Ɛsɔdɔɔ 16:1-36
16 Mɛɛ Isɔluɛiya faŋaŋ Ilɛm, ma lo kɔlaŋ haaa ma fuuluu yɔɔfɛɛ o pollo niŋ Siŋ. Mi nda kpou fuuluu loŋ o paŋgii diiŋ nduɛi niŋ malɔ 15, chɔŋ a teleŋ nda mal o lɛŋnde Ichipi leŋ niŋndo. Siŋ yɛ, Ilɛm nda Sanai tɛɛŋ o cho ni.
2 Okoŋ, mi Isɔluɛiya kpou kandu ŋɔɔchiaŋndo a Muuse nda Elɔŋ o pollo niŋ.
3 Ma wa nda dimullo aa: “Baa le miŋ chuu a yiaaŋ ŋ hiŋ a naa o pollo hoo niŋ ni? Ndoo bɛnda bɔɔ mi Chɛhowa pila ndoo dii naa o lɛŋnde Ichipi leŋ niŋ. Loŋ ndu, kpɛɛnɛŋ naŋ wa ŋ piaa cha a visioŋ, nduyɛ mi naŋ de nyɛdiaa* miŋ pim cha.”
4 Okoŋ, mi Chɛhowa dimul Muuse aa: “I cho tosa mi nyɛdiaa wa fulaa o choo choo niŋ lepaa o lepaa le nya, mbo chuchuŋ o lɛŋndeŋ choo. Okoŋ mi wana o wana kɔ chɔuviaa mɛɛ o tiuba mbo de o paaleŋ niŋ yɛ. O hei niŋ, I cho nda handɔɔ o tofaa bɛŋgu, le sinaa te a bii niŋ pɛ sawala nilaŋ ɔɔ a bii niŋ te.
5 Kɛ te la wa pɛ nyɛdiaa hoo chɔuviaa o paale ŋɔmpum ndeŋ choo, la chɔuviaa ndu le palɛi i ŋiiŋ mi la toosiaa.”
6 Mi Muuse nda Elɔŋ dimul Isɔluɛiya kpou aa: “Chuɛllɛŋ, la cho sina kɛsɛ maa Chɛhowa soli nya o lɛŋnde Ichipi leŋ niŋ ni.
7 Siɔdii idii, la cho paŋgele Chɛhowa wo chɔ, kanifuule Chɛhowa tuei ŋɔɔchiaŋnda nya cho a ndu okɔɔ laŋ. Kɛ le naa ndu, wanaa maavɛɛ naŋ cho yɛ le mi la ŋɔɔchiaŋ a naa?”
8 Mi Muuse hiau lachi a suɛi aa: “Te Chɛhowa ke nya pɛ visioŋ chuɛllɛŋ a nyɛdiaa siɔdii idii mi la de mi la pim cha, la cho chɔ maa ndu Chɛhowa tuei ŋɔɔchiaŋnda nya cho a ndu okɔɔ laŋ. Wanaa maavɛɛ naŋ cho yɛ mi la ŋɔɔchiaŋ a naa? O cho a naa le nya cho ŋɔɔchiaŋndo le, kɛ a Chɛhowa.”
9 Okoŋ mi Muuse dimul Elɔŋ aa: “Dimul Isɔluɛi kpou aa, ‘La sɔɔŋguu Chɛhowa ikɛi, kanifuule o tuei ŋɔɔchiaŋnda nya cho a ndu okɔɔ laŋ.’”
10 Dimioo nuaa mi Elɔŋ chii suɛi o Isɔluɛiya lo kpou, ma muli hɔlla ba pollo. O lepilɛ niŋ kpe, ma cha paŋgele Chɛhowa wo o yumbu yumboo niŋ.
11 Mi Chɛhowa dimul vɛlɛ Muuse aa:
12 “I tuei ŋɔɔchiaŋnda Isɔluɛiya cho laŋ. Dimul nda aa, ‘A paale delaa leŋ, la cho visioŋ dio. Nduyɛ idiiyo, mi la de nyɛdiaa mi la pim cha. O hei niŋ, la cho sina kɛsɛ maa ya cho Chɛhowa Mɛlɛka nyaa ni.’”
13 Ichɔl koŋ, mi wɔlla huŋ tiu o dɔɔŋgɔɔ niŋ silɔ. Nduyɛ idiiyo, mɔmndo wa o tiuwaa dɔɔŋgɔɔ balɔɔ silɔ.
14 Mɛɛ mɔmndo kiolu, ma saaluŋ nyɛ kɛndɛ kɛndɛ nɛi yomi yomi le wo lɛŋ o pollo niŋ. Nduyɛ, o wa o liimiaa maa mɛŋma ikpuŋgba.
15 Mɛɛ Isɔluɛiya che ndu, ma kandu nyuuniaŋndo aa: “Yɛɛnɛ cho yɛ hoo?” Kanifuule ndaa sina nyɛ wa koŋ ndo le. Mi Muuse dimul nda aa: “Nyɛdiaa Chɛhowa ke nya le dioo wo cho koŋ ni.
16 Nyɛ Chɛhowa dimi wo cho hoo ni, ‘Wana o wana chɔuviaa ndu tuule o nɔla mbo de leŋ. La nɔ mi la chɔuviaa ndu mɛɛ waŋnda cho o tɛndiila nyalaŋ niŋ yɛ. Wana o wana ɔmɛiyo cha.’”*
17 Mi Isɔluɛiya kandu ndu chɔuviaa. Mi apum chɔuviaa ndu tau, kɛ mi apum chɔuviaa nyɛɛmbɔ.
18 Mɛɛ nda tuu o nda chɔuviaa wo o ɔmɛiyo niŋ, ma cha maa wanaa chɔuviaa tau wa nyɛ o nyɛ henduŋ lechoo le. Nduyɛ wanaa chɔuviaa nyɛɛmbɔ wa, nyɛ o nyɛ feŋaŋ lechoo le. Mi wana o wana chɔuviaa tuule o nɔla mbo de leŋ.
