou la nɔ mi la tosa nyɛ wanaa cho nya chilaŋ nda a dimul nya le tosaa wo.”—Luomaŋnda 13:1.
“la paava masa bɛndoo nyɛm cho le ndu woŋ, mi la paava mɛlɛka nyɛm cho le Mɛlɛka woŋ.”—Maatiu 22:21.
Lelaŋ, ŋ diikuŋ masaa waa, ŋ mal paawa lelɛŋndo nduyɛ, ŋ toolu sɛmbɛ masaa waa cho dɔuwɔɔ wo le wanaa naŋ cho o lɛŋndeŋ niŋ nda malaa.
Naapum a Yeema Dɔɔ Vɛlɛ
BANDU MƐŊGƐLAA
Vɛɛ Mɛlɛka Che yɛ Chɔuwo?
Mi Mɛlɛka dimul wanaa nduaa o sindɔɔ niŋ le chɔuwo tosaa. Okoŋ kɔɔli, mi Chiisu pɛɛku waŋnda le ma kaala wanaa tul nda leyɛ wa. Yɛɛ ndoo siŋgaŋ yɛ?
NYUNALA WAŊNDA NYUNA LƆƆLƆƆ LAŊ
Le Yɛɛ Seiyaa Chɛhowaa Luei Laba o Chɔulaba Lemasa Niŋ Kposoŋ Te?
Baa wanaa wɔɔŋnda pa nda cho o lɛŋndeŋ niŋ ni?
PƐƐKULA BAABUIYO
Tofa Ma Che Mɛɛ Naŋ Tosa Pɛɛku Baabuiyo Hoo Yɛ
Kindiŋ ma sɔla pɛɛku Baabui waŋndo wa num malaa wo.