Ɛsodɔɔ 15:1-27
15 A teleŋ koŋ, mi Muuse nda Isɔluɛiya kpou soli chondei hei o Chɛhowa lo:
“I solul lɔ Chɛhowa chondei, kanifuule o yem chɔuwo.
O miisuu soo a wana kua lechoo wo o pee mɛŋma ihɛllo niŋ.
2 Chɛhowa cho yoomuma niaŋ a kpaaya nuu ni, kanifuule ndu cho wana ni piŋiaa ni.
Mɛlɛka nuu cho hoo ni, Mɛlɛka finya nuu. I cho ndu saŋgala, nduyɛ mi tosa mbo fula tɔɔ
3 Kuubanɔ kpaaya bɛndoo Chɛhowa cho ni. Diola ndɔlaŋ la cho Chɛhowa ni.
4 Mbo tusi puaa chɔuwaa Felo wa, a nyɛm ndɔŋ nyaanaŋ suaa naŋndoŋ o pee mɛŋma ihɛllo niŋ.Nduyɛ, mbo miisuu kuubaa nduaa kpaayaa bɛnduaa o Pee Siaŋa Mɛŋma Ihɛllo niŋ.
5 Mi mɛŋma kpaaya bɛnduaŋ ma kumbu nda kpu, nduyɛ ma tual o mɛŋndaŋ bɛŋgu di maa pou.
6 Oo Chɛhowa, ba num kɛndɔɔ cho bɔɔ ba kpaaya bɛndu.Oo Chɛhowa, ba num kɛndɔɔ nɔla mbo yem yaamɔɔnɔ numndo.
7 Ma yem wanaa simul numnda a kpaaya num bɛndoo.Nduyɛ te a dɔɔnuŋ pɛ tumbe, ŋɔɔ nda ŋua ni maa bil.
8 Mi hueiyii fula num o lamiliŋ nde tosa mi mɛŋndaŋ ma diinuŋ naapilɛ.Mi ma sim yi maa lakpaki.Mi mɛŋma kpaaya bɛnduaŋ ma sim yi o pee mɛŋma ihɛllo kɔllo.
9 Mi yaamɔɔnɔɔ dimi aa: ‘I cho nda tisa kɔɔli mi bii nda!
I cho nyɛm ndaŋ piɔu piɔu mi hini kɔl mɛɛ!
I cho muɛi nii faŋnde nanɔɔ yau, mi tɛɛmbuu nda!’
10 Mɛɛ ŋ yoomu fuu, mi pee mɛŋma ihɛllo kumbu nda kpu.Ma tual o mɛŋma kpaaya bɛnduaŋ bɛŋgu di maa chiliŋii lusulɛi.
11 Oo Chɛhowa, mɛlɛka kuɛɛ cho yɛ maa num?
Num Mɛlɛka hiou diondɔɔ kpou wo, o nɛɛnɛ cho yɛ maa num?
Num waŋnda nɔ ma nɔ siooŋii numnde, nduyɛ ma saŋgala num o chondoŋ niŋndo. Num tosa sɔɔŋ kɔndɔfilloŋ ni.
12 Mɛɛ ŋ siɛndi ba num kɛndɔɔ, mi lɛŋndeŋ le mial nda.
13 A kaala lo lechoo numndo, ma sim wanaa num aa ŋ piŋi wa lachi, le kɔlaŋ a nda.A kpaaya num bɛndoo, a cho lakɔ a nda o fondaŋ num diandaa.
14 Waŋnda cho tueiyɔɔ a sɔɔŋ muŋ okɔɔ, ma nyiiya kpa kpa a siooŋnde.Nyɛ nɛiyaa* cho waŋnda Filitiaa tolɔɔ choo.
15 A teleŋ koŋ, siooŋii bɛnduei cho masaa* o Idɔm niŋ biyɔɔ,Nduyɛ masaa kpaayaa bɛnduaa o Mowaabi niŋ cho nyiiya kpa kpa a siooŋnde.
Waŋnda o Kenaŋ niŋ kpou, kɔltaŋ la cho nda yɔŋnɔŋ pulaŋ pulaŋ.
