Ɛsilua 3:1-13
3 Mɛɛ paŋgii ŋɔmmɛu ve fuuluu, mi Isɔluɛiyaa* wa ichali o chieeŋ ndaŋ bɛndoŋ niŋnda kpou chuuŋgiaŋ Chulusalɛm.
2 Mi Chɛsuaa po Chɛhosadaki wo, a chaaŋaa nduaa wanaa soliaa lasalaa, a Sɛlubabɛl po Siaatiɛɛ wo, a puaapiliaa nduaa taŋgul bandu luamaa lasalaa le Mɛlɛka Isɔluɛiya, le ma wa salala luamaa laŋ solioo lechoo a mɛɛ i cho i poonyiaa o yau laSawa Muuse, wana Mɛlɛka tonyaa wo niŋ yɛ.
3 Ma miŋgi bandu luamaa lasalaa taŋgul o fondaŋ o wa paandu wo, mi che bɛɛ a wa siooŋnde le wanaa balu nda wa. Okoŋ, ma kandu salala luamaa laŋ solioo lechoo o Chɛhowa lo idii a ichɔl.
4 Okoŋ kɔɔli, ma bii Bɔŋaŋ laBafɛiyo* a mɛɛ i cho i poonyiaa yɛ. Nduyɛ lepaa o lepaa, mi ndaa soli salala luamaala wa nda kuee le solioo paale leŋ ndaŋ.
5 Chɔŋ niŋ a teleŋ koŋ, mi ndaa soli salala luamaa laŋ teleŋ o teleŋ, a salala paŋguŋ sɛnɛilaŋ. Mi ndaa soli vɛlɛ salalaŋ o bɔŋaŋnda bɛndula Chɛhowa laŋ choo o wɔsioo niŋ, vɛlɛ a salala waŋnda ndaa yɔŋguŋ a kɔl ndaa kpou le solioo o Chɛhowa lo laŋ.
6 Chɔŋ o paale taseleŋ choo o paŋgii ŋɔmmɛu ve niŋ, ma kandu salala luamaa laŋ solioo o Chɛhowa lo, mi che bɛɛ ndaa kila wɔ chiyii chiɛi Chɛhowa wo le.
7 Ma ke wanaa kialu poutaŋ nda a wanaa chaa nyɛ a laba wa kanioŋ.* Ma ke vɛlɛ Saidoniaŋnda a waŋnda Taaya nyɛdiaa, muɛiyaŋ a chuɛiyaŋ, le mɛɛ nda hiŋ a yɔmii sida ve yɛ. Nduyɛ, Lebanɔŋ nda chɛŋ a ndi ni ma kei a ndi o pee mɛŋma ihɛllo choo, ma huŋ a ndi Chopa, a mɛɛ Sailɔɔ masaa le Paasiaa dimul nda yɛ.
8 Wɔsi diiŋ ndɔɔ o paŋgii diiŋ nduɛi niŋ, ma kua o chiɛi Mɛlɛka tonyaa Chulusalɛm. Nduyɛ mi Sɛlubabɛl po Siaatiɛɛ wo, Chɛsuaa po Chɛhosadaki wo, a puaapiliaa ndaa, wanaa soliaa lasalaa, Livaiya, a wanaa fula o biyɔɔ niŋ ma miiŋgu Chulusalɛm nda kpou kandu wallo. Ma yulu Livaiyaa wa wɔsilaŋ chɔŋ 20 kɔ kɛ wa iso, le ma wa wali wa tosaŋndo le chiɛi Chɛhowa wo taŋgullo wo hɔlteŋ.
9 Okoŋ mi Chɛsuaa, puaa nduaa a puaapiliaa nduaa, a Kadimiɛɛ nda puaa nduaa, a fula o pulale Chuda leŋ choo wa bɛɛ sɔɔŋguu, le wali wa tosaŋndo le chiɛi Mɛlɛka tonya wa taŋgulɔŋndo wo hɔlteŋ. Puaa Hɛnadadi wa, puaa ndaa a puaapiliaa ndaa, vɛlɛ a Livaiya bɛɛ wa a nda latulu.
10 Mɛɛ wanaa taŋgulaa kila chiyii chiɛi Chɛhowa wo, mi wanaa soliaa lasalaa wounuŋ nyɛla ndala soliaa lasala laŋ, ma chua bululaŋ, nduyɛ mi Livaiya, a fula o pulale Asafi leŋ choo wa chua kumbula ŋchiliŋndaŋ, ma sim o fondaŋnda ndalaŋ le Chɛhowa saŋgalaa, a mɛɛ Deeve, masaa le Isɔluɛi ndoo dimi yɛ.
11 Nduyɛ ma kandu chondei solioo ma saŋgala Chɛhowa a ndu balikaa mello, “kanifuule o cho wana kɛndɛ, nduyɛ kaala lo lechoo ndɔɔ le Isɔluɛi cho le fɛɛŋ a fɛɛŋ.” Okoŋ, mi waŋnda kpou deŋi choo choo a nyaaloo le Chɛhowa saŋgalaa, le mɛɛ chiyii chiɛi Chɛhowa wo chuu taŋgullɛ.
12 Mi wanaa soliaa lasalaa bɔɔbɔɔ, Livaiya, wanaa wa yuŋgula leboltaŋ nda, a wa falla nduyɛ ma cha chiɛi paandoo wa chaŋ choo choo kpeleŋ, mɛɛ nda che mi chiyii chiɛi Mɛlɛkaa chuu taŋgul. Kɛ a bɔɔbɔɔ wa deŋioo choo choo a nyaaloo.
13 Le hei, wanaa sina teŋgeŋndo deŋi waŋnda wa a nyaaloo wo tɛɛŋ a chaŋnda nda wa laŋ te. Kanifuule, waŋnda wa deŋioo choo choo kpeleŋ, nduyɛ wanaa lo landaŋ ma tuei.
