Ɛfisiaŋnda 4:1-32
4 Lelaŋ, ya cho hoo o biyɔɔ niŋ le Masanɔɔ wo, I cho nya nyɔɔloo maa la wa kɔlaŋ sanaa o nɛi chɛlaŋ a veelu nya sɔla wo choo.
2 La wa wanaa tusiaŋnda teleŋ o teleŋ. La nɔ kaa mɔɔsɔlɔɔ wo a kaa biuwaŋndo. La biuwaŋ vellaa velle o kaalaa niŋ.
3 Nyina Mɛlɛkaa chii tosa mi la wa diompilɛ. Lelaŋ, la kindiŋ o nɛi o nɛi niŋ le hiouwɔɔ lachi a waa o diompilɔɔ niŋ, nduyɛ mi kɔl nyuloo wa nya tɛɛŋ vellaa velle.
4 Kundaa* opilɛ kpe cho ni. Nduyɛ nyina diandaa opilɛ kpe cho ni. Fanda Mɛlɛka veelu nya le sɔlaa wo bɛɛ, ndupilɛ kpe cho ni.
5 Masanɔɔ opilɛ cho ni. Laalaŋndo opilɛ cho ni. Nduyɛ yiŋɔɔ opilɛ kpe cho ni.
6 Mɛlɛka cho Finyaa le waŋchieeya kpou wo, ndupilɛ kpe cho ni. Ndu cho nyɛ o nyɛ fee bolleŋ ni. O nɔ kpaayaa nyɛ o nyɛ fee choo.
7 Mɛlɛka tosal naa pilɛŋ pilɛŋnda kɛndɛi nduɛi bɛnduei. Nduyɛ, mɛɛ wana o wana nɔ le sɔlaa yɛ, lende Kiliti piɔu ni.
8 Yau Mɛlɛkaa dimi aa: “Mɛɛ o hel choo choo pɔɔli, mbo soli wanaa wa o biyɔɔ niŋnda. Mbo yɔŋgu waŋnda le kundaa maa ke.”
9 Dimioo hoo aa mbo ‘hel choo choo,’ yɛɛnɛ o sim yɛ? Koŋ sim ni maa o tol fɛlɛŋ lɛŋ o chieeŋndo choo.
10 Wana tol hoo lɛŋ ndo, ndu koni hel vɛlɛ choo choo di di ni. O tosa hei le mbo peelu nyɛ o nyɛ.
11 Mbo yɔŋgu apum le ma wa kiilaa, apum le ma wa wanaa suaa le Mɛlɛka wa, apum le yooŋgu kɛndɔɔ dimioo, apum le kundaa mandaa, apum yɛ, le waŋnda pɛɛkoo.
12 O tosa hei le wanaa laalaŋnda* miŋgioo o nɛi,* le wali Mɛlɛkaa tosaa, nduyɛ le ma taŋgul dialuŋ Kiliti woŋ.
13 Te hei yɔŋnuŋ pɛ, teleŋ cho fuuluu mi naa kpou nɔ laalaŋ pilɔɔ, a sinapɛŋgu pilɔɔ a Po Mɛlɛkaa okɔɔ. Ŋ cho simnɔŋ kaasoŋnda, okoŋ kɔɔli, miŋ simnuŋ kɛsɛ maa Kiliti.
14 Lelaŋ, ŋ waŋnuŋ lɛ maa ŋchuaambɔ le. Ŋ chɛlnuŋ mi wanaa pɛɛkaa lachoowaa hui naa, nduyɛ ma hiŋ naa hɔlla mɛɛ mɛŋndaŋ ma hiiluu nuaa dɛndɔɔ yoŋgbaŋ yoŋgbaŋ yɛ le.
15 Kiliti cho naa bolleŋ ni. Lelaŋ, ŋ nɔ miŋ dimi tonyaa, nduyɛ miŋ chɔm kaalaa o nyɛ o nyɛ niŋ. O hei niŋ, ŋ nɔla miŋ simnuŋ ŋkaasoŋ sanaa o ndu niŋ.
16 Ndu tosa ni mi faluŋ yɛ yiɔɔŋ o dialloŋ niŋ wa ŋ chiiŋiaa naapilɛ, le miŋ tosa wallo diompilɛ a boondoŋ. Te falii kɛ kɛ tosa pɛ wallo nyɛkɛndɛi, hei tosa mi dialloŋ kpou hindu. Nduyɛ, miŋ hiou lachi a taŋgulɔŋndo o kaalaa niŋ.
