Ɛsita 9:1-32
9 O paŋgii 12 niŋ, koŋ cho ni, paŋgii Ada* ve malɔ 13, paale leŋ waŋnda ndaa nɔ ma tosa nyɛ masaa dimi wo ni. O paale leŋ choo, yaamɔɔwaa Chuuwa wa kɔl le Chuuwa nyɛpalaa tusioo choo. Kɛ mi sɔɔŋ siŋgaŋ, mi Chuuwa yam wanaa ndaa tul nda leyɛ wa.
2 Mi Chuuwa chuuŋgiaŋ diompilɛ o chieeŋ ndaŋ bɛndoŋ niŋ, o tandala Masaa Ahasilɔɔ wa masaleŋ choo laŋ niŋ kpou, le ma sɔŋga a yaamɔɔwaa ndaa. Kɛ waŋndo o pilɛ bɛɛ nɔla nda simul te. Kanifuule, mi siooŋii bɛnduei bii waŋnda kpou le Chuuwa.
3 Nduyɛ laŋgbaa kalla o tandalaŋ niŋ kpou, wanaa wa hɔlte masaa wa, masaa ŋbuŋgaa, a wanaa wa walta masaa tosaa wa kpou toolu Chuuwa. Kanifuule, siooŋnde wa nda le Mɔdikai.
4 Mi Mɔdikai simnuŋ wana kpaaya bɛndoo o chiɛi lemasaa niŋ. Nduyɛ, mi tɔɔ ndɔɔ tiu o tandala masaa wa masaleŋ choo laŋ niŋ kpou. Kanifuule, Mɔdikai wa hiouwɔɔ lachi a kpaayaa sɔlaa.
5 Mi Chuuwa diu diu yaamɔɔwaa ndaa kpou a mɔɔŋ faŋndoŋ, nduyɛ ma basu nda tɛɛ. Nyɛ o nyɛ ndaa yeema tosaa a wanaa tul nda leyɛ wa, ndu nda tosal nda ni.
6 O chiee bɛndoo Susaŋ* niŋ, mi Chuuwa dii puaa 500.
7 Ma dii vɛlɛ Paasiaŋdata, Dalifɔŋ, Asipeta,
8 Poluata, Adalia, Aluidata,
9 Pamasita, Aluisai, Aluidai, a Viasata.
10 Hemaŋ po Hamɛdata wo, yaamɔɔnɔ Chuuwa ndoo nɔ puaa haa ni, nduyɛ a wa ŋwaŋ tɔ. Ma diu nda kpou, kɛ a chue nyɛm ndaŋ te.
11 O paale leŋ choo, ma huŋ doonuŋ masaa kona a wanaa nda dii o chiee bɛndoo Susaŋ* niŋnda okɔɔ.
12 Mi masaa dimul Ɛsita laa ndɔ aa: “Chuuwa dii niŋ puaa 500 o chiee bɛndoo Susaŋ* niŋ, a Hemaŋ puaa nduaa tɔ wa kpou. Yiyaŋndɔ niko a wanaa nda diu o tandala cheleŋ cho o masale nileŋ bɛŋgu wa. Yɛɛ cheleŋ ŋ yeema yɛ vɛlɛ? Dimul la mi tosal num! Nyɛ o nyɛ ŋ yeema pɛ mi tosal num, I cho ndu tosa.”
13 Mi Ɛsita muli aa: “Te o bɛnda pɛ a num fallo masaa, ke vɛlɛ Chuuwa a cho Susaŋ* nanuŋ nda kpaayaa ma tosa vɛlɛ siɔdii mɛɛ nda tosa nuaa hau yɛ. Nduyɛ ma landu puaa tɔ wa Hemaŋ nda o yɔmnde choo.”
14 Okoŋ mi masaa dimi le ma tosa lende, nduyɛ ma yonda ndi o Susaŋ* niŋ kpou. Ma landu vɛlɛ puaa tɔ waa Hemaŋ nda o yɔmnde choo.
15 Mi Chuuwa o Susaŋ* niŋ chuuŋgiaŋ vɛlɛ diompilɛ o paŋgii Ada ve niŋ malɔ 14, ma dii puaa 300 loŋ. Kɛ a chue nyɛm ndaŋ te.
16 Mi Chuuwaa wa o tandala masaa wa masaleŋ choo laŋ niŋnda bɛɛ chuuŋgiaŋ diompilɛ le ma sɔŋga le yoomula ndalaŋ. Ma dii yaamɔɔwaa ndaa, wanaa tul nda leyɛ wa 75,000. Kɛ a chue nyɛm ndaŋ te.
17 O paŋgii Ada ve niŋ malɔ 13 suɛi hei yɔŋnuŋ ni. Ma pɛŋgi o paale 14 choo, nduyɛ ma siiŋguu paale leŋ paale kɔl kɛndɛ a paale bɔŋaŋ diaa nyɛdiaa bɛndoo.
18 Mi Chuuwa o Susaŋ* niŋ chuuŋgiaŋ diompilɛ o paale 13 a o paale 14 choo, okoŋ ma pɛŋgi o paale 15 choo, nduyɛ ma siiŋguu paale leŋ paale kɔl kɛndɛ a paale bɔŋaŋ diaa nyɛdiaa bɛndoo.
19 Le sabu koŋ, mi Chuuwaa wa o sɔndɔkɔltaŋ nda siiŋguu paale 14 o paŋgii Ada ve niŋ paale kɔl kɛndɛleŋ, a paale diaa nyɛdiaa bɛndoo. Mi ndaa tosa dunyɛi o paale leŋ choo, nduyɛ ma keŋnaŋ nyɛdiaa vellaa velle.
