Ɛsodɔɔ 12:1-51
12 Mi Chɛhowa dimul vɛlɛ Muuse nda Elɔŋ o lɛŋnde Ichipi leŋ niŋ aa:
2 “Paŋgei hei cho wa paŋgii tasei o paŋgoŋ tɛɛŋ le nya ni. Ndi cho wa paŋgii tasei o wɔsioo niŋ le nya ni.
3 Dimul Isɔluɛiya kpou aa, ‘O paŋgei hei niŋ malɔ tɔ, yuŋgu kɛ kɛ nɔ mbo chua saa o pilɛ. Chiɛi o chiɛi nɔ mbo chua saa o pilɛ.
4 Kɛ te yuŋgoo ve o bɔɔ le saa o pilɛ le, a piɔuwaŋ ndu tɛɛŋ nda yuŋgu nda chiɛɛliaŋ ndo a mɛɛ waŋnda cho o yuŋgoo niŋ yɛ. Te la wa pɛ ndu piɔuwo, la nɔ mi la sina mɛɛ kpɛ waŋnda cho o yuŋgoo niŋ le ndu dioo yɛ.
5 Saa piaandu chii niŋ wɔsioo o pilɛ wo nya nɔ ni mi la chua, nduyɛ o nɔ mbo nɔ sɔŋ o sɔŋ te. Kɛ te la nɔ saa fɔŋndɔ le, la hɛli chuiŋ fɔŋndɔɔ.
6 La nɔ mi la manda ndu haaa malɔ 14 o paŋgei hei niŋ, okoŋ mi yuŋgu kɛ kɛ o Isɔluɛiya tɛɛŋ dii ndu a paale delaaleŋ.
7 A nɔ ma chua koowaŋ ma tiŋ, ma sui maŋ o keedoŋ vellaa velle o chiɛila nda cho wa ndu dioo laŋ.
8 “‘Ichɔl koŋ nda nɔ ni ma de visiŋ muŋ. A nɔ ma tuɛi ndu, ma de ndu latulu a beedii nɔ yiisii leniŋ te wo* vɛlɛ a pei lolɛiye.
9 A nɔ ma de ndu o kiyɛiyo ɔɔ o yawaa le. Kɛ a nɔ ma tuɛi ndu latulu a bolle ndɔleŋ, peluŋ ndɔŋ, vɛlɛ a nyɛ o nyɛ cho ndu niŋ mi wana de.
10 La kɛsi ndu mbo lɔl kuya le. Kɛ te o yɔŋ pɛ mbo lɔl kuya, la lom ndu idiiyo.
11 Te la wa ndu pɛ dioo, la nɔ mi la yiinuŋ yauve o chaŋ, mi kɔwɛilaŋ* la wa nya o ŋpelu, nduyɛ mi tindalaŋ la wa nya o laba. La nɔ mi la de ndu chɔ chɔ. Bɔŋaŋ Hiouwɔɔ Choo Chɛhowa Wo o cho ni.
12 I cho balɔɔ chuɛllɛŋ o lɛŋnde Ichipi leŋ niŋ, mi diu puaa ndaa tasiaa, vɛlɛ a chɔluaa piaanduaa tasiaa o chɔluaa ndaa tɛɛŋ. I cho mɛlɛkaa ndaa o Ichipi niŋ kpou nyɛpalaa tusi choo. Ya cho Chɛhowa ni.
13 Koowaŋ ma cho wa tamasioo o chiɛila nyalaŋ ni. Okoŋ te I che maŋ pɛ, I hiou nya choo. Hei cho tosa teleŋ ya cho wa waŋnda kpundɔɔ tusioo choo o lɛŋnde Ichipi leŋ niŋndo, nyɛ o nyɛ yɔŋnuŋ niŋ nya le.
14 “‘Paaleŋ ndeŋ le cho wa paale loonaŋ ndeŋ le nya. Nduyɛ nya a chuauwaa nyaa mamaa kpou, la nɔ mi la wa bɔŋaŋndo biyɔɔ lechoo le Chɛhowa. Sawaa o cho le nya ni le fɛɛŋ a fɛɛŋ. La nɔ mi la wa bɔŋaŋndo hoo biyɔɔ.
