Ɛsilua 7:1-28
7 Mɛɛ sɔɔŋ muŋ hiou, a teleŋ Atasaasi masaa le Paasiaa wa o masaleŋ choo wo, mi Ɛsilua* chaŋ Babilɔŋ mbo miiŋgu Chulusalɛm. Ɛsilua yɛ, finya ndɔ wa Sɛluiya ni, Sɛluiya po Asaluaya wo, Asaluaya po Hilikaya wo,
2 Hilikaya po Sialum ndo, Sialum po Sadɔki wo, Sadɔki po Ahitubi wo,
3 Ahitubi po Amaluiya wo, Amaluiya po Asaluaya wo, Asaluaya po Mɛluayoti wo,
4 Mɛluayoti po Sɛluahaya wo, Sɛluahaya po Yuusai yo, Yuusai po Bukai yo,
5 Bukai po Abisua wo, Abisua po Finihaasi wo, Finihaasi po Ɛlieesa wo, Ɛlieesa po Elɔŋ ndo, masa wanaa soliaa lasalaa.
6 Mi Ɛsilua chaŋ Babilɔŋ mbo miiŋgu Chulusalɛm. Wana ndoo miŋgi Sawala Mɛlɛka laŋ poonyiaa wo o wa ni, nduyɛ ndoo sina sawala Chɛhowa Mɛlɛka ndoo ke Muuse le Isɔluɛiya laŋ nyɛkɛndɛi. Mi masaa ke ndu nyɛ o nyɛ o nyuna le ndu, kanifuule Chɛhowa Mɛlɛka ndɔɔ wa a ndu latulu.
7 Mi Isɔluɛiya apum, wanaa soliaa lasalaa, Livaiya, wanaa soliaa ŋchonduaa, wanaa mandaa diola kpakilaŋ nda, a wanaa tosa wallo o chiɛi Mɛlɛkaa wa* kua Chulusalɛm o wɔsi ŋɔmmɛu ndɔ Masaa Atasaasi wa o masaleŋ choo wo niŋ.
8 Nduyɛ Ɛsilua kuɛ Chulusalɛm o paŋgii ŋuɛɛnuei niŋ, o wɔsi ŋɔmmɛu ndɔ Masaa Atasaasi wa o masaleŋ choo wo niŋ.
9 O paŋgii tasei niŋ malɔ le pilɛ o mal Babilɔŋ ni, nduyɛ mbo fuuluu Chulusalɛm o paŋgii ŋuɛɛnuei niŋ malɔ le pilɛ. Kanifuule, Mɛlɛka ndɔɔ wa a ndu latulu.
10 Mi Ɛsilua bɛɛndiaa kɔl ndɔɔ* le Sawala Chɛhowa laŋ pɛɛkoo nduyɛ mbo tosa nyɛ la dimi wo, le halikpeŋ mbo pɛɛku Isɔluɛiya sawalaŋ ndaŋ.
11 Wana soliaa lasalaa, a wana ndoo miŋgi Sawala Mɛlɛka laŋ poonyiaa wo Ɛsilua wa ni. Mi ndoo pɛɛku sawala Chɛhowa ndoo ke Isɔluɛiya laŋ nyɛkɛndɛi. Yau Masaa Atasaasi ke ndu wo cho hoo ni:
12 * “Ya masa Bɛndoo Atasaasi cho yauwo hoo poonyiaa ni o num Ɛsilua lo, wana soliaa lasalaa a wana miŋgi Sawala Mɛlɛka cho choo choo wo poonyiaa wo. Maa kɔl nyuloo wa num choo fɔ. Nduyɛ,
13 I yeema num ma sina maa wana o wana cho Isɔluɛinɔ mbo wa o masale nileŋ bɛŋgu, wanaa soliaa lasalaa a Livaiya, te o kɛ kɛ nɔ pɛ yeemɛi le kɔlaŋ a num latulu Chulusalɛm, la kua nya ndaa.
14 Kanifuule, ya masaa a wanaa niaa silaa a ŋɔmmɛu vem num ni, le ma kɔ tofa te wanaa cho Chuda a Chulusalɛm nda cho nyɛ Sawala Mɛlɛka numndo, la cho num o ba laŋ la dimi wo tosaa.
15 Nduyɛ ma kuɛ a kaniŋ humboŋ vɛlɛ a kooliiyoŋ, ŋ ya masaa a wanaa niaa silaa yɔŋgu tooloo le Mɛlɛka Isɔluɛiya, o cho ichali Chulusalɛm ndo,
16 kaniŋ humboŋ a kooliŋ ŋ sɔla* o tanda Babilɔŋ ndo niŋndoŋ kpou, vɛlɛ a kela waŋnda a wanaa soliaa lasalaa yɔŋgu tooloo le chiɛi Mɛlɛka ndaa, o cho Chulusalɛm ndo.
17 Nduyɛ a nɔ ma soliŋ nyɛsɔlaa hoo kpeku chɔ chɔ ma pendu nauwaa towaa, saa konduaa, saa fɔŋnduaa, latulu a salala ndala ŋkultaŋ a salala ndala mamuɛilaŋ, okoŋ ma soli laŋ salaa o bandu luamaa lasala cho o chiɛi Mɛlɛka nyaa Chulusalɛm ndo choo.
