Ɛsita 7:1-10
7 Okoŋ mi masaa nda Hemaŋ kua le nyɛdiaa Ɛsita bɛɛndiaa wo dioo.
2 Mi masaa nyuna vɛlɛ Ɛsita o paale diiŋ ndɔ le nda kuɛ le nyɛdiaa dioo leŋ choo aa: “Yɛɛnɛ ŋ yeema yɛ laa nuu Ɛsita? Nyɛ o nyɛ ŋ nyuna ya pɛ, I cho num ndu ke. O yɔŋ bɛɛ aa masale nileŋ tɛndaa tɛɛŋ, I nɔla mi ke num!”
3 Mi Ɛsita muli aa: “Te o bɛnda pɛ a num nduyɛ ma hini kɔl a ya masanɔ nuu, yandii I yeema ma piŋi yoomu nuu a yoomula wanaa niaa.
4 Ya a wanaa niaa, a chii naa pisi le naa diyɔɔ, nduyɛ ma basu naa tɛɛ. Te ndoo yɔŋ bɛɛ pɛ aa o chɛleŋ niŋ nda pisi naa ni, I vɛ isɔɔ a hei okɔɔ le. Kɛ nyɛ nda tosal naa wo niŋ kposoŋ te. Nduyɛ num masaa bɛɛ i cho num paaliaŋ.”
5 Mi Masaa Ahasilɔɔ nyuna Ɛsita laa ndɔ aa: “Nɛɛnɛ tɔɔndaŋ yɛ le suɛi waa lende tosaa? Kuɛɛnɛ o cho yɛ?”
6 Mi Ɛsita muli aa: “Hemaŋ po kɔl vesɛi bɛndoo hoo, ndu cho yaamɔɔnɔ naa koŋ ni.”
Mi siooŋii bɛnduei bii Hemaŋ le masaa nda laa ndɔ.
7 Mi masaa chaŋ a tumboo naa nda wa nyɛdiaa dioo wa, mbo kua o kpele wa o chiɛi lemasaa wo. Kɛ mi Hemaŋ chaŋ le Ɛsita lanɔɔ masaa nyɔɔloo le mbo piŋi yoomu ndɔɔ. Kanifuule ndoo sina niŋ maa, masaa chii kɛɛsiaa le ndu nyɛpalaa tusioo choo.
8 Mɛɛ masaa chɛŋ naa o kuɛ o kpele wa o chiɛi lemasaa wo, mbo miiŋgu o chiɛi nda wa nyɛdiaa dioo wo niŋ, mbo cha Hemaŋ deli delioo naa Ɛsita wa ichali wa. Mi masaa deŋi choo choo aa: “Baa laa nuu poo hoo yeema vɛlɛ kpuuwaa o ya lo chiɛiniŋ ni?” Masaa mei bɛɛ sondo le, ma huŋ kumbu Hemaŋ hɔlla.
9 Mi Habona wana silaa o pilɛ le masaa dimi aa: “Hemaŋ bɛɛndiaa vɛlɛ yɔmndo le Mɔdikai landɔɔ lechoo. Mɔdikai yo hoo hiŋ a yooŋgoo ni, mbo chiindiaa masaa. Suŋ suŋ bɛɛ yɔm koŋ cho isisi o Hemaŋ ndo bɛɛ, bandei le nɛiyo 73.”* Okoŋ mi masaa dimi aa: “La kɔ landu ndu lechoo.”
10 Le hei, ma kɔ landu Hemaŋ o yɔm o bɛɛndiaa le Mɔdikai yo choo. Okoŋ, mi masaa pɔlul kɔl.
Tɛɛsiaalaŋ
^ Tofa Tɛɛsiaa B14.