16 Siooŋii bɛndu bɛnduei cho nda tolɔɔ choo.
Ba num kpaaya bɛndoo cho tosa ma wa maa pou, a kpeŋaŋ te.Oo Chɛhowa, a cho lo lende haaa mi wanaa numnda hiou,Haaa mi wanaa num aa ŋ toosiaa wa kei nda ikɛi ma hiounuŋ.
17 Oo Chɛhowa, a cho lakɔ a nda o pembii numnde choo ma tɔl nda loŋ,Fonda numpila bɛɛndiaa le ma wa loŋ ndo,Oo Chɛhowa, a cho lakɔ a nda o chiɛi ŋ toosiaa a bala numndaŋ ndo.
18 Chɛhowa cho wa masaa le fɛɛŋ a fɛɛŋ.
19 Mɛɛ suaa Felo wa, nyɛm ndɔŋ nyaanaŋ suaa naŋndoŋ, a puaa nduaa chɔuwa tol o pee mɛŋma ihɛllo niŋ,Mi Chɛhowa tosa mi mɛŋndaŋ o pee mɛŋma ihɛllo niŋ ma miiŋgu nda choo,Kɛ mi Isɔluɛiya keeku o lɛŋnde vesɛileŋ choo, o pee mɛŋma ihɛllo tɛɛŋ.”
20 Okoŋ mi Meeliam, wana lanɔ ndoo suaa le Mɛlɛka wo, yemaa Elɔŋ, chua dundu pɔmbɔɔ o ba. Nduyɛ, mi waŋ laanduaa kpou tual ndu kɔɔli a dundulaŋ lɔɔ ma ya.
21 Meeliam wa chondii puaa wa solioo ve chuaa lebɛŋgu aa:
“Solul Chɛhowa chondei, kanifuule o yem chɔuwo.
O miisuu soo a wana kua lechoo wo o Pee Siaŋa Mɛŋma Ihɛllo niŋ.”
22 Okoŋ kɔɔli, mi Muuse faŋaŋ a Isɔluɛiya o Pee Siaŋa Mɛŋma Ihɛllo, ma kua o pollo niŋ Suɔɔ. Nduyɛ, le palɛi i yaa a wa kɔlaŋ o pollo niŋ, kɛ a chi mamɛŋ te.
23 Okoŋ kɔɔli, ma kua Malua.* Kɛ ndaa tiuba ma kol mɛŋma wa loŋ ndaŋ te, kanifuule ma wa ma lolɛi. Lelaŋ o ke fondaŋ koŋ diolaŋ ni aa, Malua.
24 Le hei, mi waŋnda kandu ŋɔɔchiaŋndo a Muuse. Ma nyuna ndu aa: “Kuɛɛnɛ naŋ cho yɛ mɛŋndaŋ sɔla miŋ kol?”
25 Mi Muuse chaŋ o Chɛhowa lo le malaa. Nduyɛ, mi Chɛhowa chɔm ndu yɔm pɔmbɔɔ o pum. Mɛɛ o mal ndu o mɛŋndaŋ niŋ, mi mɛŋndaŋ ma yeela.
Loŋ o ke nda sawalaŋ ni, mbo chɔm nda nyɛ nda nɔ ma tosa wo. Nduyɛ loŋ koni o dɔu nda o tofaa bɛŋgu ni.
26 Mbo dimul nda aa: “Te o yɔŋ pɛ mi la yaŋ ya Chɛhowa Mɛlɛka nyaa nilaŋ, mi la tosa nyɛ cho o kɛndɔɔ wo ya o hɔl, nduyɛ mi la bii sawala nilaŋ kpou, naala wɔɔŋnda ya tusi waŋnda Ichipi choo laŋ, o pilɛ bɛɛ I tusi nya choo le. Kanifuule ya Chɛhowa, ya cho nya siŋgioo ni.”
27 Okoŋ kɔɔli, ma kua Ilɛm. Nduyɛ, peela pɔmbɔlaŋ la wa loŋ 12 a wauwaŋ 70. Ma kila dɔɔŋgɔɔ o mɛŋndaŋ ikɛi loŋ.