Chɔŋ Kooŋndo 6 haaa 16, 2013, mi waŋnda o miiliɔŋndaŋ niŋ fulaa chieeŋndo balɔɔ silɔ bɔɔŋiaŋ o fondaŋ dɛndɛla mamɛŋndaŋ la sim ndo diolaŋ Loɛŋ, Filaŋsi baluaŋndo. Ndaa chuuŋgiaŋ le dunyɛi sɔvɛ bɛnduei ipum biyɔɔ diolaŋ aa Amada.

Mɛɛ nda chua kilolaŋ 120 (mɛɛliilaŋ 75) o pee bɛndu nda veelu aa Sɛyin ndo choo, okoŋ mi dɛndɛla hiou bandu kpou o chieeŋndo choo nduyɛ mi la naŋ ndaŋ la tusi nda le dunyɛi keŋ biyɔɔ. Nduyɛ, le palɛi tɔ a nyɛ lechoo, mialaa ndaa kuɛ o dunyɛi keŋ nda ndaa nɔ dikeŋnaŋ teŋgeŋndo le mɛɛndaŋndo dɛndɛla mamɛŋnda tɔɔ bɛndu laŋ 45 vɛlɛ a la vilɛi vilɛila wa o fondaŋ koŋ ndaŋ.

Yɛɛ nyindu yɛ wanaa teŋgeŋ teŋgeŋnda haa le kɔlaŋ o dunyɛi nda veelu hei aa Amada ve? A mɛɛ wana kila ndi wo dimi yɛ, mi dunyɛi hei tosa “mi waŋnda che ‘Dɛndɛla Bɛndula Mamɛŋndaŋ’ nduyɛ mii ke nda yiyaŋndo tau.” A tonya, mi wanaa bɔɔbɔɔ, chuaambɔ ni, kaasoŋnɔ ni, yiyaŋ a tinda vilɛi vilɛilaŋ o mɛŋndaŋ choo vɛlɛ a hɛnɛkɛyɛi, te a che pɛ dɛndɛla bɛndula mamɛŋndaŋ.

Mi wanaa bɔɔbɔɔ ndaa kuɛ loŋ nda sɔla vɛlɛ dikeŋnaŋndo le tueiyɔɔ a hɛnɛkɛyɛi cheleŋ okɔɔ. Ndi cho tonya cho o Baabuiyo niŋndo ni. (Chɔŋ 8:​31, 32) Te wanaa kaŋ ndaa wa pɛ balɔɔ o chiee bɛndoo Loɛŋ niŋ, mi ndaa che Seiyaa Chɛhowaa isisi o pɛŋgɛŋ mapuuloŋ ikɛi a yaulaŋ lechoo. Te ndaa sɔɔŋguu pɛ ikɛi, mi Seiyaa Chɛhowaa ndaa dimul nda le ma chua yau kɛ kɛ ndaa yeema pɛ, a paawa nyɛ o nyɛ le. Mi buŋgɛi pum o Bandu Mɛŋgɛlaa niŋ pilaŋ wanaa bɔɔbɔɔ kɔltaŋ. Buŋgɛi hei nɔ suɛi lebolle aa: “Lɔɔ Kuɛɛ Duuviaalaŋ La Cho yɛ Chuwɔɔ o Chieeŋndo Niŋ?” Nduyɛ mi wanaa bɔɔbɔɔ sɔla veeloo le ma huŋ yaŋ nilaŋ o suɛi luŋnde o Filaŋsiiye, Iŋkilisiiye, ɔɔ o Spanisiiye niŋ.

Mi wanaa wa o fondaŋ koŋ nda chɔm balika melaa tau le Seiyaa Chɛhowaa. Mi po pilɛ kɔndɔfillo ndoo bii le Seiyaa Chɛhowaa chɔɔ o pɛŋgɛi mapuuluei ikɛiyo dimi aa: “I naŋ bɔɔ kɔl le nya chɔɔ isisi o luŋ kpendekele. Mi che bɛɛ ŋ nɔ laalaŋnda pilɛ le, kɛ I nɔ bɔɔ bɛɛleŋ le wanaa sim yi o nyɛ nda laalaŋndo choo wa.” Mɛɛ falla a ŋiɔɔŋ komal puaapiliaa naa feleŋguaa yooŋgu kɛndɔɔ dimioo o luŋ, ma dimul nda aa: “La nɔ mi la pɛɛluŋ a wanaa suu nya cho wa!”