Waŋnda ba o ba fee cho tɔnɔɔ sɔlaa o jw.org choo. Tofawɔ tamaseliilaŋ lapum ma che nyɛ wanaa bɔɔbɔɔ poonyial Fondaŋnda Lebolta Seiyaa Chɛhowaa le balika melaa chɔmndo wo, kanduŋ a Bukuloo 2014.

“Teleŋ o teleŋ po ni pɔmbɔɔ ndoo fula pɛ o sukuu, mi ndoo hiŋ o bɛɛ a kpɛkima poonyiaŋ, nyɛm lapisulloŋ ɔɔ hɔlta mapuulula chaaŋaa nduaa. Teleŋnda bɔɔbɔɔ mi naŋ kindiŋ le ndu malaa mbo bii bila maa viileŋ o wa tosaa ni, nduyɛ maa viileŋ le niŋ te. Kɛ ŋ sɔla batiuwaa le. Kɛ miŋ hivi vidueiyo hoo, Viileŋ le Niŋ Te o jw.org choo. Nyɛ wali sɔviɔɔ pila wa hoo ni. Nduyɛ, i wa ko maa kooma kpeekpeima bɛnda le po naa waŋ. Mɛɛ o chii vidueiyo hoo tofa, mbo yeema sakpo le miŋgioo nyɛm ndoo chiimbuu muŋ chaaŋaa nduaa kaŋ o ba woŋ. Nduyɛ mi ndupila sina niŋ kɛsɛ maa Mɛlɛka hɛnaŋ a viileŋ te. Nuawɔ se tɔnɔ naŋ sɔla o tɛɛŋgei hei niŋndo!”—D. N., Afilika.

“Chuauwaa niaa kaala bɔɔ tɛɛŋgei hei. Ma hivi vidueila nda poonyiaa o pɛŋgɛi humbuei choo laŋ. Laŋ la mala nda ni ma dɔu sawala mandaala Baabuiyo a choolaŋ vɛlɛ a viileŋ okɔɔ o wali niŋ. Ma pɛɛku vɛlɛ suliŋnda kɛndɛ kɛndɛla mala nda o yoomoo niŋndaŋ. O hei niŋ, a tiuba ma simnuŋ wanaa sɔviaa ba o ba nda wa pɛ.”—O. W., Iŋdiaa Ba Paaleŋ le Dello.

“Mi cha kɔlaŋ o sukuu maa kalaŋ bɛndu bɛndoo o cho ni, nduyɛ mi kɛɛsiaa pɛŋ le fulaŋndo. Kɛ paale pilɛ, mɛɛ ya veelu diomndaŋ o buŋgɛi hei niŋ ‘I Nɔ Pa Mi Fulaŋ o Sukuu?’ o jw.org choo, mii mala ya mi nɔ yiyaŋ kɛndɔɔ a sukuuwo okɔɔ. Mi cha o buŋgɛi keŋ niŋ maa te I kuɛ pɛ o sukuu, keŋ cho tosa mi simnuŋ wana sɔvɛ o chilaŋ niŋ, nduyɛ mi tiuba le waa a ba ni.”—N. F., Afilika.

“Sila cho o tɛɛŋgei hei choo le feleŋguaa wo pɛɛku ya mɛɛ ya looku mi hiou lachi a kaala kɛndɛlaŋ chɔmndo o sukuu yɛ. I mala ya niŋ vɛlɛ le sinaa sɔɔŋ ya nɔ mi fafaŋ ndoŋ, le halikpeŋ mi handu kɔllo o pɛɛku nuu choo o sukuu.”—G., Afilika.

