Ɛsita 2:1-23
2 Okoŋ kɔɔli, mɛɛ Masaa Ahasilɔɔ pɔlul kɔl, mbo loonuŋ a nyɛ Vasitai tosa wo nduyɛ a mɛɛ o kɛɛsiaa le ndu nyɛpalaa tusioo choo yɛ.
2 Okoŋ, mi wanaa silaa wa masaa ikɛi kpɛɛluŋnda dimi aa: “Viom puaa ma kɔ nuuviaa chuaa laanduaa yufuaa naŋ tau wa le num fallo masaa.
3 Nduyɛ, hɛli puaa o tandala ŋ cho masaleŋ choo laŋ niŋ, ma chuuŋgiaa chuaa laandaa yufuaa naŋ tau wa kpou, ma hiŋ a nda o chiɛi lemasaa Susaŋ* o chiɛi cho le waŋ laanduaa wo.* Okoŋ ma wa Hekai o ba bɛŋgu, wana manda waŋ laanduaa o chiɛi lemasaa niŋndo.* Nduyɛ ma bɛɛndiaa nda a nyɛm kɛndɛŋ nɛŋi waŋ laanduaa woŋ.
4 Okoŋ chua laandu cho hiouwɔɔ naŋɔɔ mi masaa hini kɔl a ndu wo, ndu cho miiŋgu o foofo Vasitai yo ni mbo simnuŋ lanɔɔ masaa.” Mi masaa hini kɔl a kɛɛsiaa hoo, nduyɛ mbo tosa lende.
5 Po Chuunɔ pilɛ wa o chiɛi lemasaa niŋ Susaŋ* diolaŋ aa Mɔdikai, po Chaa wo. Chaa po Simɛi yo, Simɛi po Kisi wo, fulaa o yɔŋgu Bɛŋjamiŋ ndo choo.
6 Mɔdikai yo hoo wa waŋndo o pilɛ o wanaa Nɛbukanɛɛsa, masaa le Babilɔŋ bii Chulusalɛm mbo kua a nda o biyɔɔ niŋ a Chɛkonaya,* masaa le Chuda latulu wa.
7 Ndu wa Hadaasa,* koŋ cho ni Ɛsita, chua wanayɛi finya ndɔ ve mandaa ni. Kanifuule, Ɛsita ndoo nɔ lɛ kala a finya le. Chua feleŋgɔnɔɔ hoo ndoo naŋ tau. Wanaa che ndu ndɔɔ pɛ nyɔɔ hɛnaŋ num. Nduyɛ mɛɛ finya ndɔ nda kala ndɔ vi, mi Mɔdikai chua ndu mbo wa ndu mandaa maa chua ndɔ.
8 Mɛɛ waŋnda tuei nyɛ masaa dimi le ma hiŋ a chuaa laanduaa kɛndɛ kɛndiaa Susaŋ* o chiɛi lemasaa wo, ma huŋ a nda. Nduyɛ Hekai wa nda hɔlteŋ ni. Ɛsita bɛɛ wa o chuaa laanduaa nda hiŋ haa o chiɛi lemasaa wa tɛɛŋ.
9 Mɛɛ Hekai che Ɛsita, mi nyɔɔ hɛnaŋ ndu, nduyɛ mbo hini kɔl a ndu.* Le hei, mbo tosa kɛɛsiaa chɔ chɔ le ma wa ndu bɛɛndiaa a nyɛm kɛndɛŋ nɛŋi waŋ laanduaa woŋ, vɛlɛ a nyɛdiaa o nɔ le waa dioo wo. Mbo hɛli waŋ laanduaa a ŋɔmmɛu o chiɛi lemasaa niŋ le ma wa buɛiyaa nduaa. Okoŋ kɔɔli, mbo hivi ndu a buɛiyaa nduaa o fondaŋ kɛndɛ kɛndɛ cho o chiɛi waŋ laanduaa wo.*
10 Kɛ Ɛsita dimi nyɛ o nyɛ a wanaa nduaa ɔɔ a wanayaŋ ndɔŋ okɔɔ le. Kanifuule, mi Mɔdikai dimul ndu maa o dimul wana o wana a yuŋgu ndɔɔ okɔɔ le.
11 Lepaa o lepaa, mi Mɔdikai ndoo kuɛ o luŋ chiɛi waŋ laanduaa* le sinaa mɛɛ Ɛsita cho yɛ, nduyɛ a mɛɛ sɔɔŋ cho a ndu yɛ.
12 Wana lanɔ kɛ kɛ ndoo nɔ teleŋ o nɔ mbo kuɛ Masaa Ahasilɔɔ o hɔllo, te ndaa chii pɛ ndu bɛɛndiaa le paŋgoŋ 12, a mɛɛ kɛɛsiaa wa le nda bɛɛndiaa yɛ. Mɛɛ ndaa bɛɛndiaa nda yɛ wa hoo ni: Mi ndaa sui nda chuɛima mɔɔ waŋ le paŋgoŋ ŋɔmpum, chuɛima baasam ndaŋ le paŋgoŋ ŋɔmpum, vɛlɛ a nyɛm kɛndɛŋ cheleŋ le nda nɛŋioo.
13 Te a chii pɛ chua laandu kɛ kɛ bɛɛndiaa nduyɛ mbo chɛŋ le kɔlaŋ o masaa lo, nyɛ o nyɛ o nyuna pɛ o chiɛi waŋ laanduaa niŋ,* ndu nda ke ndu ni.
