Ɛsilua 5:1-17
5 Okoŋ, mi wanaa suaa le Mɛlɛka wa Hakai nda Sɛkalaya, po mama Idɔɔ wo dimul Chuuwaa wa ichali Chuda a Chulusalɛm nda yooŋgu Mɛlɛkaa, o diola Mɛlɛka Isɔluɛiya niŋ, o wa a nda latulu wo.
2 A teleŋ koŋ, mi Sɛlubabɛl po Siaatiɛɛ wo, a Chɛsuaa po Chɛhosadaki wo kandu chiɛi Mɛlɛka miŋgioo taŋgullo, o wa Chulusalɛm ndo. Nduyɛ, wanaa suaa le Mɛlɛka wa wa a nda latulu ma wa nda tooloo.
3 Okoŋ mi Tatɛnai, masa ibuŋga wa o Pee Bɛndoo Leeloo* wo, a Siɛta-bosinai vɛlɛ a chaaŋaa nduaa huŋ ma nyuna nda aa: “Nɛɛnɛ ke yɛ nya dioo le chiɛiyo hoo taŋgullo, nduyɛ mi la siou wali ndɔɔ?”
4 Ma nyuna nda vɛlɛ aa: “Ɔɔ diola wanaa cho chilaŋ le wali chiɛiyo hoo wa?”
5 Kɛ hɔlte Mɛlɛka leŋ le wa waŋ banaa Chuuwa choo. Nduyɛ a kuuna nda wallo le, kanifuule ndaa yeema fɛŋ ma poonyial Daaliɔɔ yauwo a hei okɔɔ, okoŋ ma chum mi Daaliɔɔ miŋgul nda lediom o yau o wa nda poonyial lo niŋ.
6 Yau Tatɛnai, masa ibuŋga wa o Pee Bɛndoo Leeloo wo, a Siɛta-bosinai vɛlɛ a chaaŋaa nduaa, a masaa cheleŋ wa o Pee Bɛndoo Leeloo wa yɔŋ masaa Daaliɔɔ wo cho hoo ni.
7 Ma dimi o yau koŋ niŋ aa:
“Masaa Daaliɔɔ:
“Maa wa o kɔl nyulu niŋ fɔ!
8 Masanɔ naa, ŋ yeema num ma sina maa ŋ kuɛ o tanda Chuda wo niŋ o chiɛi Mɛlɛka bɛndoo, nduyɛ miŋ cha maa a cho ndu taŋgullo a pouta bɛndulaŋ vɛlɛ a yɔmnde. Wanaa kaŋ cho wali koŋ tosaa kpeekpei, nduyɛ a cho tuŋ sɛmbɔɔ dɔwɔɔ ma wa hiouwɔɔ lachioo tosaa.
9 Miŋ nyuna wanaa ndaa banaa aa: ‘Nɛɛnɛ ke yɛ nya dioo le chiɛiyo hoo taŋgullo, nduyɛ mi la siou wali ndɔɔ?’
10 Miŋ nyuna nda vɛlɛ le ma chɔm naa wanaa cho nda chilaŋ nda, le halikpeŋ miŋ poonyiaa nda diolaŋ miŋ chɔm num.
11 “Muli nda ke naa wo cho hoo ni: ‘Mɛlɛka toosiaa choo choo a lɛŋndeŋ ndo, buɛiyaa nduaa naŋ cho ni. Nduyɛ, chiɛi masa bɛndoo o pilɛ le Isɔluɛi ndoo taŋgul niŋ le wɔsiŋ bɔɔbɔɔ wo, ndu naŋ cho miŋgioo taŋgullo ni.
12 Finyaa naa mamaa tosa ni mi Mɛlɛka cho choo choo wo duaunuŋ tumbe a nda, mbo tosa mi Nɛbukanɛɛsa, masaa le Babilɔŋ, o cho Kaadiaŋnɔɔ wo huŋ tɛɛmbuu chiɛiyo hoo, nduyɛ mbo kua a waŋnda o biyɔɔ niŋ Babilɔŋ.
13 Kɛ wɔsi tase Sailɔɔ, masaa le Babilɔŋ wa o masaleŋ choo wo, mbo ke naa dioo le chiɛi Mɛlɛkaa miŋgioo taŋgullo.
14 Nduyɛ nyɛm laanduŋ nda toosiaa a kooliiyoŋ vɛlɛ a kaniŋ humboŋ ndoŋ, ŋ Nɛbukanɛɛsa chua o chiɛi Mɛlɛkaa niŋ Chulusalɛm mbo kɔ kɛsi muŋ o maaŋndo niŋ Babilɔŋ ndoŋ, mi Masaa Sailɔɔ chua muŋ o maaŋndo niŋ Babilɔŋ, mbo ke muŋ Siɛsibaasa,* laŋunɔ ndoo siiŋguu masa ibuŋgaa wo.
15 Mi Sailɔɔ dimul ndu aa: “Kɔ a nyɛm laandoŋ muŋ, ma kɔ kɛsi muŋ o chiɛi Mɛlɛkaa niŋ Chulusalɛm, nduyɛ ma tosa a sabu le mi chiɛi Mɛlɛkaa miiŋgu taŋgullɔŋ o fondaŋ o wa paandu wo.”
16 Okoŋ, mi Siɛsibaasa kua mbo kɔ kila chiiyuŋ chiɛi Mɛlɛkaa Chulusalɛm. Nduyɛ chɔŋ a teleŋ koŋ, a cho wɔ tuŋ hiouwɔɔ lachi a ndu taŋgullo. Kɛ a chii wɔ le.’
17 “Lelaŋ te o bɛnda pɛ a num fallo masaa, tosa yaasiaa Babilɔŋ loŋ o fondaŋ nda kɛsi konala lemasalaŋ ndo, le sinaa te mi Masaa Sailɔɔ ke waŋnda haa dioo le chiɛi Mɛlɛkaa miŋgioo taŋgullo Chulusalɛm. Nduyɛ kɛɛsiaa kɛ kɛ ŋ tosa pɛ a suɛi hei okɔɔ, poonyiaa ma yɔŋ naa.”
Tɛɛsiaalaŋ
^ Pee bɛndoo leeloo sim le tanda cho o Pee Bɛndoo Yufiluaati ba paale le del lo.
^ Naapum ndu cho Sɛlubabɛl o Ɛsilua 2:2 a 3:8 niŋ ni.