“Mi wana naŋ tosa wallo latulu wo dimul la maa teleŋnda bɔɔbɔɔ mi chuaambuaa ndaa mam chua ndɔɔ o sukuu, kɛ taama taama chuaambɔɔ pum. Mi hei tosa mi chua ndɔɔ chua palɛi bɔɔbɔɔ ndoo kue o sukuu le kanifuule, siooŋnde wa ndu. Kɛ mi chɔm chaaŋ ni koŋ vidueiyo hoo, Lɔɔ Wana Cho Num Mamɔɔ Wo Kɛ o Wa a Bɔta Le, o jw.org choo. O kaala bɔɔ sila vidueiyo yɔŋgu maa, te waŋndo wa num mamɔɔ pɛ a luei mamɔɔlaŋ leniŋ ndo. Mbo chɔm chua ndɔɔ mɛɛ o nɔla mbo tiu simul koŋ ba yɛ. Fulamakɔɔlioo wa ni, chua ndɔɔ ve lɛ buulaŋ te mɛɛ o miiŋgu vɛlɛ kɔlaŋ o sukuu. Nduyɛ mɛɛ teleŋ tiŋ hiou, chuaambɔ koŋ ndoo mem lɛ ndu le. O mɛɛlulaŋ kpɔŋ, mi chaŋyɛi luɛi nda tɛɛŋ.”—V. K., Yulopi Ba Paaleŋ le Chaŋndo.

“La nuwali tau a buŋgɛi hei, ‘Le Yɛɛ Ya Booluŋ Yɛ?’ o tɛɛŋgii nyɛi choo. Bahawɛi ya cho niŋ chɔulabaa le teleŋ vilɛiyo cho koŋ ni. Mi yiyaŋ maa yapilɛ nɔ bahawɛi waa naa ni. Nduyɛ maa te I dimul pɛ acheleŋnda, a cho bahawɛi nuu biyɔɔ bila le. Tamaseliila cho o buŋgɛi hei niŋndaŋ la mala ya bɔɔ. O mɛɛlulaŋ kpɔŋ, mi waŋndo bii ya bila!”—Chua feleŋgɔnɔɔ o lɛŋnde Ɔsiteeliaa leŋ niŋ.

“Tɛɛŋgei hei jw.org tosa ndi niŋ tɛtɛlɛ le mi keleŋa saalɔŋ sɔɔŋ bɔɔbɔɔ piiliaŋ feleŋguaa woŋ. Mi buŋgɛi pum mala ya le sinaa nɛila yɛ yɛla nda chua waŋndo yeemɛi le hiniei tosaa wo. Mi cha kɛsɛ maa, ya bɛɛ a kindiŋ niŋ le ya hei tosallo. Nduyɛ mi pɛɛku nyɛ wana nɔ ma tosa wo, te a wa num pɛ fɛlɛ fɛlaa le hiniei tosaa.”—T. W., Iŋdiaa Ba Paaleŋ le Dello.

“Po nuu cho niŋ kpasu kɛ, o cho bɔɔ yoloma yoloma. Mi bolleŋ le pɛ ya cha a mɛɛ o tosa sɔɔŋ lepum yɛ. Le hei, mbo wa ikala le miŋ chal miŋ dɔu baltaŋ naa ndu. Paale pilɛ mi kua o jw.org choo, nduyɛ mi hɛli fondaŋ soo a pɔnɔɔ a lanɔɔ vɛlɛ a kalaŋ chuauwa okɔɔ wo. Mi saaluŋ buŋgaŋ bɔɔbɔɔ chiɛɛliaŋ a bahawɛi nuu wo. Nduyɛ miŋ mala ya le sinaa mɛɛ ya nɔ mi soo o po nuu lo yɛ. Ndu bɛɛ sɔla niŋ tɔnɔɔ tau o tɛɛŋgei hei niŋ. Suŋ suŋ niŋ, o cho fɛɛsɛŋ a ya. Nduyɛ mbo dimul la sɔɔŋ tosa mbo wa a kɔl kɛndɛ woŋ, vɛlɛ a sɔɔŋ tɛɛmbuu ndu kɔllo woŋ.”—C. B., Afilika.

