Ɛsodɔɔ 11:1-10
11 Okoŋ mi Chɛhowa dimul Muuse aa: “O lo kpundɔɔ o pilɛ o ya cho Felo a Ichipi tusi choo wo. Okoŋ kɔɔli, o cho nya malɔɔ mi la kuɛ. Nduyɛ te o mal nya pɛ, o cho nya touwɔɔ.
2 Lelaŋ, dimul waŋ piaanduaa a waŋ laanduaa Isɔluɛiya ma nyuna wanaa nda chiɛɛliaŋ nda, le ma ke nda nyɛm nda toosiaa a kaniŋ humboŋ vɛlɛ a kooliiyoŋ ndoŋ.”
3 Mi Chɛhowa tosa mi waŋnda Ichipi cha Isɔluɛiya wanaa sɔvɛ. Le handɔɔ lechoo, mi Muuse simnuŋ wana tɔɔ bɛndoo o lɛŋnde Ichipi leŋ buɛiyaa Felo wa tɛɛŋ a waŋnda Ichipi.
4 Okoŋ mi Muuse dimi aa: “Nyɛ Chɛhowa dimi wo cho hoo ni, ‘A ditɛɛŋndo, I cho lakɔ balɔɔ o lɛŋnde Ichipi leŋ niŋ,
5 mi dii po tase kɛ kɛ cho loŋ, chɔŋ a po tase Felo wo, o cho ichali o kpeŋgbei ndɔ lemasaa choo wo, kɔ bii a po tase buɛi laandu cho wallo a pou nda chuii nyɔɔŋ a laba wo, vɛlɛ a chɔlu piaandu tase kɛ kɛ o chɔluaa ndaa tɛɛŋ.
6 Waŋnda wa niŋ chaŋndaŋ choo choo kpeleŋ o lɛŋnde Ichipi leŋ niŋ kpou. Kani bɛɛ chaŋnda waa lende la yɔŋnuŋ ndɔ le, nduyɛ fɛɛŋ bɛɛ la yɔŋnuŋ ndɛ niŋ te.
7 Kɛ tuŋndo bɛɛ busul niŋ puaa Isɔluɛiya ɔɔ chuauwaa ndaa le. Nduyɛ hei cho tosa mi la sina maa ya Chɛhowa, I nɔla mi chɔm teŋgeŋndo Ichipiaŋnda a Isɔluɛiya tɛɛŋ.’
8 Buɛiyaa numnda kpou cho hunɔɔ naa ya chua ma beŋ ya wulaŋ, ma dimi aa, ‘Num a wanaa cho num kɔɔli wa kpou la kɔ.’ Okoŋ mi kuɛŋnuŋ.” Mɛɛ Muuse chii diomndaŋ ndaŋ dimi, mbo faŋaŋ Felo o hɔl a tumbe kala kalaa.
9 Okoŋ kɔɔli, mi Chɛhowa dimul Muuse aa: “Felo cho num lani yaŋɔɔ le, le halikpeŋ mi chɔɔlu kaamaala nilaŋ tosa tau tau o lɛŋnde Ichipi leŋ niŋ.”
10 Mi Muuse nda Elɔŋ tosa kaamaalaŋ ndaŋ kpou Felo o hɔl. Kɛ mi Chɛhowa chɛl mi Felo hiau lachi a bolle kalaleŋ tosaa, o mel Isɔluɛiya ma fula o lɛŋnde ndɔleŋ niŋ te.
