Kanduŋ a Bɛŋgufɔnɔɔ 13 haaa 16, 2014, mi kɔɔna pilɛ o Toloŋto niŋ bii Bɔŋaŋ Bɛndoo le waŋnda malaa ma sina a yaula yɛ yɛla waŋnda soli niŋ o pei choo laŋ vɛlɛ a la cho o intanɛtiiyo choo laŋ okɔɔ. Wanaa hiŋ o bɔŋaŋndo hoo wa ndaa hiou 20,000, nduyɛ a wa loŋ le palɛi i hiɔɔlu.

Seiyaa Chɛhowaa wa o waŋnda haa tɛɛŋ, nduyɛ ma kua a tibiiyo. Okoŋ, ma handu tabilɛtiilaŋ o tibii koŋ choo, le waŋnda chɔmndo mɛɛ wana kua o jw.org yɛ.

Mi wanaa kɔɔna bɔŋaŋndo hoo wa opilɛ dimi aa: “Tɛɛŋgii nyɛi hei i naŋ bɔɔ. I laalaŋ maa wanaa cheleŋaa cho yaula ndalaŋ chɔmndo wa bɛɛ nɔ ma pɛɛku nya o ba.” Mi wanaa cheleŋaa wa o bɔŋaŋndo hoo wa bɛɛ dimi maa a chaa bɔɔ jw.org toosiaa. O cho tɛtɛlɛ le kɔlaŋ o tɛɛŋgei hei, nduyɛ i mala wana ma sɔla mulioo le nyunala sɔvɛlaŋ. Mi nyɔɔ hɛnaŋ nda vɛlɛ tau mɛɛ nda sina maa mi tɛɛŋgei hei mala waŋnda mɛɛ nda biunuŋ bahawɛila ndalaŋ yɛ.

Mi Seiyaa Chɛhowaa wa o tibiiyo hoo ikɛi ya sina o balta nda wa dɔwɔɔ a waŋnda laŋ maa wanaa bɔɔbɔɔ wa o bɔŋaŋndo hoo wa, lepilɛ bɛɛ ndaa tuiyɔ a jw.org okɔɔ le. Wanaa hiŋ o tibiiyo wa kinɛi, mi a bɔɔbɔɔ bii yau naŋ ke waŋnda le kɔlaŋ o jw.org wo ɔɔ yau pɔmbɔɔ hoo, Kuɛɛ Naŋ Saaluŋ yɛ Mulilaŋ le Nyunala Sɔvɛlaŋ o Yoomoo Niŋ? Mi waŋnda haa a bɔɔbɔɔ dimi maa a cho lakɔ o tɛɛŋgii nɛi, nduyɛ mi apum dimi maa Seiyaa Chɛhowaa komal nda o la nda lo bɛɛ.

O bɔŋaŋndo hoo choo, Chimɛiyo wa “Paale Chuaambuaa” ni. Le hei, mi Seiyaa Chɛhowaa wa loŋ nda chɔm vidueila chuaambuaa cho o jw.org laŋ. Chuaambuaa sukuuwa a wanaa ndaa pɛɛkaa wa loŋ a kundalaŋ. Nduyɛ te ndaa wa pɛ hiouwɔɔ, a sim a tofa vidueilaŋ ndaŋ.

Laŋunɔ pilɛ wa loŋ, Chikako ndoo fula ni. Nduyɛ, le kɔɔna soli Baabuilaŋ o pei choo wo o tosa wallo ni. Mbo chɔm balika melaa le mɛɛ nda chaa New World Translation of the Holy Scriptures o che o kɛsiaa o tibiiyo choo wo toosiaa yɛ. Mbo yeema pɛŋ sinaa a wanaa soli Baabuiyo hoo wa okɔɔ. Okoŋ, ma ke ndu yau naŋ ke waŋnda le kɔlaŋ o jw.org wo.

JW.ORG cho o sɔɔŋ maŋgalaŋ niŋ hiouwɔɔ 700, nduyɛ mi wanaa wa o bɔŋaŋndo hoo wa tofa ndu o sɔɔŋ maŋgalaŋ 16 niŋ. Muŋ cho ni, Amhalikiiye, Beŋgali ve, Chainisiiye, Iŋkilisiiye, Filɛŋsiiye, Kilikiiye, Kuchalatiiye, Hindiiye, Koliaŋnde, Pɔtɔkisiiye, Spanisiiye, Suidisiiye, Tamille, Tikilaŋya ve, Ɔduve, a Viɛtinamisiiye.

Mi wana pilɛ o Seiyaa Chɛhowaa wa isisi o tibiiyo ikɛiya, cha maa teŋgeŋ bɛndoo choo waŋnda dimullo a tɛɛŋgii nɛi okɔɔ, a nda chɔmndo mɛɛ wana soliŋ ndi kpeku yɛ. Mbo dimi aa: “Miŋ sɔla dikeŋnaŋ bɛndoo le waŋnda chɔmndo a tɛɛŋgii nɛi okɔɔ.”