Ɛsilua 6:1-22
6 Okoŋ, mi Masaa Daaliɔɔ dimul waŋnda le ma tosa yaasiaa o fondaŋ* nda kɛsi konalaŋ o Babilɔŋ niŋndo.
2 Ma saaluŋ yau simbulaa Ɛkibatana chiee, o tanda Midiaa wo niŋ. Nduyɛ nyɛ wa o poonyiaa leniŋ ndo cho hoo ni:
3 “Wɔsi tase Masaa Sailɔɔ wa o masaleŋ choo wo, mbo poonyiaa yauwo a chiɛi Mɛlɛkaa Chulusalɛm okɔɔ aa: ‘Chiɛi Mɛlɛkaa nɔ mbo miiŋgu taŋgulɔŋ le waa salalaŋ solioo loŋ. Chiiyuŋ ndɔŋ nɔ miŋ wa ŋ taŋgulaa ŋ kala kala. Chiɛiyo hoo nɔ mbo wa helɔɔ nɛiyo 90, a toŋgei nɛiyo 90.*
4 Pulama chiɛiyo hoo ma yaa ma nɔ mi ma wa a pouta bɛndulaŋ, mi le pilɛ le wa a yɔmnde. Nduyɛ, nyɛsɔlaa masaa nda nɔ ni ma chua ma paawa* le nyɔɔŋ muŋ.
5 Nyɛm laanduŋ nda toosiaa a kooliiyoŋ vɛlɛ a kaniŋ humboŋ, mi Nɛbukanɛɛsa chua muŋ o chiɛi Mɛlɛkaa niŋ Chulusalɛm, mbo kua a muŋ Babilɔŋ ndoŋ, a chua muŋ ma miŋgi muŋ o fondaŋ ŋ wa paandu o chiɛi Mɛlɛkaa niŋ Chulusalɛm ndo.’
6 “Lelaŋ num Tatɛnai, masa ibuŋga cho o Pee Bɛndoo Leeloo* wo, Siɛta-bosinai a chaaŋaa nyaa, vɛlɛ a masaa cheleŋ cho o Pee Bɛndoo Leeloo wa, la mal suɛi hei.
7 La paaliaŋ waŋnda le chiɛi Mɛlɛkaa taŋgullo le. Masa ibuŋga Chuuwa a waŋ banaa Chuuwa nɔ ma miŋgi chiɛi Mɛlɛkaa taŋgul o fondaŋ o wa paandu wo.
8 O faŋaŋ okoŋ kɔɔli, nyɛ nya nɔ mi la tosa le mi waŋ banaa Chuuwa miŋgi chiɛi Mɛlɛkaa taŋgullo cho hoo ni: Paawa* nya bii wanaa cho o Pee Bɛndoo Leeloo wa o laba wo, la soliŋ ndu kpeku le mi la ke waŋnda haa ma hiou lachi a taŋgullo nyɛ o nyɛ paaliaŋ nda le.
9 Nduyɛ nyɛ o nyɛ nda hauba pɛ, nauwaa fɔŋnduaa, saa konduaa, a saa fɔŋnduaa le salalaŋ lomɔɔ o Mɛlɛka cho o choo choo niŋndo lo, witiiyoŋ, hɛlle, muɛiyaŋ, a chuɛiyaŋ, a mɛɛ wanaa soliaa lasalaa cho Chulusalɛm nda cho dimi yɛ, la nɔ mi la wa nda nyɔɔŋ muŋ kioo lepaa o lepaa, o pilɛ bɛɛ nɔ mbo lo kɔɔli le.
10 Hei cho tosa ma hiou lachi a salalaŋ solioo le mi Mɛlɛka cho choo choo wo hini kɔl, nduyɛ ma piɛi le mi masaa a puaa nduaa viou yoomu.
11 I yeema nya mi la sina vɛlɛ maa te wana o wana kɛɛ pɛ le nyɛ ya dimi hoo wo tosaa, a cho yɔmndo soli o ndu lo chiɛiniŋ ma landu ndu lechoo, nduyɛ mbo wa loŋ. Okoŋ, mi chiɛi ndɔɔ simnuŋ naa kuaa yondo niŋnda,* le mɛɛ o kɛɛ nyɛ ya dimi wo tosaa yɛ.
12 Masa kɛ kɛ ɔɔ wana o wana kɛɛ pɛ le nyɛ ya dimi hoo wo tosaa, mbo yeema le chiɛi Mɛlɛka cho hoo Chulusalɛm ndo tɛɛmbuuwo, maa Mɛlɛka diolaŋ ndɔlaŋ la cho chiɛiyo hoo choo wo tusi wana koŋ nyɛpalaa choo. Ya Masaa Daaliɔɔ, ya dimi hei ni. Nduyɛ i nɔ mi tosaŋ chɔ chɔ.”