“JW.ORG mala naa niŋ tau le sinaa nɛila tɛtɛlɛla naŋ soliŋ kpeku le chuauwaa naa pɛɛkoo laŋ. Le taamaseliiyo, vidueila nda poonyiaa o pɛŋgɛi humbuei choo wo la soo a mɛɛ wana nuuviaa chaŋyaŋ kpeekpeiyoŋ yɛ. La mala niŋ chuauwaa naa le yiyaŋ kɛndɔɔ nɔɔ a chaŋyaŋ nuuviaa okɔɔ, nduyɛ ma hɛli chaŋyaŋ tiuba miŋ mala nda tau woŋ. Teleŋnda bɔɔbɔɔ miŋ che buŋgɛi o jw.org choo a teleŋ kpeekpei simullo opum komal chuauwaa naa wo. Tɛɛŋgei hei nɔ bɔɔ silala kɛndɛlaŋ.”—E. L., Yulopi.

“Ŋ chua niŋ wɔsilaŋ la ŋɔmpum o nɔɔ niŋ naa laa nuu. Maa wanaa bɔɔbɔɔ cho o nɔlaŋ nda, ŋ fula kɔɔlima pilɛ le nduyɛ, wana o wana nɔ mɛɛ o suaa yɛ. Lepum, ŋ nɔ yiyaŋ pilɛ o suɛi pum choo le. Kɛ mi buŋgɛi hei o jw.org choo pilaŋ ya kɔllo tau. I nɔ suɛi lebolle aa: ‘Mɛɛ Ŋ Wa Wanaa Yaŋaa Lani Kɛndɛ Yɛ.’ Buŋgɛi hei yɔŋgu silala kɛndɛ kɛndɛlaŋ a mɛɛ wana tosa hiouwɔɔ lachioo le nilaŋ yaŋɔɔ nyɛkɛndɛi yɛ okɔɔ. Mɛɛ ya veelu diomndaŋ leniŋ, mi kɔ chɔm laa nuu. Ŋ kindiŋ niŋ le kɛɛsiaala naŋ saaluŋ leniŋ ndaŋ dɔwɔɔ o wali niŋ.”—B. B., Iŋdiaa Ba Paaleŋ le Dello.

“O cho niŋ wɔsioo opilɛ chɔŋ a teleŋ ya kandu pɛɛkoo naa Seiyaa Chɛhowaa wo. Nduyɛ I yeema kɛsɛ mi mel nda balikaa le jw.org kanifuule, I pɛɛku niŋ sɔɔŋ bɔɔbɔɔ o tɛɛŋgei hei. I pɛɛku niŋ mɛɛ ya looku mi tiu kɔl ni tuuwo ba yɛ, a mɛɛ ya looku mi simnuŋ pɔnɔɔ a finya kɛndɛ yɛ. Wana dimi isɔɔ a tonya, tɛɛŋgei hei tosa ni miŋ wa wɔ o nɔɔ niŋ naa laa nuu.”—L. G., Iŋdiaa Ba Paaleŋ le Dello.

“Tɛɛŋgei hei mala ya ni mi yiyaŋ maa I miiŋgu vɛlɛ yoomu. Vidueila cho o Suɛi Amɛlikɛiya Tuula a Laba Ve niŋndo mala ya niŋ tau mi tosa hiouwɔɔ lachioo o tuuliaa niŋ. Mi yaa yiyaŋ paandu maa I tiuba mi kɛsi kpeleŋnda sɔvɛlaŋ o yoomoo niŋ te. Kɛ mɛɛ ya tofa vidueiyo hoo, Diom Mɛlɛkaa Chɔɔ o Suɛi Nii Maŋgalɛi Niŋ, mi naŋ kɔl tau. Mbo luei ya yoomuaŋ, nduyɛ mi kɛɛsiaŋ o kɔl le hiouwɔɔ lachi a kɔllo kɛsioo o sɔɔŋ kɛndɛŋ yɔŋnuŋ ya o yoomoo niŋndoŋ choo.”—J. N., Afilika.

“Nyɛ tɔɔmaa kpeekpei tɛɛŋgei hei cho ni. Bobuaa ya mala ni, taama tamaa feleŋguaa. Nyɛm waliŋ bɔɔbɔɔ cho le suɛi nda tuuliaa a laba ve mala ya niŋ tau le hiouwɔɔ lachioo tosaa o tuuliaa niŋ. Tɛɛŋgei hei mala ya niŋ le wanaa yeema mi yuŋgu ndaa wa a kɔl kɛndɛ wa, a wanaa yeema ma nɔ chaŋyaŋ kɛndɔŋ nda malaa.”—K. J., Iŋdiaa Ba Paaleŋ le Dello.

