Ɛsodɔɔ 13:1-22
13 Mi Chɛhowa dimul vɛlɛ Muuse aa:
2 “Hɛli* puaa tasiaa* o Isɔluɛiya tɛɛŋ, ma wa a yɔŋgaŋ o ya lo. Po tase ni, chɔlu piaandu tase ni, ya nɔ nda ni.”
3 Okoŋ mi Muuse dimul Isɔluɛiya aa: “La loonuŋ a paaleŋ ndeŋ, kanifuule la wa o chɛleŋ niŋ o lɛŋnde Ichipi leŋ ndeŋ niŋ, mi Chɛhowa soli nya nanuŋ a ba ndɔ kpaaya bɛndoo. Lelaŋ, nyɛ o nyɛ nɔ yiisiiyo* leniŋ, la dia ndu le.
4 O paaleŋ ndeŋ choo nya cho fulaa Ichipi ni, o paŋgii Abibi ve* niŋ.
5 Te Chɛhowa huŋ kɔ pɛ a nya o lɛŋnde Kenanaitiiya, Hitaitiiya, Amɔluaitiiya, a o lɛŋnde Chɛbusaitiiya niŋ, lɛŋnde o chuel finyaa nyaa mamaa buŋgɛi le nya kioo leŋ, lɛŋnde milikiiyaŋ* a liaaŋ ma cho taaliaa leniŋ ndeŋ, la nɔ mi la bii bɔŋaŋ teŋgeŋndo o paŋgei hei niŋ.
6 Le palɛi i ŋɔmmɛu, la nɔ mi la wa beedii* nɔ yiisii leniŋ te wo dioo. Nduyɛ o paale ŋɔmmɛu leŋ choo, la nɔ mi la bii bɔŋaŋndo le Chɛhowa saŋgalaa.
7 Beedii nɔ yiisii leniŋ te wo nya cho wa dioo ni le palɛi i ŋɔmmɛu. Nduyɛ, nyɛ o nyɛ nɔ yiisiiyo leniŋ, vɛlɛ a kpeyaŋ kɛ kɛ nda linda a yiisiiyo, o nɔ mbo wa o tanda nya cho niŋndo le.
8 Nduyɛ o paale leŋ choo, la nɔ mi la dimul puaa nyaa aa, ‘Le loonɔŋndo a mɛɛ Chɛhowa piŋi naa, mbo soli naa o lɛŋnde Ichipi leŋ niŋ yɛ naŋ cho hei tosaa ni.’
9 Mɛɛ nya yiinuŋ nuaa nyɔɔ o laba a o ŋtendu le tamasioo chɔmndo yɛ, lende bɔŋaŋndo hoo cho wa ni. O cho nya loonɔŋ le mi la wa suɛi a sawala Chɛhowa laŋ okɔɔ. O cho nya vɛlɛ loonɔŋ maa Chɛhowa soli nya o lɛŋnde Ichipi leŋ niŋ a ba ndɔ kpaaya bɛndoo ni.
10 Lelaŋ iwɔsi o iwɔsi, la nɔ mi la bii bɔŋaŋndo hoo a teleŋ o nɔ le biinɔŋndo wo.
11 “Te Chɛhowa kuɛ pɛ a nya o lɛŋnde Kenanaitiiya niŋ, lɛŋnde o chuel nya a finyaa nyaa mamaa buŋgɛi le nya kioo leŋ,
12 la nɔ mi la hɛli po tase kɛ kɛ nya velu pɛ,* vɛlɛ a chɔlu piaandu tase kɛ kɛ chɔluaa nyaa kom pɛ, mi la ke Chɛhowa. Kanifuule, Chɛhowa nɔ a piaanduaa ni.
13 Kɛ chuale tasele sofɛlɔɔ cho komɔɔ leŋ, la nɔ mi la baŋa leŋ a saa. Te la baŋa leŋ te, mɛɛ la yom leŋ kɛsei. Nduyɛ, la nɔ mi la baŋa po tase kɛ kɛ o chuauwaa nyaa tɛɛŋ.