13 Okoŋ mi Tatɛnai, masa ibuŋga wa o Pee Bɛndoo Leeloo wo, Siɛta-bosinai a chaaŋaa ndaa tosa nyɛ o nyɛ Masaa Daaliɔɔ dimul nda.
14 Mi waŋ banaa Chuuwa hiau lachi a taŋgullo, nduyɛ a wa hiouwɔɔ lachioo tosaa. Nyɛ Hakai wana suaa le Mɛlɛka wo, a Sɛkalaya po mama Idɔɔ wo wa dimioo wo wa nda yoomuaŋ lueiyo. Ma chii chiɛiyo hoo taŋgul a mɛɛ Mɛlɛka Isɔluɛiya dimul nda yɛ. Nduyɛ mi Sailɔɔ, Daaliɔɔ, a Atasaasi masaa le Paasiaa bɛɛ ke nda dioo le ndu miŋgioo taŋgullo.
15 Ma chii chiɛiyo hoo taŋgul o paŋgii Ada* ve niŋ malɔ le yaa. Nduyɛ, wɔsi ŋɔmpum ndɔ Masaa Daaliɔɔ wa o masaleŋ choo wo wa koŋ ni.
16 Okoŋ mi Isɔluɛiya, wanaa soliaa lasalaa, Livaiya, a wanaa nda fula o biyɔɔ niŋnda kpou sɔɔŋguu le chiɛiyo hoo malɔɔ Mɛlɛka o ba a kɔl kɛndɛ.
17 Le chiɛiyo hoo malɔɔ Mɛlɛka o ba, ma soli salalaŋ a nauwaa towaa 100, saa konduaa 200, saa fɔŋnduaa 400, nduyɛ ma soli vɛlɛ chuiŋaa tooyiaa 12 sala hakioo le waŋnda Isɔluɛi kpou. Chuiŋnda haa ndaa sim le kaale kɛ kɛ o Isɔluɛi niŋ.
18 Ma piɔu wanaa soliaa lasalaa a Livaiya a kundalaŋ le wallo tosaa o chiɛi Mɛlɛkaa niŋ Chulusalɛm, a mɛɛ i cho i poonyiaŋ o yau Muuse wo niŋ yɛ.
19 O paŋgii tasei niŋ malɔ 14, mi wanaa ndaa fula o biyɔɔ niŋnda bii Bɔŋaŋ Hiouwɔɔ Choo Wo.
20 Mi wanaa soliaa lasalaa a Livaiya dindi ndapila, okoŋ mi nda kpou simnuŋ a diandaa. Ma dii chɔluaa le sala Bɔŋaŋ Hiouwɔɔ Choo Wo le wanaa ndaa fula o biyɔɔ niŋnda kpou, le chaaŋaa ndaa wanaa soliaa lasalaa, a le ndapila.
21 Okoŋ, mi Isɔluɛiyaa fula o biyɔɔ niŋnda dia nyɛdiaa koŋ latulu a wanaa mal kaala nɔɔlɛila lɛŋii cheleŋnde tosa laŋ, ma muliŋ le Chɛhowa, Mɛlɛka Isɔluɛiya piɛiyo* wa.
22 Ma bii vɛlɛ Bɔŋaŋ Beedii Nɔ Yiisii* Leniŋ Te Wo a kɔl kɛndɛ le palɛi i ŋɔmmɛu. Kanifuule, Chɛhowa tosa ni ma duaunuŋ nyaale, nduyɛ mbo duau masaa le Asiiliaa o kɔl le mbo nɔ yiyaŋ kɛndɔɔ a nda okɔɔ, le mbo toolu nda* le wali wa tosaŋndo o chiɛi Mɛlɛka tonyaa, Mɛlɛka Isɔluɛiya wo.
Tɛɛsiaalaŋ
^ Aluamakiiye, “chiɛi.”
^ Tofa Tɛɛsiaa B14.
^ Ɔɔ “sala.”
^ Pee bɛndoo leeloo sim le tanda cho o Pee Bɛndoo Yufiluaati ba paaleŋ le del lo.
^ Ɔɔ “mulu.”
^ Ɔɔ naapum, “sallo.”
^ Tofa Tɛɛsiaa B15.
^ Hibuluiye, “nuuviaa.”
^ Ɔɔ “Bulu Nɔ Lɛvɛŋ.”
^ Hibuluiye, “kindi nda balaŋ.”