14 Te paaleŋ le yɔŋguŋ pɛ, o kuɛ o masaa lo. Nduyɛ idiiyo, o miiŋgu o chiɛi diiŋ ndɔ waŋ laanduaa niŋ* le mi Siakaasi, wana ndoo manda laanduaa pɔmbuaa masaa wo wa ndu hɔlteŋ choo. Chua koŋ ndoo nɔ le mbo miiŋgu o masaa lo le, mɛɛ mi masaa hini kɔl a ndu, nduyɛ mbo yooŋgu le ndu a diola ndɔlaŋ.
15 Mi teleŋndo fuuluu le mi Ɛsita chua Abihee wo kuɛ o masaa lo. Abihee yɛ, wanayɛi nda wa nda Mɔdikai ni, mi Mɔdikai chua Ɛsita maa chua ndɔ. Mɛɛ teleŋndo fuuluu le mi Ɛsita kuɛ o masaa lo, o nyuna le nyɛ o nyɛ le. Mɛɛ nyɛ Hekai, wana ndoo manda waŋ laanduaa wo kɛɛsiaa wo. Wana o wana ndoo che Ɛsita pɛ, nyɔɔ ndoo hɛnaŋ ndu ni.
16 O wɔsi ŋɔmmɛu ndɔ Masaa Ahasilɔɔ wa o masaleŋ choo wo niŋ a paŋgii tɔ ve, koŋ cho ni paŋgii Tibɛti* ve, nda kuɛ a Ɛsita o masaa lo o chiɛi le masaa niŋ ni.
17 Mi masaa kaala Ɛsita mbo hiau waŋ laanduaa apiliaa kpou. Nduyɛ, mbo hini kɔl a ndu* mbo hiau yufuaanɔ kɛ kɛ. Le hei, mbo wou ndu mɔsil lemasaa, mbo siiŋguu ndu lanɔɔ masaa o foofo Vasitai yo.
18 Mi masaa tosa dunyɛi bɛnduei le laŋgbaa nduaa kalla a buɛiyaa nduaa. Nduyɛ le Ɛsita dunyɛi hei wa ni. Mi masaa yonda le paale baŋaŋ ndeŋ o tandala cho ndu o ba bɛŋgu laŋ niŋ kpou, nduyɛ mbo hiau lachi a waŋnda nyɔɔŋ kioo a mɛɛ sɔla ndɔɔ wa yɛ.
19 Mɛɛ nda chuuŋgiaa yufuaa* diompilɛ a teleŋ cheleŋ, Mɔdikai wa ichali o dio kpaki masaa.
20 Ɛsita dimul wana o wana a wanayaŋ ndɔŋ ɔɔ a yuŋgu ndɔɔ okɔɔ le, a mɛɛ Mɔdikai ndoo dimul ndu yɛ. Mi Ɛsita hiau lachi a Mɔdikai diikɔŋndo, mɛɛ ndoo diikuŋ ndu boondii o wa ndu o ba bɛŋgu ve yɛ.
21 O palɛi keŋ niŋ, Mɔdikai wa ichali o dio kpaki masaa mi wanaa silaa a ŋiɔɔŋ, a ndaa manda dio chiɛi lemasaa wa, Bikitaŋ nda Tɛluɛsi duaunuŋ tumbe a Masaa Ahasilɔɔ nduyɛ ma yii ndu dumbu le ndu diyɔɔ.*
22 Kɛ mɛɛ Mɔdikai tuei a ndi okɔɔ, mbo keleŋa Ɛsita lanɔɔ masaa dimul chɔ chɔ a ndi okɔɔ. Okoŋ, mi Ɛsita hivi yooŋgu Mɔdikai yo o masaa lo.
23 Ma yaasiaa suɛi hei fɛsɛ fɛsɛ, okoŋ ma mɛɛlu saalɔŋ maa tonya i cho ni. Le hei, ma landu puaa ŋiɔɔŋnda haa kpou o yɔmndo choo. Ma poonyiaa suɛi hɛi o yau lakonaa niŋ masaa o hɔl.
Tɛɛsiaalaŋ
^ Ɔɔ “Susa.”
^ Le laanduaa bɛnduaa masaa ɔɔ laanduaa pɔmbuaa fondaa hoo cho ni.
^ Hibuluiye, “wana nda pɛl boosioo wo.”
^ Ɔɔ “Susa.”
^ Diolaŋ ndaŋ la sim, “Yɔm Matɔɔ Wo.”
^ Ɔɔ “Susa.”
^ Ɔɔ “mbo chɔm ndu kaala lo lechoo wo.”
^ Le laanduaa bɛnduaa masaa ɔɔ laanduaa pɔmbuaa fondaa hoo cho ni.
^ Le laanduaa bɛnduaa masaa ɔɔ laanduaa pɔmbuaa fondaa hoo cho ni.
^ Le laanduaa bɛnduaa masaa ɔɔ laanduaa pɔmbuaa fondaa hoo cho ni.
^ Le laanduaa bɛnduaa masaa ɔɔ laanduaa pɔmbuaa fondaa hoo cho ni.
^ Tofa Tɛɛsiaa B15.
^ Ɔɔ “mbo chɔm ndu kaala lo lechoo wo.”
^ Ɔɔ “chuaa laanduaa.”
^ Hibuluiye, “le ndu biyɔɔ.”
