Ɛsilua 1:1-11
1 Wɔsi tase Sailɔɔ, masaa le Paasiaa wa o masaleŋ choo wo, mi Chɛhowa tosa mi Sailɔɔ, masaa le Paasiaa yonda o tanda masale ndɔleŋ niŋ kpou, le mi nyɛ Chɛhowa dimi sanaa a Chɛluimaya wo peeluŋ. Nduyɛ mbo poonyiaa vɛlɛ aa:
2 “Nyɛ Sailɔɔ, masaa le Paasiaa dimi wo cho hoo ni, ‘Chɛhowa, Mɛlɛka toosiaa choo choo wo ke ya masɛi kpou o chieeŋndo choo. Nduyɛ, o dimul la le mi teŋgul ndu chiɛiyo Chulusalɛm o Chuda niŋ.
3 O nya tɛɛŋ naŋ kpou, o nɛɛnɛ cho yɛ mbo wa le Mɛlɛka? Maa Mɛlɛka wa a ndu latulu nduyɛ mbo kuɛ Chulusalɛm o Chuda niŋ, mbo kɔ miŋgi chiɛi Chɛhowa wo, Mɛlɛka Isɔluɛiya taŋgul. Ndu cho Mɛlɛka tonyaa ni, nduyɛ Chulusalɛm chiɛi ndɔɔ wa ni.*
4 Wana o wana cho miallo, nduyɛ ba o ba o wa, wanaa nda chiɛɛliaŋ nda nɔ ma mala ndu. A nɔ ma ke ndu kaniŋ humboŋ, kooliiyoŋ, nyɔɔŋ, chɔluaa, vɛlɛ a kela nda kɛɛsiaŋ o kɔl taŋ le chiɛi Mɛlɛka tonyaa, o wa Chulusalɛm ndo.’”
5 Okoŋ, mi yuŋgula leboltaŋ o kaale Chuda leŋ choo a kaale Bɛŋjamiŋ ndeŋ, wanaa soliaa lasalaa, Livaiya, a wana o wana Mɛlɛka tonyaa tosa mi kɔllo yusa ndu bɛɛndiaŋ le kɔlaŋ chiɛi Chɛhowa wo miŋgioo taŋgullo Chulusalɛm.
6 Mi wanaa nda chiɛɛliaŋ nda kpou toolu nda,* ma ke nda nyɛm nda hau ba woŋ. Okoŋ, ma ke nda nyɛm laanduŋ nda toosiaa a kaniŋ humboŋ vɛlɛ a kooliiyoŋ ndoŋ, nyɔɔŋ, chɔluaa, a nyɛm sɔvɛ sɔviɔŋ, o fulawɔ o nyɛm ndapila kɛɛsiaŋ o kɔl le yɔŋgoo woŋ.
7 Mi Masaa Sailɔɔ huŋ a nyɛm laanduŋ wa o chiɛi Chɛhowa wo niŋ, nyɛm Nɛbukanɛɛsa chua Chulusalɛm mbo kɔ wou muŋ o chiɛi mɛlɛka ndɔɔ niŋndoŋ.
8 Mi Sailɔɔ, masaa le Paasiaa dimul Mitiluɛdati, wana wa nyɛm baa kalaŋ hɔlteŋ ndo le mbo chɔm muŋ kpɛ kpɛ le Siɛsibaasa,* masaa o tanda Chuda wo niŋ.
9 Nyɛm o chɔm ndoŋ wa muŋ ni: nyɛm laanduŋ nda toosiaa a kooliiyoŋ ndoŋ kambɛilaŋ 30, nyɛm laanduŋ nda toosiaa a kaniŋ humboŋ ndoŋ 1,000, nyɛm laanduŋ cheleŋndoŋ 29,
10 hɛŋgɛila pɔmbɔla nda toosiaa a kooliiyoŋ ndaŋ 30, hɛŋgɛila pɔmbɔla nda toosiaa a kaniŋ humboŋ ndaŋ 410, a nyɛm laanduŋ cheleŋndoŋ 1,000.
11 Nyɛm laanduŋ nda toosiaa a kooliiyoŋ vɛlɛ a kaniŋ humboŋ ndoŋ wa kpou kpou 5,400. Mi Siɛsibaasa huŋ a nyɔɔŋ muŋ kpou, mɛɛ waŋnda wa fulaa o chɛleŋ niŋ Babilɔŋ ma wa miiŋgoo Chulusalɛm.
Tɛɛsiaalaŋ
^ Ɔɔ naapum, “Chulusalɛm chiɛi ndɔɔ cho ni.”
^ Hibuluiye, “kindi nda balaŋ.”
^ Naapum, ndu cho Sɛlubabɛl o Ɛsiluaa 2:2 a 3:8 niŋ ni.
