Ɛsita 8:1-17
8 O paale leŋ choo, mi Masaa Ahasilɔɔ ke Ɛsita laa ndɔ chiɛi Hemaŋ ndo, yaamɔɔnɔ Chuuwa. Nduyɛ mi Mɔdikai luɛi naa masaa chua, kanifuule Ɛsita ndoo dimul ndu niŋ wanayɛi cho nda tɛɛŋ nde.
2 Mi masaa soliŋ kelɛi nduɛi o iso, i o puu Hemaŋ o ba ve mbo ke Mɔdikai. Mi Ɛsita handu Mɔdikai chilaŋ le chiɛi Hemaŋ ndo.
3 Okoŋ kɔɔli, mi Ɛsita suaa vɛlɛ o masaa lo. Mbo del ndu o labɛŋgu niŋ, mbo nyɔɔlu ndu a chaŋndo le mbo kuuna kɛɛsiaa dɛnɛ wɔɔŋ Hemaŋ, Akakaitiinɔɔ ndoo tuu le Chuuwa wo.
4 Okoŋ mi masaa yulul Ɛsita tinda ndɔ ikooliiyo, mi Ɛsita chaŋ mbo sim masaa o hɔl.
5 Mbo dimi aa: “Te o bɛnda pɛ a num fallo masaa, nduyɛ ma che ya nyina, te o cho pɛ suɛi kɛndɛ nduyɛ ma hini kɔl a ya, kɛɛsiaa Hemaŋ po Hamɛdata wo, Akakaitiinɔɔ poonyiaa o yaulaŋ niŋ le Chuuwaa cho o tandala ŋ cho masaleŋ choo laŋ kpou diuwo wo, yandii poonyiaa yauwo le kɛɛsiaa koŋ kuunaa.
6 Kanifuule, I nɔla mi biunuŋ tofaa mi kpundɛ bɛndoo hoo huŋ del wanaa niaa choo, nduyɛ mi wanayaŋ nuŋ kpou huŋ sɔla tambei le.”
7 Okoŋ, mi Masaa Ahasilɔɔ dimul Ɛsita laa ndɔ nda Mɔdikai Chuunɔɔ aa: “I chua chiɛi Hemaŋ ndo mi ke num Ɛsita. Nduyɛ mi landu ndu o yɔmndo choo le mɛɛ ndoo kɛɛsiaa* le Chuuwa kpou diyɔɔ yɛ.
8 Nyɛ o nyɛ ŋ yiyaŋ pɛ maa o bɛnda le Chuuwa, poonyiaa o diola nilaŋ niŋ, ma handu tamasi kelɛi nii lechoo. Kanifuule, nyɛ o nyɛ poonyiaŋ pɛ a diola masaa nduyɛ ma handu tamasi kelɛi masaa lechoo, o siŋgaŋ te.”
9 O paŋgii yaa nduɛi niŋ, koŋ cho ni, paŋgii Sivaŋ* nde malɔ 23, ma yooŋgu le wanaa ndaa poonyiaa le masaa a boondii keŋ nda kpou. Okoŋ ma poonyial Chuuwa, wanaa wa hɔlte masaa wa, masaa ŋbuŋgaa, a laŋgbaa kalla o tandala 127 o wa masaleŋ choolaŋ, chɔŋ Iŋdiaa kɔ Itoopiaa wa, le ma tosa nyɛ Mɔdikai dimi wo. Tanda kɛ kɛ suɛi maŋgalɛi nda dimi ve, vɛlɛ a mɛɛ nda poonyiaa suɛi maŋgalɛi keŋ yɛ. Nduyɛ ma poonyial vɛlɛ Chuuwa o suɛi ndɛi maŋgalɛi niŋ, vɛlɛ a mɛɛ nda poonyiaa ndi yɛ.
10 Mi Mɔdikai poonyiaa yaulaŋ o diola Masaa Ahasilɔɔ laŋ niŋ, nduyɛ mbo handu tamasi kelɛi masaa lechoo. Ma viam puaa o suaa choo ma kua a yaula laŋ. Nyaanɔŋndo pila suaa haa ndaa nyaanuŋ ni. Kanifuule, nda ndaa soliŋ kpeku o chiɛi lemasaa niŋ le yooŋgulaŋ yɔŋndo ni.
11 O yaula laŋ niŋ, mi masaa ke Chuuwa dioo o chiee kɛ kɛ niŋ le ma chuuŋgiaŋ naapilɛ ma piŋi yoomula ndalaŋ. Okoŋ, wana o wana ɔɔ tanda o tanda chiŋalaŋ nda pɛ, a diu nda, ma tɛɛmbuu nda, ma basu nda tɛɛ, okoŋ ma chua nyɛm ndaŋ. Chuaambɔ ni, wana lanɔ ni, a mɛi wana o wana le.
12 Chuuwa ndaa nɔ ma tosa hei o paale pilɛ leŋ choo kpe o tandala Masaa Ahasilɔɔ wa masaleŋ choo laŋ niŋ kpou paŋgii 12, koŋ cho ni, paŋgii Ada* ve malɔ 13.
13 Nyɛ dimiŋ o yaulaŋ ndaŋ niŋndo ndoo nɔ mbo wa sawaa o tandalaŋ niŋ kpou. Ndaa nɔ mi ndaa yondal waŋnda kpou, le mi Chuuwa wa a bɛɛndiaŋ le yaamɔɔwaa ndaa maa miŋgullo o paale leŋ choo.
14 Mi wanaa nda vem a suaa nda soliŋ kpeku o chiɛi lemasaa niŋ le kɔlaŋ a yooŋgulaŋ nda chaŋ chɔ chɔ ma kua a kiltaŋ mɛɛ masaa dimi yɛ. Ma yonda vɛlɛ sawaa hoo o chiɛi lemasaa niŋ Susaŋ.*
15 Okoŋ kɔɔli, Mɔdikai wa o doviaŋ o nyɛla ndɔla lemasa laŋ niŋ, mbo faŋaŋ masaa o hɔl. A kɛi buliiyo vɛlɛ a kɛi humboo nda toosiaa nyɛlaŋ ndaŋ ni. Mɔsil bɛndu lemasa ŋkooliiyo wa ndu o lebol. Nduyɛ, doma nda toosiaa a kola kɛndɛ kɛndɛ yim yimndo wo wa ndu vɛlɛ lekɔɔ. Mi waŋnda Susaŋ* deŋi choo choo a nyaaloo.
16 Mi Chuuwa sɔla pioŋɔɔ,* ma duaunuŋ nyaale, nduyɛ ma sɔla bɛɛleŋ tau tau.
17 O tandala masaa wa choo laŋ vɛlɛ a o chieeŋ bɛndoŋ niŋ kpou, ba o ba nda yonda sawaa hoo, mi Chuuwaa wa loŋ nda naŋ kɔl, ma duaunuŋ nyaale, ma tusi dunyaŋ, nduyɛ ma tosa yelelaŋndaŋ. Mi wanaa bɔɔbɔɔ wa o lɛŋnde leŋ niŋnda dimi maa nda bɛɛ Chuuwa nda cho ni. Kanifuule, mi siooŋii bɛnduei bii nda le Chuuwa.
Tɛɛsiaalaŋ
^ Hibuluiye, “le mɛɛ ndoo siɛndi ba ndɔɔ.”
^ Tofa Tɛɛsiaa B15.
^ Tofa Tɛɛsiaa B15.
^ Ɔɔ “Susa.”
^ Ɔɔ “Susa.”
^ Hibuluiye, “nyɛ teŋgaa.”
