Ɛfisiaŋnda 1:1-23
1 Ya Pɔɔl, kiilanɔ Chiisu Kiliti wo o hɛnaŋ Mɛlɛkaa niŋ, ya cho yauwo hoo poonyiaa ni le nya wanaa laalaŋaa cho o Ɛfisɔɔ niŋ, nduyɛ mi la wa isisi yi o laalaŋ nya nɔ o Chiisu Kiliti niŋndo choo wa:
2 Maa Mɛlɛka Finya naa nda Masanɔɔ Chiisu Kiliti tosal nya kɛndɛi ndɛi bɛnduei, nduyɛ ma ke nya kɔl nyuloo fɔ!
3 La ŋ melnuŋ Mɛlɛka balikaa, o cho Finyaa le Masanɔ naa Chiisu Kiliti wo. Kanifuule, o dɔu naa sala a nyina ndɔ diandaa o fondaŋndaŋ o choo choo niŋ, le mɛɛ naŋ cho diompilɛ a Kiliti yɛ.
4 Mbo hɛli naa le miŋ wa diompilɛ a ndu tuupa mi chieeŋndo kanduŋ, le halikpeŋ miŋ chɔm kaalaa, miŋ wa wanaa diandaa, nduyɛ ŋ nɔ sɔŋ o sɔŋ ndu o hɔl te.
5 Paandu pa Mɛlɛka hɛli naa ni le miŋ simnuŋ chuauwaa ndɔ o sabu Chiisu Kiliti wo niŋ. Mɛɛ o hɛnaŋ yɛ o tosa ndi ni.
6 O tosa hei le mi waŋnda saŋgala ndu le kɛndɛi bɛnduii o tosal naa ve sanaa o Po ndɔ kaalaa niŋ.
7 Po ndɔɔ hoo baŋa naa a kooma nduaŋ ni. Okoŋ, mi Mɛlɛka mal naa haki o kɛndɛi nduɛi bɛnduei niŋ.
8 Mɛlɛka tosal naa kɛndɛi nduɛi hei tau, mbo ke naa taasioo a sinapɛŋgoo.
9 Mbo tosa miŋ sina sɔɔŋ ndɔŋ viaŋnaŋndoŋ a mɛɛ hɛnaŋ ndɔɔ cho yɛ.
10 Nduyɛ te boondii Mɛlɛka pila kɛɛsiaa ve i fuuluu pɛ, o cho nyɔɔŋ kpou chuuŋgiaa naapilɛ o Kiliti niŋ, nyɔɔŋ o choo choo niŋ, a muŋ o lɛŋndeŋ choo. A tonya, o ndu niŋ o cho muŋ chuuŋgiaa ni.
11 Ŋ cho diompilɛ a ndu, nduyɛ mi Mɛlɛka hɛli naa le miŋ sɔla nyɛm kiɔɔŋ naa ndaa. Paandu pa o hɛli naa ni a mɛɛ hɛnaŋ ndɔɔ cho yɛ. Nduyɛ mɛɛ o yeema yɛ o tosa nyɛ o nyɛ ni.
12 Le mɛɛ naŋ cho wanaa tasiaa le tiindaŋndo dɔwɔɔ o Kiliti niŋ yɛ, waŋnda tiuba ma saŋgala Mɛlɛka o naa niŋ.
13 Kɛ mɛɛ nya bɛɛ tuei yooŋgu tonyaa hoo, ndu cho ni, yooŋgu kɛndɛ chiindiaa nya wo, mi la duau tiindaŋndo o Chiisu niŋ. Okoŋ kɔɔli, mi Mɛlɛka ke nya nyina ndɔ diandaa o chuel nya buŋgɛiyo maa tamasi.
14 O cho maa tamasi le chɔmndo maa ŋ cho hunɔɔ nyɛ Mɛlɛka chuel naa buŋgɛiyo sɔla. Mɛlɛka tosa hei le mbo baŋa wanaa nduaa, le halikpeŋ mi waŋnda saŋgala ndu.
15 Lelaŋ, chɔŋ a boondii ya tuei a laalaŋ nya nɔ o Masanɔɔ Chiisu niŋndo, vɛlɛ a kaala nya chɔm wanaa laalaŋnda* wo,
16 I pɛŋgi Mɛlɛka balikaa mello le nya le. I cho hiouwɔɔ lachi a piɛileŋ le nya.
17 Maa Mɛlɛka, o cho Finya kɔndɔfili bɛndoo le Masanɔ naa Chiisu Kiliti wo ke nya taasioo, le mi la sina sɔɔŋ o chɔm nya woŋ pɛŋgu, nduyɛ mi la sɔla kɔl kaloo a ndu okɔɔ.
18 Mɛlɛka kumbi kɔlta nyalaŋ le mi la che, nduyɛ mi la sina tiindaŋ o ke nya wo, a nyɛm kɛndɛŋ o chuel wanaa laalaŋnda* buŋgɛi yoŋ.
19 Nduyɛ o tosa mi la sina mɛɛ kpɛ kpaaya ndɔ bɛndoo cho wallo o naa wanaa laalaŋnda niŋ yɛ. Ŋ cha kpaaya ndɔɔ hoo o sɔɔŋ o tosa woŋ niŋ.
20 Kpaayaa hoo o soliŋ kpeku ni le Kiliti miŋgioo yoomu, okoŋ mbo kɛsi ndu o ba ndɔ kɛndɔɔ choo o choo choo niŋ.
21 Mbo heelu ndu mbo hiau masɛi kpou, kpaayalaŋ kpou, simlachiaa kpou, a wana o wana pɛlnuŋ ladio. Kpaaya Kiliti wo hoo cho ko le teleŋndo hoo le, kɛ o chilaŋ niŋ bɛɛ.
22 Mbo kɛsi vɛlɛ nyɛ o nyɛ o peluŋ ndɔŋ bɛŋgu, nduyɛ mbo siiŋguu ndu wana lebollo le nyɛ o nyɛ cho o kunda wanaa laalaŋnda niŋ.
23 Kundaa hoo cho yɛ dialuŋ ndɔŋ ni. O cho o piaa cha a suliŋnda ndɔlaŋ.