“Wana sumɛiyo ya cho ni, nduyɛ I sɔla niŋ tɔnɔɔ tau o tɛɛŋgei hei niŋ. Mi saaluŋ yooŋgula sɔvɛ sɔvɛlaŋ o jw.org choo. Te ndoo yɔŋ pɛ maa yaulaŋ ndaa poonyial la ni, o wa chua teleŋ vilɛi tuupa mi laa komalla. Tɛɛŋgei hei mala niŋ yuŋgu naa tau. Nduyɛ, i tosa mi simnuŋ wana sɔvɛ sɔviɔɔ o tanda nuu niŋ. I mala ya niŋ vɛlɛ le yooŋgulaŋ sɔlaa a teleŋ pilɔɔ kpe naa wanaa cho a sumɛi le wa.”—C. A., Amɛlika Batouwo.

“JW.ORG tiuba mbo mala wanaa nɔla diomndaŋ veeloo o yaula wanaa sumɛiya niŋ te wa, a wanaa tiuba ma pendu laŋ te wa. Sanaa a diomnda nda chua laŋ, wanaa sumɛiya bɛɛ nɔla ma pɛɛku diomndaŋ veeloo. A toosiaa tɛɛŋgei hei le wana suu o suu malaa. I mala niŋ naŋ cho a sumɛiya wa le yiyaŋndo maa ŋ cho a sɔvɛ o tandala naŋ cho laŋ niŋ.”—R. D., Afilika.

“Teŋgeŋ cho tɛɛŋgii nyɛi tɛɛŋ a tɛɛŋguŋ piɛiyii cheleŋnde wo cho ni maa, diomnda i nɔ laŋ, o cho ko piɛiye ɔɔ simlachiaa lepiɛiya kinɛi le bii laŋ bila le, kɛ wana o wana tiuba mbo bii laŋ bila. O faŋaŋ ndɔ okoŋ kɔɔli, yooŋgula i nɔ laŋ la kindu bila biyɔɔ le. Tɛɛŋgii nyɛi choŋnuŋ tɛtɛlɛ, i nɔ diomnda tau le, nduyɛ o cho taasi wanachioo le i pɛɛku wana le. I nɔla vɛlɛ mii mala wana o wana mbo bii bila maa o tiuba mbo dɔu tiindaŋndo o Mɛlɛka niŋ.”—A. G., Eesiaa.

“Te ndoo ve jw.org te, yoomu nuu ve nɔ sabu o sabu le. Te o hiŋ pɛ a Mɛlɛka piɛiyo okɔɔ, chieeŋndo hoo cho o nyumndaŋ niŋ kpiŋgbi. Kɛ tɛɛŋgei hei cho maa nyɛ teŋgaa o mala ya mi che nyɛ wawoŋndo wo. I nɔla mi keleŋa buŋgaŋ tɛɛsiaa yiyaŋ Mɛlɛkaa a sɔɔŋ bɔɔbɔɔ okɔɔ woŋ saalɔŋ o tɛɛŋgei hei choo. Nduyɛ, I nɔla vɛlɛ mi keleŋa saalɔŋ mulilaŋ le nyunala sɔvɛ sɔvɛlaŋ o yoomoo niŋ.”—J. C., Iŋdiaa Ba Paaleŋ le Dello

“Mi che bɛɛ I choŋnuŋ Amɛlika Batouwo pɔ o bundɛlaŋ niŋ, kɛ I nɔ bɔɔ balika melaa a mala ya cho sɔlaa a Mɛlɛka piɛiyo okɔɔ wo. Te ndoo ve tɛɛŋgei hei le, I ve nyɛ o nyɛ sina a Mɛlɛka okɔɔ le.”—M. F., Amɛlika Batouwo.