17 Lelaŋ, I cho nya silaa o Masanɔɔ niŋ maa kelala nyalaŋ la wa lɛ maa waŋnda o chieeŋndo niŋ te. Kanifuule, sɔɔŋ fondoŋ huŋ nda o lebol loŋ nda tosa ni.
18 A cho a sumɛi o kɔlta ndalaŋ niŋ. A nɔ tiindaŋ nda sɔla yoomu Mɛlɛka yɔŋgu wo le, kanifuule a yeema ma sina Mɛlɛka le. Nduyɛ a kendu bɔɔ nilaŋ.
19 Nyɛ o nyɛ cho suɛi nɔɔlɛi, waŋnda haa nɔ lasiɔmbu le ndi tosa le. A bii ma yɔŋguŋ o kaala kɔl vesɛi* suu o suu niŋ. Nduyɛ hiouwɔɔ tuŋ nda cho lachi a laŋ tosaa ni.
20 Kɛ o cho lende le nda pɛɛku nya a Kiliti okɔɔ le.
21 Pɛɛku tonyaa Chiisu pɛɛku nya ni. Nduyɛ te la tuei pɛ nyɛ o pɛɛku nya wo, mɛɛ la sina sɔɔŋ muŋ.
22 La sɔla pɛɛkoo le mi la soliŋ wana chieeyɛi paanduei lekɔɔ. Wana chieeyɛi paanduei hei cho kaala wɔɔŋnda nya wa paandu leniŋ ndaŋ ni. Kaalaŋ ndaŋ la luei nya balaŋ o sɔɔŋ wɔɔŋndoŋ niŋ ni.
23 Lelaŋ, la hiou lachi a simnɔŋndo wanaa sɛnɛiya o yiyaŋnda nyalaŋ niŋ,
24 nduyɛ mi la wounuŋ wana chieeyɛi sɛnɛiye, i Mɛlɛka pila toosiaa o hɛnaŋ ndɔɔ niŋnde. Okoŋ mi la wa sakpo, nduyɛ mi la wa lɔɔlɔɔ le Mɛlɛka.
25 Mɛɛ nya mal niŋ choolaŋ dimioo yɛ, la soo tonyaa naa chaaŋaa nyaa chua. Kanifuule, faluŋ pilɔŋ naŋ cho vellaa velle o dialloŋ niŋ ni.
26 Nduyɛ te a dɔɔnuŋ tumbe pɛ, mandaŋ yɔŋii ŋ tosa hakioo. Lo o tumbe koŋ niŋ haaa mi paaleŋ le del te.
27 La ke Setana* fondaŋ o fondaŋ o kuŋgulaŋ te.
28 Wana tosa viileŋ ndo mal niko viileŋ. Kɛ, o tosa wali kɛndɔɔ, okoŋ mbo sɔla nyɛ le wanaa bala fonduaa malaa.
29 Diom o diom cho diom wɔɔŋ,* o fula nya o sondo le. Kɛ la soo diomnda tiuba mi la taŋgul, nduyɛ mi la mala waŋndo laŋ.
30 La wa nyina Mɛlɛkaa kɔllo tɛɛmbuuwo* le. Kanifuule, ndu Mɛlɛka handu nya choo ni maa tamasi, haaa mi paale o cho nya baŋa leŋ le fuuluu.
31 La mal nɛiyɔŋndaŋ, kɔl tuuwo, kɔl biŋgioo, deŋioo a tumboo, diomnda wɔɔŋndaŋ dimioo, a nyɛ o nyɛ cho suɛi wɔɔŋ.
32 Kɛ la tosalaŋ kɛndɛi vellaa velle, mi la nɔ nyiɛɛye. La malnaŋ lahaki fasɛi, mɛɛ Mɛlɛka bɛɛ mal nya haki fasɛi o Kiliti niŋ yɛ.
Tɛɛsiaalaŋ
^ Kilikiiye, “dialle.”
^ Kilikiiye, “wanaa diandaa.”
^ Ɔɔ “pɛɛkoo.”
^ Ɔɔ “sɔɔŋ lasiɔmboŋ.” Kilikiiye, asɛlchiaa. Tofa Tɛɛsiaa.
^ Kilikiiye, diabolos. O sim le “wana tɛɛmbuu acheleŋnda tɔɔ wo.”
^ Ɔɔ “siouwɛi.”
^ Ɔɔ “Mɛlɛka kɔllo tɛɛmbuuwo a mɛɛ nya simul kpaaya ndɔɔ yɛ.”