15 La nɔ mi la wa beedii nɔ yiisii leniŋ te wo dioo le palɛi i ŋɔmmɛu. Lelaŋ, la nɔ mi la soli kpeyaŋ nda linda a yiisiiyo wo o chiɛila nyalaŋ niŋ o paale taseleŋ choo. Kanifuule, chɔŋ a paale taseleŋ haaa paale ŋɔmmɛu leŋ, wana o wana de pɛ nyɛ nda toosiaa a yiisiiyo wo, a nɔ ma dii ndu.
16 La nɔ mi la bii bɔŋaŋ bɛndoo o paale taseleŋ choo a o paale ŋɔmmɛu leŋ choo. La nɔ mi la tosa wali kɛ kɛ o palɛi hei choo le. Nyɛdiaa waŋndo nɔ le dioo wo kinɛi o nɔ ni mbo toosiaa.
17 “‘La nɔ mi la wa Bɔŋaŋ Beedii Nɔ Yiisii Leniŋ te Wo biyɔɔ. Kanifuule, o paaleŋ ndeŋ choo ya cho Isɔluɛiyaa faŋga bɛnduaa soli o lɛŋnde Ichipi leŋ niŋ ni. Nya ni, chuauwaa nyaa mamaa ni, la nɔ mi la wa bɔŋaŋndo hoo biyɔɔ. Sawaa o cho le nya le fɛɛŋ a fɛɛŋ ni.
18 La nɔ mi la wa beedii nɔ yiisii leniŋ te wo dioo, chɔŋ o paŋgii tasei niŋ malɔ 14 a paale delaaleŋ, haaa malɔ 21 o paŋgii keŋ niŋ a paale delaaleŋ.
19 Le palɛi i ŋɔmmɛu, kpeyaŋ kɛ kɛ nda linda a yiisiiyo nɔ mbo wa o chiɛila nyalaŋ niŋ te. Kanifuule, wana o wana de pɛ nyɛ nda toosiaa a yiisiiyo wo, o wa miallo ɔɔ pilachioo, a nɔ ma dii ndu.
20 Nyɛ o nyɛ nɔ pɛ yiisiiyo leniŋ, la nɔ mi la de ndu le. O chiɛila nyalaŋ niŋ kpou, beedii nɔ yiisii leniŋ te wo nya nɔ ni mi la de.’”
21 Mi Muuse veelu waŋ banaa Isɔluɛiya chɔ chɔ, mbo dimul nda aa: “Wana o wana kɔ bii chɔlu fɔŋndɔɔ* le yuŋgu ndɔɔ, okoŋ ma dii ndu le sala Hiouwɔɔ Choo Wo solioo.
22 Okoŋ mi la chua pei yɔm hisɔpi ve kpɔŋndo, mi la yiŋ o kooma cho o hɛŋgɛiyo niŋ ndaŋ, mi la sui maŋ o keedei dioo a o kpeŋgoŋ vellaa velle. Nduyɛ haaa mi paaleŋ le sɛ, wana o wana nɔ mbo fula o bɛɛ le.
23 O hei niŋ, te Chɛhowa wa pɛ hiouwɔɔ le waŋnda Ichipi kpundɔɔ tusioo choo, mbo che koowaŋ o keedei dioo a o kpeŋgoŋ vellaa velle, Chɛhowa cho hiouwɔɔ chiɛila laŋ choo. Nduyɛ o chɛl niŋ mi kpundɛ piɔm koŋ luɛi o chiɛila nyalaŋ niŋ te.
24 “La nɔ mi la wa bɔŋaŋndo hoo biyɔɔ. Sawaa i cho le nya a chuauwaa nyaa ni le fɛɛŋ a fɛɛŋ.
