Ɛsilua 4:1-24
4 Mɛɛ yaamɔɔwa le kaale Chuda leŋ a kaale Bɛŋjamiŋ ndeŋ tuei maa wanaa wa o biyɔɔ niŋ ma miiŋgu wa cho chiɛi Chɛhowa, Mɛlɛka Isɔluɛiya taŋgullo,
2 o lepilɛ niŋ kpe, ma kua naa Sɛlubabɛl chua a wanaa wa yuŋgula leboltaŋ nda, ma dimul nda aa: “La ŋ taŋguluŋ naa nyaa latulu, kanifuule naa bɛɛ Mɛlɛka nyaa naŋ piɛi* ni, nduyɛ ŋ cho niŋ salalaŋ solioo o ndu lo chɔŋ a teleŋ Ɛsa-hadɔŋ, masaa le Asiiliaa hiŋ a naa nanuŋ ndo.”
3 Kɛ mi Sɛlubabɛl, Chɛsuaa, a yuŋgula leboltaŋ kpou o Isɔluɛi niŋ dimul nda aa: “Ŋ cho chiɛiyo hoo taŋgul naa nyaa le Mɛlɛka naa le. Naapila cho ndu taŋgul le Chɛhowa, Mɛlɛka Isɔluɛiya ni, a mɛɛ Sailɔɔ, masaa le Paasiaa dimul naa yɛ.”
4 Le hei, mi wanaa balu Chuuwa wa hiau lachi a Chuuwa kɔllo tɛɛmbuuwo,* le halikpeŋ ma vi ŋdial, okoŋ ma mal taŋgul nda kandu wo.
5 Ma luɛi luɛiyɔɔ niŋndo o masaa waa lo le ma kuuna Chuuwa wali nda wa tosaa wo. Hei yɔŋnuŋ chɔŋ o palɛi Saliɔɔ, Masaa le Paasiaa ve niŋ, haaa mɛɛ mi Daaliɔɔ simnuŋ masaa le Paasiaa.
6 Mɛɛ Ahasilɔɔ kandu masaleŋ, ma poonyiaa yauwo a Chuuwa Chulusalɛm a haa Chuda okɔɔ, nduyɛ ma hɛɛnduu nda sɔɔŋ choo o yau koŋ niŋ.
7 Nduyɛ teleŋ Atasaasi, masaa le Paasiaa wa o masaleŋ choo wo, mi Bisilami, Mitiluɛdati, Tabiyɛɛ, a chaaŋaa ndaa poonyiaa yauwo o Masaa Atasaasi lo. Ma hivi yau koŋ o Aluamakiiye niŋ, nduyɛ a chomulta ma Aluamakiilaŋ nda poonyiaa ndu ni.*
8 *Mi wana bɛndu pilɛ o masaleŋ niŋ diolaŋ Luɛhum, a Simisai wana poonyiaa, poonyiaa yauwo a Chulusalɛm okɔɔ, ma yɔŋ o Masaa Atasaasi lo.
9 (Wanaa poonyiaa yauwo hoo wa cho haa ni: Luɛhum wana bɛndoo o pilɛ o masaleŋ niŋ, Simisai wana poonyiaa a chaaŋaa ndaa, wanaa kialaa ŋyamaa, waŋ banaa cheleŋ, wanaa poonyiaa, waŋnda Ɛluɛchi, Babiloniaŋnda, Ɛlamaitiiya a wa ichali Susa wa,
10 kayii cheleŋnde i Asɛnaapa, masa bɛndu ndoo nɔ kpaayaa wo bii mbo kɔ kɛsi nda o chieeŋ bɛndoŋ Sameeliaa ve, a wanaa cheleŋaa wa o Pee Bɛndoo Leeloo* wa.) Nduyɛ,
11 nyɛ nda poonyiaa o yau koŋ niŋ ma yɔŋ ndu wo cho hoo ni:
“Masaa Atasaasi, buɛiyaa numnda cho num yauwo hoo poonyiallo ni, wanaa cho o Pee Bɛndoo Leeloo wa: Nduyɛ
12 masanɔ naa, ŋ yeema num ma sina maa Chuuwaa chɛŋ loŋ o numndo wa, a fuuluu Chulusalɛm. Chiee dɛnɛ wɔɔŋ nɔ hoo bolle kalaleŋ ndo, waŋnda haa cho ndu miŋgioo taŋgullo. Nduyɛ a cho niŋ le kpakila cho loŋ ndaŋ chiiyo taŋgullo, a chiyuŋ chioo miŋgioo bɛɛndiaa.
