Chieeŋndo balɔɔ silɔ, waŋnda sina Seiyaa Chɛhowaa le kɔlaŋ yooŋgu kɛndɔɔ dimioo chiɛiyo a chiɛiyo. Nduyɛ ma sim vɛlɛ naa waŋnda hiau tau wa, a pɛŋgɛŋ kɛndɛ kɛndɛŋ nda dimi yooŋgu kɛndɔɔ woŋ a yaulaŋ lechoo.

Nyɔɔ viu wɔ bɛɛ le, miŋ sɔla dɛɛniaa le yooŋgu kɛndɔɔ dimioo o nɛi waa nuaa niŋ. A Bɛŋgufɔnɔɔ 2011, mi Seiyaa Chɛhowaa o Chiee Bɛndoo niŋ Niu Yɔk, kandu pɛŋgɔŋ a tibiilaŋ soliŋndo kpeku le waŋnda yooŋgu kɛndɔɔ dimullo. Nyɔɔ viu bɛɛ le, mi chieeŋ bɛnduŋ cheleŋ bɛɛ tual nɛiyo hoo kɔɔli le waŋnda yooŋgu kɛndɔɔ dimullo.

Kanduŋ Fuoo 2015, kɔɔnaa yɔŋgu niŋ kundala Seiyaa Chɛhowaa chieeŋndo balɔɔ silɔ pɛŋgɛŋ naŋ dimi yooŋgu kɛndɔɔ o luŋ kpendekele woŋ le 165,390. A yɔŋ niŋ vɛlɛ tibiilaŋ a nyɛm cheleŋndoŋ o waalaŋ niŋ o kundala yɛ yɛlaŋ niŋ le yooŋgu kɛndɔɔ dimioo.

Yooŋgu kɛndɔɔ dimioo chiɛiyo a chiɛiyo cho wɔ nɛi kpeekpei Seiyaa Chɛhowaa pɛɛku waŋnda tonya cho o Baabuiyo niŋndo ni. Kɛ a koŋ kpou, pɛŋgɛŋ naŋ dimi yooŋgu kɛndɔɔ woŋ bɛɛ cho malaa yɔŋgoo tau. Tofawɔ tamaseliilaŋ lapum.

O lɛŋnde Pɛlu leŋ niŋ, mi po pilɛ diolaŋ aa Lual, kua naa Seiyaa Chɛhowaa wa yooŋgu kɛndɔɔ dimioo a pɛŋgɔŋ nda, mbo nyuna nda aa: “Kuɛɛnɛ nyaa kuɛ yɛ? Le wɔsilaŋ niŋ la yaa kpulukuu, I cho Seiyaa Chɛhowaa nuuviaa. Kɛ mɛɛ ya che pɛŋgɛi nyɛi, mi mel Mɛlɛka balika.”

Mi che bɛɛ Seiyaa Chɛhowaa wa kɔlaŋ yooŋgu kɛndɔɔ dimioo teleŋ o teleŋ o fondaŋ Lual wa wo, kɛ ndaa komal ndu o bɛɛ le. Nduyɛ, o lɔɔ mɛɛlulaŋ bɛɛ, ndoo ve o bɛɛ le. Mbo dimul nda maa o wa paandu Baabuiyo pɛɛkoo a Seiyaa Chɛhowaa, nduyɛ maa o yeema mbo kandu vɛlɛ Baabuiyo pɛɛkoo. Mi kɛɛsiaa tosaŋ le mbo kandu vɛlɛ pɛɛkoo.

O lɛŋnde Bɔkeliaa leŋ niŋ, mi pɔnɔɔ a lanɔ pilɛ kua o pɛŋgɛi, ma chua yauwo hoo, The Secret of Family Happiness. O lɔɔ pilɔɔ, ma miiŋgu ma kɔ chua yaula tiɔɔŋ ndaŋ ndaŋ: Yau Ni Bundɔŋ Baabuiyo a Learn From the Great Teacher. Mi Seiyaa Chɛhowaa wa o pɛŋgɛi ya nyuna nda mɛɛ kpɛ nda nɔ chuauwa yɛ. Ma muli aa: “Ŋ vilu wɔ chua le. Kɛ te ŋ huŋ violu pɛ, ŋ kɛɛsiaa le miŋ pɛɛku nda a Mɛlɛka okɔɔ. Yaulaŋ ndaŋ kpeekpei naŋ yeema ni.”

O lɛŋnde Yukileŋ ndeŋ niŋ, mi laŋunɔ pilɛ a nyɛla puaa chɔuwa lekɔɔ kua naa Seiyaa Chɛhowaa wa yooŋgu kɛndɔɔ dimioo o pɛŋgɛi ya, mbo dimul nda aa: “Chuauwaa niaa, la chɔmndɔ ya teleŋ Amakɛdɔŋ cho hunɔɔ wo.” Chɔu wa o lɛŋnde Yukileŋ ndeŋ niŋndo, mi laŋunɔɔ hoo bɛɛ sɔŋga o chɔu koŋ niŋ. Sɔɔŋ cho yɔŋnɔŋndo o chieeŋndo choo woŋ tosa ni mbo laalaŋ maa Amakɛdɔŋ cho suŋ hunɔɔ. Nduyɛ mi kɔndɔfillo bii ndu le sabu Mɛlɛka hiŋndɔ a chɔuwo hoo le wo. Mi wanaa dimiaa yooŋgu kɛndiaa tɛɛsial ndu o Baabuiyo niŋ le sabu Mɛlɛka feŋa wɔ sɔɔŋ wɔɔŋndoŋ te wo. Nduyɛ maa, o cho suŋ hunɔɔ wanaa dɛnɛ wɔɔŋnda kpou tɛɛmbuu. Mi laŋunɔɔ hoo bii yaula Bandu Mɛŋgɛlaa a “Tiondoo!” Mbo bii vɛlɛ yauwo hoo, Is There a Creator Who Cares About You?

O lɛŋnde Masidooniaa leŋ niŋ, mi po feleŋgɔnɔ pilɛ dimul Seiyaa Chɛhowaa wa yooŋgu kɛndɔɔ dimioo o pɛŋgɛi ya maa o sina a yaula nda laŋ okɔɔ. Kɛ maa o yeema yauwo hoo, Yɛɛ Kpeekpei Baabuiyo Pɛɛku Yɛ? Mbo dimi maa o cho lakɔ sakpo, mbo kɔ kandu diomndaŋ veeloo leniŋ.

Mɛɛ hawɛilaŋ la tiɔɔŋ la hiou, mbo chii diomndaŋ veelu o pei 79 niŋ. Okoŋ, mbo miiŋgu naa nda chua, mbo kɔ dimul nda aa: “Yauwo hoo siŋga yoomu nuu! Sɔɔŋ bɔɔbɔɔ yaa laalaŋ paandu woŋ, mi cha kpendekele maa ŋ cho tonya le. I che kpendekele maa sɔɔŋ yauwo hoo tɛɛsiaa woŋ kpou, ŋ cho tonya. Yauwo hoo siŋga yiyaŋ nuu kpou a yoomoo okɔɔ.”