25 Nduyɛ, te la kuɛ pɛ o lɛŋnde Chɛhowa dimi le nya kioo leŋ niŋ, la nɔ mi la wa bɔŋaŋndo hoo biyɔɔ a mɛɛ o dimi yɛ.
26 Te chuauwaa nyaa nyuna nya pɛ aa, ‘Le yɛɛnɛ nya bii yɛ bɔŋaŋndo hoo?’
27 la mulul nda aa, ‘Sala Hiouwɔɔ Choo Wo le Chɛhowa cho hoo ni. Teleŋ o tusi waŋnda Ichipi kpundɔɔ choo wo, mbo hiau chiɛila naalaŋ choo, o yɔŋ naa nyɛ o nyɛ le.’”
Okoŋ mi waŋnda baŋ wulaŋ ma fuuluu hɔlla lɛŋ.
28 Nduyɛ mi Isɔluɛiya kɔ tosa mɛɛ Chɛhowa dimul Muuse nda Elɔŋ yɛ. Ma tosa lende kinɛi.
29 A ditɛɛŋndo, mi Chɛhowa diu diu puaa tasiaa kpou o lɛŋnde Ichipi leŋ niŋ, chɔŋ a po tase Felo wo, o wa ichali o kpeŋgbei* ndɔ lemasaa choo wo, kɔ bii a po tase chua laandu nda bii mbo wa o chiɛi manyumndo niŋndo. Nduyɛ, mbo diu vɛlɛ chɔluaa tasiaa kpou.
30 Ichɔl koŋ, mi Felo, buɛiyaa nduaa, a Ichipiaŋaa tuaa kpou tiandu, nduyɛ waŋnda wa chaŋndaŋ choo choo kpeleŋ o lɛŋnde Ichipi leŋ niŋ. Kanifuule, chiɛi o chiɛi ve mi waŋndo kɛɛ wu le.
31 O lepilɛ niŋ kpe, mi Felo veelu Muuse nda Elɔŋ ichɔl koŋ, mbo dimul nda aa: “Num nya Isɔluɛiyaa tuaa kpou, la fula wanaa niaa tɛɛŋ. La kɔ piɛi Chɛhowa a mɛɛ ŋ dimi yɛ.
32 La chua saa nyaa, chuiŋaa nyaa, a nauwaa nyaa mi la kuɛ a mɛɛ ŋ dimi yɛ. Kɛ, la nyɔɔlu Mɛlɛka le mbo dɔu ya sala.”
33 Okoŋ, mi Ichipiaŋnda kandu Isɔluɛiya tooloo le ma fula chɔ chɔ o lɛŋnde ndaleŋ niŋ. Kanifuule, a wa dimioo aa, “Te ŋ keleŋa nda soli le, naa kpou ŋ cho wu!”
34 Okoŋ, mi Isɔluɛiya chua kpeyaŋ lindaa nda wou yiisii leniŋ te wo a hɛŋgɛila nda linda ndu laŋ, ma simbu simbuu o nyɛla ndalaŋ niŋ, ma handuŋ o la choŋgu.
35 Mi Isɔluɛiya tosa mɛɛ Muuse ndoo dimul nda yɛ. Ma nyuna Ichipiaŋnda le ma ke nda nyɛm nda toosiaa a kaniŋ humboŋ vɛlɛ a kooliiyoŋ ndoŋ, a nyɛla chuɛɛnaŋ ndaŋ.
36 Mi Chɛhowa tosa mi Ichipiaŋnda cha Isɔluɛiya wanaa sɔvɛ, nduyɛ ma ke nda nyɛm nda nyuna nda le muŋ ndoŋ. Mi Isɔluɛiya chua nyɛm sulaŋ o Ichipi niŋ ma kuaŋnuŋ a muŋ.
37 Okoŋ, mi Isɔluɛiya mal Luamɛsi ma kua Sukɔti. O fulawɔ o chuaambuaa kɔɔli, puaa kuɛ wa, a wa le 600,000.
38 Mɛɛ nda wa kɔlaŋ, mi wanaa cheleŋ faŋga bɛndoo* tual nda kɔɔli. Nduyɛ ma kua vɛlɛ a saa, chuiŋnda, a nauwa tau tau.
39 Okoŋ, ma kandu beedii tiu tiu nɔ yiisii le niŋ te wo toosiaa a kpeyaŋ lindaa nda chɛŋ Ichipi wo. Nduyɛ, le mɛɛ Ichipiaŋnda wa nda tooloo le ma keleŋa malɔɔ yɛ, a nɔla lɛ ma toosiaa nyɛdiaa o nyɛdiaa cheleŋ le ndapila le, mɛɛ kpeyaŋ ndaa linda koŋ ndo.