14 “Te o yɔŋ pɛ mi po numndo huŋ nyuna num o chilaŋ niŋ aa, ‘Le yɛɛnɛ ŋ cho yɛ hei tosaa?’ a nɔ ma mulul ndu aa, ‘Le mɛɛ Chɛhowa soli naa o chɛleŋ niŋ Ichipi a ba ndɔ kpaaya bɛndoo yɛ.
15 Mɛɛ Felo tosa bolle kalaleŋ mbo kɛɛ le naa malɔɔ, mi Chɛhowa diu puaa tasiaa kpou o lɛŋnde Ichipi leŋ niŋ, chɔŋ a puaa tasiaa waŋnda chieeya, kɔ bii a chɔluaa piaanduaa tasiaa o chɔluaa tɛɛŋ. Le saboo hoo ya cho chɔluaa niaa piaanduaa tasiaa* kpou salaa solioo o Chɛhowa lo ni, nduyɛ mi baŋa po tase kɛ kɛ o chuauwaa niaa tɛɛŋ.’
16 Mɛɛ nya yiinuŋ nuaa nyɔɔ o laba a o ŋtendu le tamasioo chɔmndo yɛ, lende hei cho ni. Kanifuule, mi Chɛhowa soli naa o lɛŋnde Ichipi leŋ niŋ a ba ndɔ kpaaya bɛndoo.”
17 Mɛɛ Felo mal waŋnda le ma kuɛŋnuŋ, Mɛlɛka chɛl nda ma keeku o lɛŋnde Filitiaŋnda niŋ te, mi che bɛɛ nɛi biŋgioo wa koŋ ni. Kanifuule, mi Mɛlɛka dimi aa: “Naapum te a chiŋalaŋ nda pɛ a chɔuwo, a cho yiyaŋnda ndalaŋ siŋga, okoŋ ma miiŋguŋ Ichipi.”
18 Le hei, mi Mɛlɛka tosa ma keeku a nɛi kuɛ o pollo niŋ o Pee Siaŋa Mɛŋma Ihɛllo ikɛiyo. Mɛɛ Isɔluɛiya mal Ichipi, a wa a bɛɛndiaŋnda nyɛkɛndɛi maa puaa chɔuwa.
19 Mɛɛ nda wa kɔlaŋ, mi Muuse kua a paala Choosɛ laŋ o ba, kanifuule tuupa mi Choosɛ wu, mbo tosa mi Isɔluɛi puaa nduaa mɛnaŋ o ndu lo. Mbo dimul nda aa: “Mɛlɛka cho nya hɔlla mulul. Lelaŋ te I vi pɛ, la faŋa paala nilaŋ nanuŋ, mi la kuɛ a laŋ.”
20 Okoŋ ma faŋaŋ Sukɔti, ma kɔ kila dɔɔŋgɔɔ Ɛtami o pollo daŋgala.
21 Chɛhowa wa nda kɔlaŋ lachi o yumbu yumbu ikpuŋgbaa niŋ le nda nɛiyo chɔmndo ipala, a o yumbu yumbu leyiŋndo niŋ le nda nɛiyo chɔmndo ichɔl, le halikpeŋ ma wa kɔlaŋ ipala a ichɔl.
22 Lepaa o lepaa, yumbu yumbu ikpuŋgbaa ndoo feŋaŋ nda lachi ipala le. Nduyɛ ichɔl o ichɔl, yumbu yumbu leyiŋndo ndoo feŋaŋ nda lachi le.
Tɛɛsiaalaŋ
^ Hibuluiye, “dindi.”
^ Hibuluiye, “po tase kɛ kɛ fula o demboo niŋ.”
^ Ɔɔ “lɛvɛŋndo.”
^ Tofa Tɛɛsiaa B15.
^ Ɔɔ “nɔnɔɔ.”
^ Ɔɔ “bulu.”
^ Hibuluiye, “po tase kɛ kɛ fula o demboo niŋ.”
^ Hibuluiye, “chɔlu piaandu tase kɛ kɛ fula o demboo niŋ.”