20 Mi Mɔdikai poonyiaa sɔɔŋ muŋ, mbo yɔŋ yaula laŋ o Chuuwa lo, a wa o tandala Masaa Ahasilɔɔ wa masaleŋ choo laŋ niŋ kpou. A wa kpɛɛluŋ nda a Chuuwaa wa landaŋ nda.
21 Mbo dimul nda le ma biilu paale 14 a paale 15 iwɔsi o iwɔsi o paŋgii Ada ve niŋ.
22 Kanifuule, o palɛi keŋ choo Chuuwa sɔla baŋaŋndo yaamɔɔwaa ndaa o ba ni. Nduyɛ o paŋgii keŋ niŋ kɔl tambɛi ndaa simnuŋ nyaaloo ni, mi chaŋnda ndalaŋ la simnuŋ paale kɔl kɛndɛ leŋ. Ndaa nɔ ma siiŋguu palɛi keŋ palɛi kɔl kɛndɛi a palɛi bɔŋaŋ diaa nyɛdiaa bɛndoo. Nduyɛ mi ndaa keŋnaŋ nyɛdiaa vellaa velle, mi ndaa ke vɛlɛ wanaa bala fonduaa nyɔɔŋ.
23 Mi Chuuwa hiau lachi a dunyɛi nda kandu keŋ nde biiloo vɛlɛ a nyɛ Mɔdikai poonyial nda wo tosaa.
24 Kanifuule, mi Hemaŋ po Hamɛdata wo, Akakaitiinɔɔ, yaamɔɔnɔ Chuuwa kpou ndoo kɛɛsiaa le Chuuwa basɔɔ tɛɛ. Mbo wuu kooŋ le nda kɔltaŋ laasiaa, nduyɛ mbo tɛɛmbuu nda.
25 Kɛ mɛɛ Ɛsita hiŋ naa masaa chua, mi masaa dimi ma poonyiaa aa: “Tuu wɔɔŋ ndoo nɔ le Chuuwa wo, o miiŋgu ndupila o lebol.” Okoŋ, ma landu ndu a puaa nduaa o yɔmnde choo.
26 Le sabu koŋ nda veelu palɛi hei ni aa Puluim,* koŋ cho ni kooŋ. Le mɛɛ Mɔdikai yɔŋgu nda nɛi chɔmaa o yaulaŋ niŋ, nduyɛ ma cha nyɛ yɔŋnuŋ nda a suɛi hei okɔɔ wo yɛ,
27 mi Chuuwa cha maa nda ni, chuauwaa ndaa ni, a wana o wana tol nda kɔɔli, kalaŋ ndaa i wa ni le palɛi ŋiiŋnde hei biiloo iwɔsi o iwɔsi a teleŋ wa o hɛliaa wo, nduyɛ ma tosa nyɛ o nyɛ wa o poonyiaŋ o yaulaŋ niŋ a nda okɔɔ.
28 Nda a chuauwaa ndaa mamaa ndaa nɔ mi ndaa loonuŋ a palɛi hei o yuŋgu kɛ kɛ niŋ, tanda kɛ kɛ, nduyɛ a o chiee bɛndu kɛ kɛ niŋ. Palɛi Puluim nde hei ndii nɔ mi ndii hiou lachi a Chuuwa waa tɛɛŋ, nduyɛ mi wanaa fula o pulale ndaleŋ choo wa kpou ndaa hiou lachi a loonɔŋndo a ndi okɔɔ.
29 Okoŋ mi Ɛsita lanɔɔ masaa, chua Abihee wo, a Mɔdikai Chuunɔɔ soliŋ kpaaya ndaa kpeku ma poonyiaa yauwo, le nyɛ dimiŋ o yau diiŋ ndɔɔ niŋ a Puluim okɔɔ wo kindilaa.
30 Ma yɔŋ yaulaŋ ndaŋ o Chuuwa lo kpou, o tandala 127 Masaa Ahasilɔɔ wa choo laŋ niŋ. Diomnda kɔl nyulu laŋ a diomnda tonyalaŋ nda poonyiaa o yaulaŋ ndaŋ niŋ ni.
31 A tosa hei le chɔmndo maa a cho wa palɛi Puluim nde hei biyɔɔ a teleŋ kpeekpei nda nɔ le ndi biyɔɔ wo, a mɛɛ Mɔdikai Chuunɔɔ nda Ɛsita lanɔɔ masaa dimul nda le tosaa yɛ. Nduyɛ maa kalaŋ ndaa i wa ni le mi nda a chuauwaa ndaa biilu palɛi hei, ma bii sumndo, okoŋ ma nyɔɔlu Mɛlɛka o piɛileŋ niŋ.
32 Nduyɛ mi nyɛ Ɛsita dimi wo chɛlaŋ a sɔɔŋ wa a Puluim okɔɔ woŋ. Okoŋ, ma poonyiaa muŋ o yauwo niŋ.
Tɛɛsiaalaŋ
^ Tofa Tɛɛsiaa B15.
^ Ɔɔ “Susa.”
^ Ɔɔ “Susa.”
^ Ɔɔ “Susa.”
^ Ɔɔ “Susa.”
^ Ɔɔ “Susa.”
^ Ɔɔ “Susa.”
^ Ɔɔ “Susa.”
^ Puluim chɛlaŋ a dunyaŋ Chuuwa ndaa biilu o paŋgii 12 o yau ŋpaŋgu maChuuwa niŋndo. Tofa tɛɛsiaa B15.