18 “Kaniŋ humboŋ a kooliŋ tɔŋ cho lo woŋ, nyɛ o nyɛ num a puaapiliaa numnda yeema pɛ tosaa a muŋ mbo wa o chɛlaŋ a hɛnaŋ Mɛlɛka nyaa, la tosa.
19 Nduyɛ nyɛm laanduŋ nda ke num le wallo o chiɛi Mɛlɛka numndo niŋndoŋ kpou, a nɔ ma kɔ kɛsi muŋ Mɛlɛka lachi Chulusalɛm.
20 Nyɛm tɔŋ yeemaŋ le yɔŋgoo o chiɛi Mɛlɛka numndo niŋndoŋ, soliŋ nyɛsɔlaa lemasaa kpeku le muŋ piondɔɔ.
21 “Ya Masaa Atasaasi dimul wanaa bii nyɛsɔlaa o Pee Bɛndoo Leeloo* wa kpou maa, nyɛ o nyɛ Ɛsilua wana soliaa lasalaa, wana miŋgi Sawala Mɛlɛka cho o choo choo niŋndo poonyiaa wo nyuna pɛ, la ke ndu chɔ chɔ.
22 Kaniŋ humboŋ nɔ miŋ wa talɛŋndoŋ 100,* witiiyoŋ kilolaŋ 16,000,* muɛiyaŋ litɛilaŋ 2,200, chuɛiyaŋ litɛilaŋ 2,200, a hɛlle mɛɛ o mɛɛ o yeema pɛ.
23 Nyɛ o nyɛ Mɛlɛka cho o choo choo niŋndo dimi pɛ le tosaa le chiɛi ndɔɔ, la tosa ndu a dialuŋ fulaa, le halikpeŋ Mɛlɛka doonuŋ tumbe a ya, wanaa niaa, vɛlɛ a puaa niaa le.
24 Nduyɛ mi dimul nya maa la bii paawa* kɛ kɛ wanaa soliaa lasalaa, Livaiya, wanaa nyɛchaa, wanaa manda diola kpakilaŋ nda, wanaa tosa wallo o chiɛi Mɛlɛkaa wa,* a wanaa cho wali chiɛi Mɛlɛkaa hoo tosa wa o ba le.
25 “Nduyɛ num Ɛsilua, mɛɛ Mɛlɛka numndo ke num taasioo yɛ, hɛli laŋgbaa kalla a wanaa kialaa ŋyamaa, a sina sawala Mɛlɛka numndo wa kpou, le wanaa cho o Pee Bɛndoo Leeloo wa sɔɔŋ dimioo tɛɛŋ. Okoŋ wana o wana sina laŋ te, a pɛɛku ndu laŋ.
26 Wana o wana diikuŋ sawala Mɛlɛka numndo a sawala nilaŋ te, a nɔ ma kilul ndu yamɛi chɔ chɔ. Te o nɔ pɛ le piɔmndo sɔlaa, solioo ndu o lɛŋndeŋ niŋ, tɔŋndo ndu biyɔɔ o ba, ɔɔ le ndu dɔwɔɔ o chiɛi manyumndo niŋ, mɛɛ la tosa a ndu lende.”
27 Maa Chɛhowa, Mɛlɛka finyaa naa mamaa, o dɔu masaa o kɔl le chiɛi Chɛhowa cho Chulusalɛm ndo miŋgioo bɛɛndiaa nyɛkɛndɛiyo sɔla saŋgalaa fɔ!
28 Chɛhowa Mɛlɛka nuu chɔm ya kaala lo lechoo wo masaa o hɔl, wanaa nduaa silaa, a laŋgbaa nduaa kalla kpou. Le hei, mi sɔla kɔl simulaa, kanifuule Mɛlɛka nuu wa a ya latulu. Okoŋ, mi chuuŋgiaa simlachiaa* Isɔluɛiya le miŋ kuɛ naa ndaa latulu.
Tɛɛsiaalaŋ
^ Diolaŋ ndaŋ la sim, “Malaa.”
^ Ɔɔ “Nɛtinimnda.” Hibuluiye, “wanaa yɔŋguŋ nda.”
^ Ɔɔ “kɛɛsiaŋ o kɔl.”
^ Chɔŋ Ɛsilua 7:12 haaa 7:26, o Aluamakiiye niŋ nda poonyiaa ndu ni.
^ Aluamakiiye, “saaluŋ.”
^ Pee bɛndoo leeloo sim le tanda cho o Pee Bɛndoo Yufiluaati ba paaleŋ le del lo.
^ Talɛŋnde i pilɛ, lusul ndɔɔ wa le kilolaŋ 34 a nyɛ lechoo. Tofa Tɛɛsiaa B14.
^ Ɔɔ “kɔɔ tuuwo 100.” Tofa Tɛɛsiaa B14.
^ Ɔɔ “mulu.”
^ Ɔɔ “Nɛtinimnda.” Aluamakiiye, “wanaa yɔŋguŋ nda.”
^ Hibuluiye, “wanaa lebolla.”