Ɛsita 5:1-14
5 O paale yaa ndɔ leŋ choo, mi Ɛsita wounuŋ nyɛla ndɔla lemasa laŋ, mbo kɔ sim o luŋ balu chiɛi lemasaa wo, mbo muli hɔlla kumbuii chiɛi lemasaa. Nduyɛ, masaa wa ichali o kpeŋgei ndɔ lemasaa choo mbo muli hɔlla kpeŋgii dioo wa wo.
2 Dimioo nuaa masaa che Ɛsita isisi o luŋ chiɛi lemasaa, mbo hini kɔl a ndu. Mi masaa yulul ndu tinda ndɔ lemasa ikoolii wa ndu o ba wo. Okoŋ mi Ɛsita sɔɔŋguu mbo pilaŋ tinda koŋ bolleŋ.
3 Mi masaa nyuna ndu aa: “Laa nuu Ɛsita, yɛɛnɛ yɔŋnuŋ yɛ? Yɛɛnɛ ŋ yeema yɛ? O yɔŋ bɛɛ aa masale nileŋ tɛndaa tɛɛŋ, I nɔla mi ke num!”
4 Mi Ɛsita muli aa: “Te o bɛnda pɛ a num fallo masaa, I yeema mi la hiŋ hau nya Hemaŋ latulu mi la huŋ dio nyɛdiaa ya bɛɛndiaa le num ndo.”
5 Mi masaa dimul puaa nduaa aa: “La kɔ dimul Hemaŋ mbo hiŋ ndɔ chɔ chɔ a mɛɛ Ɛsita dimi yɛ.” Okoŋ, mi masaa nda Hemaŋ kua ma kɔ dio nyɛdiaa Ɛsita bɛɛndiaa wo.
6 Teleŋ nda wa muɛiyaŋ kolɔɔ wo, mi masaa nyuna Ɛsita aa: “Yɛɛnɛ ŋ yeema yɛ? Nyɛ o nyɛ ŋ nyuna ya pɛ, I cho num ndu ke! O yɔŋ bɛɛ aa masale nileŋ tɛndaa tɛɛŋ, I nɔla mi ke num!”
7 Mi Ɛsita muli aa: “Nyɛ ya yeema wo cho ni maa,
8 te a hini pɛ kɔl a ya nduyɛ ma chɛl le tosaa nyɛ ya cho num nyuna wo fallo masaa, mɛɛ la huŋ siɔdii nya Hemaŋ mi la huŋ dio nyɛdiaa ya cho toosiaa le nya wo. Okoŋ te la hiŋ pɛ siɔdii, I cho num dimul nyɛ ya yeema wo.”
9 Mi Hemaŋ miiŋgu paale leŋ a kɔl kɛndɛ, nduyɛ o waŋnuŋ wuye wuye. Kɛ mɛɛ Hemaŋ che Mɔdikai o dio kpaki masaa, nduyɛ mbo sina maa o cheŋ isisi mbo chɔm maa o nɔ siooŋnde le ndu le, mbo tuulu kɔl tau tau a Mɔdikai.
10 Kɛ mi Hemaŋ duau ndupila o mandaa bɛŋgu mbo miiŋgu o ndu lo bɛɛ. Okoŋ, mbo yooŋgu le chaaŋaa nduaa a Sɛluɛsi laa ndɔ.
11 Mi Hemaŋ saŋgalaŋ a sul ndɔ bɛndoo, mɛɛ o nɔ chuauwa tau yɛ, nduyɛ a mɛɛ masaa heelu ndu mbo ke ndu foofo filioŋndo buɛiyaa nduaa a laŋgbaa nduaa kalla kpou choo yɛ.
12 Mi Hemaŋ chɔɔlu dimi aa: “I hiou kpou ve, lanɔɔ Masaa Ɛsita veelu wana o wana cheleŋ le mbo kɔ dio nyɛdiaa a masaa le, kɛ ya pilɛ kpe o veelu ni. Nduyɛ siɔdii bɛɛ o veelu ya le mi kɔ dio nyɛdiaa a masaa latulu.
13 Kɛ a koŋ kpou, te I wa wɔ pɛ Mɔdikai Chuunɔ koŋ chɔɔ ichali o dio kpaki masaa, I hini kɔl te.”
14 Mi Sɛluɛsi laa ndɔ a chaaŋaa nduaa dimul ndu aa: “Simi yɔm vilɛiyo le nɛiyo 73.* Nduyɛ te paaleŋ le sɛ pɛ siɔdii, kɔ dimul masaa maa Mɔdikai nɔ mbo sɔla landɔɔ o yɔm koŋ. Okoŋ kɔɔli, a kuɛ niko la kɔ tuei nyɛdiaa yeela nya masaa latulu.” Mi Hemaŋ naŋ kɔl tau a kɛɛsiaa hoo. Nduyɛ mbo dimul waŋnda le ma kɔ simi yɔmndo.
Tɛɛsiaalaŋ
^ Tofa Tɛɛsiaa B14.