13 Masanɔ naa, ŋ yeema num ma sina maa te waŋnda haa chii pɛ chioo hoo a kpakila ndɔlaŋ taŋgul, a yɔŋgu lɛ niŋ paawa kɛ kɛ le, nduyɛ keŋ cho tosa masaa* ve lɛ niŋ nyɛsɔlaa bɔɔ sɔla le.
14 O bɛnda miŋ che tɔnɔ cho le masanɔ naa wo tambei le, kanifuule o chiɛi lemasaa niŋ naŋ sɔla paawa* naa ni.* Le hei naŋ yɔŋ yauwo ni le mi masanɔ naa sina a ndi okɔɔ.
15 Lelaŋ, tosa yaasiaa o yau nda poonyiaa konala wanaa keeku num lachi wa wo niŋ. O yau koŋ niŋ, a cho saalɔŋ maa chiee bolle kalaa chioo hoo cho ni, nduyɛ maa a yeŋ masaa a waŋ banaa cho o tanda ndɔɔ niŋnda lani le. Masaleŋ wanaa cho o chioo hoo niŋnda simul ni chɔŋ o sindɔɔ niŋ. Le sabu koŋ chioo hoo sɔla tambei ni.
16 Masanɔ naa, ŋ yeema num ma sina maa te waŋnda haa chii pɛ chioo hoo a kpakila ndɔlaŋ taŋgul, a nɔ lɛ niŋ wanaa cho o Pee Bɛndoo Leeloo wa kpaaya* choo le.”
17 Mi masaa yɔŋ Luɛhum, wana bɛndoo o pilɛ o masaleŋ niŋ, Simisai wana poonyiaa, a chaaŋaa ndaa kpou a wa ichali Sameeliaa wa a haa o Pee Bɛndoo Leeloo. Mbo yil nda aa:
“Lawosɛ!
18 A veelul la diomndaŋ nyɛkɛndɛi o yau nya poonyiaa wo niŋ.*
19 Mi dimul waŋnda ma tosa yaasiaa. Nduyɛ ma saaluŋ maa chɔŋ o sindɔɔ niŋ, chiee simul masaa waa wo o cho ni. O fulawɔ okoŋ kɔɔli, chioo hoo nɔ bolle kalaleŋ, nduyɛ sɔŋgɔla chuu loŋ te.
20 Masaa kpaaya bɛnduaa wa paandu o masaleŋ choo Chulusalɛm ni, nduyɛ wanaa wa o Pee Bɛndoo Leeloo wa kpou, nda o ba bɛŋgu nda wa ni. O nda lo ndaa yɔŋgu paawa kɛ kɛ ni.
21 Le hei, la kuuna puaa kaŋ wali koŋ. A taŋgul chiee koŋ te haaa mi dimul nda le ma miŋgi ndu taŋgul.
22 Lelaŋ, la pisul a suɛi hei le, yɔŋii tɔnɔ cho le masaleŋ ndo tambu.”
23 Le hei, mɛɛ Luɛhum, Simisai wana poonyiaa a chaaŋaa ndaa veelu diomndaŋ o yau Masaa Atasaasi yɔŋ nda wo niŋ, ma chaŋ o lepilɛ niŋ kpe, ma kua Chulusalɛm le Chuuwa kuunaa wallo.
24 A teleŋ koŋ Chuuwa mal chiɛi Mɛlɛkaa taŋgullo Chulusalɛm ni. Nduyɛ mbo lo lende haaa mɛɛ wɔsi diiŋ ndɔ Daaliɔɔ, masaa le Paasiaa wa o masaleŋ choo wo.
Tɛɛsiaalaŋ
^ Hibuluiye, “nuuviaa.”
^ Hibuluiye, “dialloŋ diyɔɔ.”
^ Ɔɔ naapum, “o Aluamakiiye niŋ nda poonyiaa ndu ni okoŋ ma hivi ndu.”
^ Chɔŋ Ɛsilua 4:8 haaa 6:18, o Aluamakiiye niŋ nda poonyiaa ndu ni.
^ Pee bɛndoo leeloo sim le tanda cho o Pee Bɛndoo Yufiluaati ba paaleŋ le del lo.
^ Aluamakiiye, “masaa waa.”
^ Ɔɔ “sala.”
^ Aluamakiiye, “o chiɛi lemasaa niŋ naŋ dia hɛlle ni.”
^ Aluamakiiye, “a sɔla lɛ niŋ nda nyɛ o ba le.”
^ Ɔɔ naapum, “a hivi ndu ma veelu diomndaŋ leniŋ.”
