Sako, Ŋ siŋga le. Wana dimi isɔɔ a tonya, mɛɛ naŋ sina maa laalaŋnda naalaŋ la bɛnda kpeekpei a nyɛ Baabuiyo dimi le, miŋ siŋga laalaŋnda laŋ.

 Tuupa miŋ kandu solioo New World Translation of the Holy Scriptures o wɔsi 1950, miŋ yaasiaa Baabuiyo tɛɛ tɛɛ. Baabui o Baabui hiviaa wa pɛ, nduyɛ, mbo chɛlaŋ a laalaŋnda naalaŋ, ndu naŋ soliŋ kpeku ni. Nuawɔ tamaseliilaŋ lapum, o nyɛ o nyɛ Seiyaa Chɛhowaa laalaŋ sindɛ, okoŋ, mi numpila kelu iyama te lende kpeekpei Baabuiyo pɛɛku ni.

1.   Nyɛ naŋ laalaŋndo: Mɛlɛka cho a yaa le. Zion’s Watch Tower o fula a Suɛɛsɔɔ wɔsi 1882 wo dimi aa, “Ŋ laalaŋ maa wanaa cho nuaa o yaula naalaŋ niŋnda sina maa mi che bɛɛ naa ŋ laalaŋ o Chɛhowa niŋ, Chiisu, a nyina diandaa, kɛ ŋ kɛɛ kpoŋ pɛɛku Mɛlɛkaa yaa wo. Nduyɛ ŋ che ndi kɛsɛ maa pɛɛku waŋnda cho maa mɛlɛkaa a yaa cho o Mɛlɛka pilɔɔ niŋndo, Baabuiyo kuisiŋ pɛɛku waanaa o kɔl.”

     Nyɛ Baabuiyo pɛɛku wo: “Chɛhowa Mɛlɛka naa ndu pilɛ kpe cho Chɛhowa ni.” (Dutɔlɔnɔmi 6:4, The Holy Bible, by Robert Young) “Kɛ nduyɛ, naa naa ŋ sina maa Mɛlɛka o pilɛ o cho ni. Ndu yɔŋnuŋ maa Mɛlɛka Finyaa ni. Ndu toosiaa nyɛ o nyɛ fee ni. Nduyɛ, le ndu naa ŋ cho yoomu ni. Nduyɛ, Masanɔɔ o pilɛ kpe o cho ni, ndu yɔŋnuŋ maa Chiisu Kiliti ni o Mɛlɛka toosiaa nyɛ o nyɛ fee o sabu ndɔɔ niŋ mi ŋ va yoomu o sabu ndɔɔ niŋ ndo.” (Kɔliŋtiaŋ Tasoo 8:6, Yooŋgu Kɛndɛ Mɛlɛkaa, Bible Society in Liberia) Mi Chiisu pila bɛɛ dimi aa, “Finya nuu ndu hiou a ya.”—Chɔŋ 14:28, Yooŋgu Kɛndɛ Mɛlɛkaa, Bible Society in Liberia.

2.   Nyɛ naŋ laalaŋndo: Fonda nyɛ palaa cho naa Mɛlɛka duau wanaa yɔŋ wɔɔŋnda o yiŋnde wule wule leŋ niŋ te. A Suɛɛsɔɔ, mɛɛ Zion’s Watch Tower wa suɛi o suɛi lebolle hei bɛŋgu, “The Wages of Sin Is Death,” mbo soli bolle Baabuileŋ o King James niŋ. Mi yauwo hoo dimi aa, “Nyɛ Baabuiyo dimi hoo wo choŋnuŋ kpendekele. I bii bɔɔ wana kaamaa le sinaa maa wanaa chɛl Baabuiyo maa diom Mɛlɛkaa wa cho hiouwɔɔ lachi a nyɛ o dimi wo sɛɛŋgiaa, nduyɛ, ma baŋ maa Baabuiyo dimi maa paawa hakioo ke wa wo, maa ndu cho yoomu fafɛɛŋndo o nyɛ palaa niŋ ni.”

     Nyɛ Baabuiyo pɛɛku wo: “Yoomu tosa hakioo wo, ndu wu ni.” (Ɛsikiɛ 18:4, 20, King James Version) Paawa mɛɛlaa le wanaa simul Mɛlɛka wa, o cho nyɛ palaa fafɛɛŋndo le, kɛ, “tambuu fɛŋfɛɛŋndo”—Tɛsaloniaŋ Diiŋ Ndɔɔ 1:9, King James Version.

3.   Nyɛ naŋ laalaŋndo: Kɔmɛtiiyo kpeekpei Masale Mɛlɛkaleŋ le cho ni, o cho ko nyɛ cho waŋndo o kɔllo le. A Yindimiiyo wɔsi 1881, mi Zion’s Watch Tower suaa a masale Mɛlɛkaleŋ okɔɔ aa, “Kilaŋ masaleŋ ndeŋ le cho machuaa maa masɛi o chieeŋndo choo kpou cho hunɔɔ kɔmba wɔ.”

     Yɛɛ Baabuiyo pɛɛku yɛ: “A teleŋ masaa yɛ yiaa haa cho wa wo, Mɛlɛka cho choo choo wo cho masaleŋ kila, Masale tembu le fɛɛŋ a fɛɛŋ te leŋ. Nduyɛ, fɛɛŋ a fɛɛŋ, wana nɔla leŋ hiɔlɔɔ le. Le cho hunɔɔ masɛi hei kpou pesi pesi wɔ wɔ. Nduyɛ, masaleŋ ndeŋ koni le cho wa le fɛɛŋ a fɛɛŋ ni.”—Daniɛl 2:44, King James Version.

 Sako, ŋ cho hiouwɔɔ lachi a Baabuila cheleŋ soliŋndo kpeku le seileŋ timbioo a Mɛlɛka okɔɔ. O tonya dimiaa niŋ, mi che bɛɛ naa ŋ cho waŋnda piɔuwo New World Translation ŋ kilul wana baa le, le hiouwɔɔ lachi a waŋnda pɛɛkoo fondo fuu. Ŋ naŋ vɛlɛ kɔl le waŋndo pɛɛkoo te o yeema pɛ le Baabui cheleŋ soliŋndo kpeku.