40 Wɔsilaŋ 430 Isɔluɛiya chii o lɛŋnde Ichipi leŋ niŋ ni.
41 Paale wanaa Chɛhowa wa chiŋa wɔsilaŋ 430 leŋ, o paale leŋ choo kpeekpei nda kpou fula o lɛŋnde Ichipi leŋ niŋ ni.
42 Ichɔl koŋ ndaa nɔ ni ma bii bɔŋaŋndo le mɛɛ Chɛhowa soli nda o lɛŋnde Ichipi leŋ niŋ yɛ. Nduyɛ, Isɔluɛiya kpou ndaa nɔ ma wa bɔŋaŋndo hoo biyɔɔ a nyumma maŋ le fɛɛŋ a fɛɛŋ, le Chɛhowa saŋgalaa.
43 Okoŋ mi Chɛhowa dimul Muuse nda Elɔŋ aa: “Sawala cho a Bɔŋaŋ Hiouwɔɔ Choo Wo okɔɔ laŋ la cho laŋ ni: Mial kɛ kɛ nɔ mbo de ndu le.
44 Kɛ te o yɔŋ pɛ mi waŋndo nɔ buɛi piaandu o pendu a kaniei* yo, o nɔ mbo hivi ndu o chiɛi kɔɔli. Keŋ kinɛi cho tosa ni mi buɛi koŋ bɛɛ de nyɛdiaa koŋ.
45 Mialaa cho nya tɛɛŋ nda, a wanaa nya chua le wallo wa nɔ ma de ndu le.
46 Chiɛiniŋ nya nɔ ni mi la de nyɛdiaa hoo. La nɔ mi la soli visii kɛ kɛ o bɛɛ le, nduyɛ la nɔ mi la pɛl paa kɛ kɛ le.
47 Isɔluɛiya kpou nɔ ni ma bii bɔŋaŋndo hoo.
48 Te miallo wa nya pɛ tɛɛŋ, nduyɛ mbo yeema le Bɔŋaŋ Hiouwɔɔ Choo Wo biyɔɔ le Chɛhowa, wana pɔnɔ kɛ kɛ o ndu lo chiɛiniŋ nɔ mbo sɔla hivi chiɛi kɔɔlioo. Okoŋ kɔɔli, o tiuba mbo sɔɔŋguu le bɔŋaŋndo hoo biyɔɔ, nduyɛ mbo simnuŋ maa pilachiee o lɛŋndeŋ niŋ. Kɛ wana pɔnɔ kɛ kɛ sɔla hivi chiɛi kɔɔli le, o nɔ mbo de nyɛdiaa hoo le.
49 Sawa pilɔɔ kpe cho wa le pilachieeya vɛlɛ a mialaa cho wa nya tɛɛŋ nda ni.”
50 Okoŋ, mi Isɔluɛiya kpou tosa mɛɛ Chɛhowa dimul Muuse nda Elɔŋ yɛ. Ma tosa lende kinɛi.
51 O paaleŋ ndeŋ choo kpeekpei Chɛhowa soli Isɔluɛiya kpou* o lɛŋnde Ichipi leŋ niŋ ni.
Tɛɛsiaalaŋ
^ Ɔɔ “bulu nɔ lɛvɛŋ te wo.”
^ Ɔɔ “samtalaŋ.”
^ Koŋ cho ni, saa ɔɔ chuiŋndo.
^ Ɔɔ “kpɛŋɛ.”
^ Koŋ cho ni, wanaa ve ŋChuu le wa latulu a Ichipiaŋnda.
^ Ɔɔ “woliei.”
^ Hibuluiye, “puaa Isɔluɛiya latulu a puaa ndaa chɔuwa.”
