Ɛsita 3:1-15
3 Okoŋ kɔɔli, mi Masaa Ahasilɔɔ chɔɔlu Hemaŋ foofoo ke. Hemaŋ yɛ, finya ndɔ wa Hamɛdata ni, Akakaitiinɔɔ. Nduyɛ, mi masaa handu ndu laŋgbaa kalla kpou chilaŋ.
2 Mi buɛiyaa masaa kpou, a ndaa chal o dio kpaki masaa wa ndaa tunduŋ nduyɛ ma beŋ Hemaŋ wulaŋ, kanifuule lende masaa dimi ni maa a nɔ ma wa ndu tosallo. Kɛ mi Mɔdikai ndu kɛɛ le ndu tundɔŋndo o labɛŋgu niŋ ɔɔ mbo beŋ ndu wulaŋ.
3 Le hei, mi buɛiyaa masaa a wa o dio kpaki masaa wa nyuna Mɔdikai aa: “Le yɛɛnɛ ŋ cho yɛ kiɔɔ nyɛ masaa dimi wo tosaa?”
4 Lepaa o lepaa, mi ndaa nyuna ndu, kɛ ndoo yeŋ nda lani kposoŋ te. Le hei, ma dimul Hemaŋ a ndi okɔɔ, le sinaa te o cho pɛ Mɔdikai malɔɔ mbo hiou lachi a kaa koŋ tosaa. Kanifuule, Mɔdikai ndoo dimul nda niŋ maa Chuunɔɔ o wa ni.
5 Mɛɛ Hemaŋ che maa Mɔdikai kɛɛ le ndu tundɔŋndo o labɛŋguniŋ mbo beŋ ndu wulaŋ, mbo tuulu kɔl tau.
6 Kɛ mi Hemaŋ yiyaŋ maa o ve niŋ letuu le Mɔdikai diyɔɔ* ndupilɛ kpe le. Kanifuule, ndaa dimul ndu niŋ a wanaa Mɔdikai ya okɔɔ. Le hei, mi Hemaŋ kandu nɛilaŋ nuuviaa le Chuuwaa wa o masaleŋ Ahasilɔɔ leŋ bɛŋgu wa kpou basɔɔ tɛɛ, wanaa Mɔdikai ya kpou.
7 O wɔsi 12 Masaa Ahasilɔɔ wa o masaleŋ choo wo niŋ, o paŋgii tasei niŋ, koŋ cho ni, paŋgii Nisaŋ* nde, ma wuu kooŋ Hemaŋ lachi le sinaa paaleŋ a paŋgii nda nɔ ma dii Chuuwa ve. Mi kuei bii paŋgii 12, koŋ cho ni, paŋgii Ada* ve.
8 Okoŋ, mi Hemaŋ kɔ dimul Masaa Ahasilɔɔ aa: “Waŋnda apum a cho a tiuwaa wanaa numnda tɛɛŋ o tandala ŋ cho masaleŋ choo laŋ niŋ kpou. Nduyɛ, sawala ndalaŋ la choŋnuŋ teŋgeŋ a sawala wanaa cheleŋ. A diikuŋ sawala masaa le. Te o yɔŋ pɛ ma mal waŋnda haa lende, o ve niŋ suɛi kɛndɛ le num te fallo masaa.
9 Lelaŋ te o bɛnda pɛ a num fallo masaa, poonyiaa yaulaŋ, ma chɔm o yaula laŋ niŋ maa Chuuwa nɔ le tambei sɔlaa. I cho laŋgbaa kalla ke kaniŋ humboŋ talɛŋndoŋ 10,000* le ma kɔ wou o fondaŋ nda kɛsi nyɛm baa kalaŋ o chiɛi lemasaa wo niŋ.”*
10 Okoŋ, mi masaa soliŋ kelɛi nduɛi o iso, mbo ke Hemaŋ o wa yaamɔɔnɔ Chuuwa wo. Hemaŋ yɛ, finya ndɔ wa Hamɛdata ni, Akakaitiinɔɔ.
11 Mi masaa dimul Hemaŋ aa: “I chua kaniŋ humboŋ a Chuuwa kpou mi mal num o ba, tosa a nda mɛɛ ŋ yeema yɛ.”
12 Ma veelu le wanaa poonyiaa le masaa wa o paale 13 choo o paŋgii tasei niŋ. Ma poonyiaa nyɛ o nyɛ Hemaŋ dimul nda o wanaa wa masaa ikɛiya lo, masaa ŋbuŋgaa, a laŋgbaa kalla, a wa o tandala yɛ yɛlaŋ niŋ o masale Ahasilɔɔ leŋ bɛŋgu wa. Tanda kɛ kɛ o suɛi ndɛi maŋgalɛi niŋ, vɛlɛ a mɛɛ nda poonyiaa suɛi maŋgalɛi keŋ yɛ. Ma poonyiaa yaulaŋ ndaŋ o diola Masaa Ahasilɔɔ laŋ niŋ, nduyɛ ma handu tamasi kelɛi nduɛi lechoo.
13 Ma yɔŋ waŋnda a yaulaŋ o tandala wa masaa o ba bɛŋgu laŋ niŋ kpou, le ma dii, ma tɛɛmbuu, nduyɛ ma basu Chuuwa tɛɛ. Feleŋgɔnɔ ni, bɛndu yuu ni, chuaambɔ ni, wana lanɔ ni, ndaa nɔ ma dii nda kpou o paŋgii 12 niŋ malɔ 13, koŋ cho ni, paŋgii Ada ve. Okoŋ, ma chɔuviaa nyɛm ndaŋ kpou.
14 Nyɛ dimiŋ o yaulaŋ ndaŋ niŋndo ndoo nɔ mbo wa sawaa o tanda o tanda niŋ, nduyɛ mi ndaa yonda ndu o wana o wana lo. Le halikpeŋ mi ndaa wa a bɛɛndiaŋ le paale leŋ.
15 Mi wanaa nda vem nda keleŋa lakɔ chɔ chɔ a mɛɛ masaa dimi yɛ. O chiɛi lemasaa niŋ Susaŋ sawaa hoo ndoo fula ni. Okoŋ mi masaa nda Hemaŋ chal le muɛiyaŋ kolɔɔ. Kɛ wooluŋ wooluŋndo wa o chiee bɛndoo Susaŋ* niŋ.
Tɛɛsiaalaŋ
^ Hibuluiye, “biyɔɔ.”
^ Tofa Tɛɛsiaa B15.
^ Tofa Tɛɛsiaa B15.
^ Talɛŋnde i pilɛ, lusul ndɔɔ wa le kilolaŋ 34 a nyɛ lechoo. Tofa Tɛɛsiaa B14.
^ Ɔɔ naapum, “I cho wou talɛŋndoŋ 10,000 o fondaŋ nda kasi nyɛm baa kalaŋ o chiɛi lemasaa wo niŋ, le wanaa cho wallo hoo tosa wa.”
^ Ɔɔ “Susa.”
