Ɛfisiaŋnda 3:1-21
3 Le hei, ya Pɔɔl, I cho o biyɔɔ niŋ le mɛɛ ya cho le Chiisu Kiliti, nduyɛ mi wa nya wanaa cho ŋChuu le wa malaa yɛ.
2 I laalaŋ maa la tuei niŋ a wali Mɛlɛka ke ya le nya dimullo a kɛndɛi nduɛi bɛnduei okɔɔ wo.
3 A mɛɛ ya poonyial nya niŋ paandu chobe a ndi okɔɔ yɛ, mi Mɛlɛka chɔm ya suɛi viaŋnaŋnde.
4 Lelaŋ, te la veelu pɛ diomndaŋ o yauwo hoo niŋ, la cho sina mɛɛ ya nɔ sinapɛŋgoo a suɛi viaŋnaŋii cho a Kiliti okɔɔ ve yɛ.
5 O paandoo niŋ, Mɛlɛka chɔm waŋnda suɛi viaŋnaŋnde hei kpendekele le. Kɛ hau, o cho kiilaa a wanaa suaa le ndu wa ndi chɔmndo kpendekele sanaa a nyina diandaa.
6 Suɛi viaŋnaŋii keŋ cho hei ni: Wanaa cho ŋChuu le wa, kɛ ma wa o diompilɔɔ niŋ a Chiisu Kiliti wa, a cho hunɔɔ sɔla nyɛm kɛŋ o sɔla woŋ, okoŋ ma simnuŋ dialle ipilɛ. Nda bɛɛ cho hunɔɔ nyɛm Mɛlɛka chuel naa buŋgɛi yoŋ sɔla o sabu yooŋgu kɛndɔɔ niŋ.
7 Mi Mɛlɛka tosal la kɛndɛi nduɛi bɛnduei, okoŋ mi simnuŋ buɛiyo le waŋnda yooŋgoo hoo dimullo. Nduyɛ mbo ke ya kpaayaa le ndu tosaa.
8 O wanaa laalaŋnda* tɛɛŋ kpou, ya cho o sɔvɛ tau le ni. Kɛ a koŋ kpou, mi Mɛlɛka tosal la kɛndɛi nduɛi bɛnduei, le mi dimul wanaa cho ŋChuu le wa yooŋgu kɛndɔɔ a salala bɛndula cho a Kiliti okɔɔ laŋ, la wana nɔla ma sina pɛŋgu le laŋ.
9 Okoŋ kɔɔli, suɛi wa hei i viaŋnaŋ le teleŋ vilɛiye, I cho tosa mi waŋnda che mɛɛ Mɛlɛka toosiaa nyɛ o nyɛ fee wo cho ndi chɔɔmuu yɛ.
10 Hei yɔŋnuŋ le mi kunda wanaa laalaŋnda tosa mi masɛi, a wanaa nɔ kpaayalaŋ o choo choo niŋnda sina mɛɛ Mɛlɛka cho wana taasi bɛndu o nɛi o nɛi niŋ yɛ.
11 Nyɛ ndupila kɛɛsiaa paandu pa le tosaa wo, o Masanɔ naa Chiisu Kiliti niŋ ndoo nɔ le peelɔŋndo ni.
12 Nduyɛ laalaŋ naŋ dɔu o ndu niŋndo tosa ni miŋ wa fɛɛsɛŋ le suɛi, a piɛileŋ o Mɛlɛka lo a kɔl naa kpou.
13 Lelaŋ, I cho nya nyɔɔloo maa la wu ŋdial le mɛɛ ya cho nyɛpalaa sɔlaa le nya yɛ le. Kanifuule, nyɛpalaa hoo cho wa tɔnɔɔ le nya.
14 Le saboo hoo ya beŋ Finya naa wulaŋ o piɛileŋ niŋ ni.
15 Kanifuule, ndu tosa ni mi yuŋgulaŋ o choo choo niŋ a o lɛŋndeŋ choo kpou la wa.*
16 I cho piɛileŋ maa le mɛɛ o cho Mɛlɛka bɛndoo yɛ, maa o soliŋ nyina ndɔ diandaa kpeku le nya yoomuaŋ lueiyo fɔ!
17 Nduyɛ I cho piɛileŋ maa laalaŋ nyaa, a kaala nya nɔ wo tosa mi Kiliti chal o kɔlta nyalaŋ niŋ fɔ! Maa laalaŋ nyaa luɛi puundoŋ, nduyɛ mbo chal o chiyii kala kalɛi choo fɔ!
18 Okoŋ, nya wanaa laalaŋnda* kpou, la tiuba mi la sina pɛŋgu mɛɛ kpɛ tonyaa toŋgu yɛ, mɛɛ o bandu yɛ, mɛɛ o hel lɛ, a mɛɛ o yiŋgila yɛ.
19 Nduyɛ mi la sina kaala Kiliti wo, o hiou dɛnɛ sinaa wo, le halikpeŋ mi la sɔla suliŋnda Mɛlɛkalaŋ kpou.
20 Mɛlɛka tosa mi kpaaya ndɔɔ wa wallo o naa niŋndo, o nɔla mbo tosa mbo hiou bɛɛ nyɛ naŋ nyuna ndu wo poloŋ, ɔɔ nyɛ naŋ tuunuŋ o kɔl lo.
21 Lelaŋ, le nyɛ o tosa le kunda wanaa laalaŋnda a Chiisu Kiliti wo, maa waŋnda kpou saŋgala ndu le fɛɛŋ a fɛɛŋ fɔ! Amiina.*
Tɛɛsiaalaŋ
^ Kilikiiye, “wanaa diandaa.”
^ Ɔɔ “sɔla diolaŋ.”
^ Kilikiiye, “wanaa diandaa.”
^ Koŋ cho ni, i yɔŋnuŋ lende fɔ.
