Ɛfisiaŋnda 2:1-22
2 Mi che bɛɛ la wa wanaa vilɛi o hakila nyalaŋ niŋ, kɛ mi Mɛlɛka miŋgi nya yoomu.
2 La wa paandu sɔɔŋ tosaa maa waŋnda o chieeŋndo hoo niŋ. Nduyɛ mɛɛ masa nɔ kpaayaa hueiye choo wo tosa sɔɔŋ yɛ, lende koni nya wa muŋ tosaa ni. Hueiyii keŋ cho nyina cho wallo a wanaa nilakaluaa wa ni.
3 A tonya, naa kpou lende naŋ wa ni. Ŋ wa yeemaŋ naŋ ŋdialloŋ tolɔɔ kɔɔli. Nduyɛ nyɛ ndoo huŋ naa o lebollo, ndu naŋ tosa ni. Chɔŋ a violɔŋ naa, kɔl tuu Mɛlɛkaa wa naa choo maa waŋnda a tuaa.
4 Kɛ Mɛlɛka cho wana inyiɛɛ bɛndu. Nduyɛ le mɛɛ o kaala naa tau yɛ,
5 mbo miŋgi naa yoomu naa Kiliti waa, mi che bɛɛ ŋ wa a vilɛiya o hakilaŋ niŋ. Le kɛndɛi bɛnduii Mɛlɛkɛi nya sɔla pioŋɔɔ ni.
6 Mi Mɛlɛka miŋgi naa yoomu naa ndaa latulu. Okoŋ, mbo ke naa fondaŋnda chalaalaŋ o choo choo niŋ le mɛɛ naŋ cho diompilɛ a Chiisu Kiliti yɛ.
7 Mɛlɛka tosa hei le chɔmndo maa o chieeŋ sɛnɛi cho hunɔɔ wo niŋ, o cho naa kɛndɛi nduɛi bɛnduii hiou kpou ve tosal, le mɛɛ naŋ cho diompilɛ a Chiisu Kiliti yɛ.
8 Kɛndɛi hei tosa ni mi la sɔla pioŋɔɔ sanaa a laalaŋ nya dɔu o Mɛlɛka niŋndo. La tosa wali le hei le, kɛ Mɛlɛka dɔu nya sala ni.
9 Lelaŋ, la nɔ mi la kelu yoŋgaa le hei le, kanifuule o cho wali le nya tosa le.
10 Mɛlɛka chɔu naa ni, nduyɛ mbo toosiaa naa miŋ wa diompilɛ a Chiisu Kiliti le walta kɛndɛlaŋ tosaa. Paandu pa Mɛlɛka kɛɛsiaa sɔɔŋ muŋ ni le miŋ tosa muŋ.
11 Lelaŋ, la loonuŋ maa la cho ŋChuu le. Nduyɛ wanaa sɔla hivi chiɛi kɔɔlioo wa cho nya veeloo aa wanaa sɔla hivi chiɛi kɔɔli le wa, le hivi chiɛi kɔɔli ŋdial nda sɔla wo.
12 A boondii keŋ, nyaa sina Kiliti le. La ve ŋpilachiee Isɔluɛiya tɛɛŋ te. Mialla nya wa ni le kpemala Mɛlɛka yii laŋ. Nyaa nɔ tiindaŋ te. Nduyɛ nyaa sina Mɛlɛka o chieeŋndo hoo niŋ te.
13 Kɛ suŋ suŋ niŋ, la cho diompilɛ a Chiisu Kiliti. La wa paandu landaŋ a Mɛlɛka, kɛ kooma Kiliti waŋ ma tosa mi la sɔɔŋguu ndu ikɛi.
14 Ndu hiŋ a kɔl nyuloo ni. Ndu pɛl kpaki ndoo piɔu kundala tiɔɔŋndaŋ tɛɛŋndo ni, okoŋ mbo miŋgi laŋ kundaa opilɛ.
15 Piɔm o sɔla wo faŋa Sawala* tosa mi yaamɔɔleŋ le wa kundala tiɔɔŋndaŋ tɛɛŋndo ni. Mbo tosa mi kundala tiɔɔŋndaŋ ndaŋ la miiŋgu diompilɛ a ndu. Okoŋ, mi la simnuŋ kunda sɛnɛiyo opilɛ,* nduyɛ mi kɔl nyuloo miiŋgu laŋ tɛɛŋ.
16 Piɔm o sɔla o yɔm imɔnɔɔ* choo wo tosa ni mi yaamɔɔle wa kundala tiɔɔŋndaŋ ndaŋ tɛɛŋndeŋ le chuu, okoŋ mi la miiŋgu diompilɛ a Mɛlɛka.
17 Mbo huŋ dimul nya wa landaŋ a Mɛlɛka wa, a wanaa wa Mɛlɛka kpɛɛluŋ nda yooŋgu kɛndɛ kɔl nyuloo.
18 Kundala tiɔɔŋndaŋ ndaŋ la nɔla mi la piɛi o Finyaa lo sanaa o ndu niŋ, kanifuule nyina diandaa pilɔɔ kpe naŋ sɔla ni.
19 Lelaŋ, la cho lɛ ŋmial te. Kɛ pilachieeya nya cho niŋ ni maa wanaa laalaŋaa* Mɛlɛkaa. Nduyɛ yuŋgu pilɔɔ nya cho niŋ a wanaa Mɛlɛkaa ni.
20 Chiyii kiilaa a wanaa ndaa suaa le Mɛlɛka wa kila ve, lechoo nya sɔla taŋgulɔŋndo ni. Nduyɛ Chiisu Kiliti pila cho pou kpeekpei saa chiɛiyo wo ni.
21 Chiɛi taŋguluŋ hoo wo, nyɛ o nyɛ o nɔ cho o mɔɔsaŋ naapilɛ nyɛkɛndɛi. Nduyɛ le mɛɛ chiɛiyo hoo cho diompilɛ a Kiliti yɛ, o cho hindɔɔ le mbo simnuŋ chiɛi Chɛhowa* wo.
22 Le mɛɛ nya cho diompilɛ a ndu yɛ, mi Mɛlɛka mɔɔsa nya a waŋnda a piliaa o chiɛiyo opilɛ niŋ, kanifuule nyina ndɔɔ cho loŋ.
Tɛɛsiaalaŋ
^ Koŋ cho ni, Sawala Mɛlɛka ke Muuse laŋ.
^ Kilikiiye, “wana sɛnɛiyo opilɛ.”
^ Tofa Tɛɛsiaa.
^ Kilikiiye, “wanaa diandaa.”
^ Tofa Tɛɛsiaa.