19 Okoŋ mi Muuse dimul nda aa: “Wana o wana nɔ mbo lɔli ndu kuya le.”
20 Kɛ a yeŋ Muuse lani le. Mɛɛ apum lɔli ndu kuya, mi chaa luɛi leniŋ, nduyɛ mbo chuŋ. Le hei, mi Muuse duaunuŋ tumbe o kala kala a nda.
21 Idii o idii, mi ndaa chɔuviaa ndu tuule ndaa nɔla ma de leŋ. Kɛ te paaleŋ lee kendu pɛ, o teŋgaŋ.
22 O paale ŋɔmpum ndeŋ choo, mi ndaa chɔuviaa ndu le palɛi i ŋiiŋ. Wana o wana ɔmɛilaŋ la tiɔɔŋ. Okoŋ, mi yuŋgula leboltaŋ o Isɔluɛiya tɛɛŋ kpou kɔ dimul Muuse a ndi okɔɔ.
23 Kɛ mi Muuse dimul nda aa: “Chɛhowa dimi lende ni. Kanifuule, paale pɛŋgiaaleŋ le cho siɔdii ni. Nduyɛ paaleŋ ndeŋ le cho paale diandaa Chɛhowa o hɔl. Lelaŋ, o nya nɔ pɛ le beedii toosiaa, la toosiaa. Nduyɛ o nya nɔ pɛ le yau, la yau, okoŋ mi la kɛsi o tɔ cho lo wo haaa siɔdii idii.”
24 Ma kɛsi ndu haaa diimandɔɔ, a mɛɛ Muuse dimi yɛ. Nduyɛ o chuŋ te, kɛlɛŋgaa niŋ te mi chaa luɛi.
25 Okoŋ mi Muuse dimul nda aa: “La dio ndu hau. Kanifuule, paale pɛŋgiaale cho le yɔŋgaŋ o Chɛhowa lo leŋ le cho hau ni. La nuuviaa bɛɛ nyɛdiaa hoo hau, la seeluŋ ndu niŋ te.
26 La cho ndu wa chɔuviaa le palɛi i ŋɔmpum. Kɛ o paale ŋɔmmɛu leŋ choo, la cho ndu chɔ le, kanifuule paale pɛŋgiaaleŋ le cho ni.”
27 Kɛ a koŋ kpou, mi waŋnda apum kua ndu nuuviaa o paale ŋɔmmɛu leŋ choo, kɛ a seeluŋ nyɛ o nyɛ le.
28 Okoŋ mi Chɛhowa dimul Muuse aa: “Le vɛɛ kpɛ nya cho yɛ hiouwɔɔ lachi a kiɔɔ sawala nilaŋ biyɔɔ?
29 La kɛsiŋ o kɔl maa Chɛhowa ke nya paale pɛŋgiaaleŋ ni. Lelaŋ o dimul nya ni, le mi la chua nyɛdiaa le palɛi i ŋiiŋ o paale ŋɔmpum ndeŋ choo. O paale ŋɔmmɛu leŋ choo, wana o wana nɔ mbo wa o ndu lo. Wana o wana nɔ mbo faŋaŋ o fondaŋ ndɔɔ le.”
30 Okoŋ, mi Isɔluɛiya pɛŋgi o paale ŋɔmmɛu leŋ choo.
31 Mi Isɔluɛiya ke nyɛdiaa hoo diolaŋ aa “manɛiyo.”* O wa o humbu maa kulu tɔlɔɔ koliyaŋnda wo, nduyɛ yeela ndɔɔ wa ko maa kato fɛɛdɛɛ nda toosiaa a liaaŋ ndo.
32 Okoŋ, mi Muuse dimul Isɔluɛiya aa: “Nyɛ Chɛhowa dimi wo cho hoo ni, ‘La chua manɛiyo ɔmɛiyo cha mi la kɛsi ndu kɔdɔ, le mi la huŋ chɔm chuauwaa nyaa a chuauwaa nyaa mamaa nyɛdiaa ya ke nya le dioo o pollo niŋ, teleŋ ya soli nya o lɛŋnde Ichipi leŋ niŋndo.’”
33 Okoŋ, mi Muuse dimul Elɔŋ aa: “Chua boŋjei, ma tuu manɛiyo ɔmɛiyo cha, ma wou leniŋ. Okoŋ ma kɔ kɛsi Chɛhowa lachi, le mbo wa loŋ maa nyɛ loonaŋ le chuauwaa nyaa a chuauwaa nyaa mamaa.”
34 Mi Elɔŋ tosa mɛɛ Chɛhowa dimul Muuse yɛ. Mbo kɔ kɛsi ndi kɔdɔ kɔfu kpemaa lachi.
35 Le wɔsilaŋ 40 Isɔluɛiya wa manɛiyo dioo. A lo ndu dioo haaa ma fuuluu o lɛŋnde waŋnda wa ichali leniŋ ndeŋ. Nduyɛ haaa ma fuuluu o pɛŋgula lɛŋnde Kenaŋ ndeŋ, ndu ndaa dia ni.
36 Nduyɛ ɔmɛilaŋ tɔ la chua ɛfaa* o pilɛ.
Tɛɛsiaalaŋ
^ Hibuluiye, “beediiyo ɔɔ buloo.”
^ Tofa Tɛɛsiaa B14.
^ Naapum o hibuluiye niŋ o sim, “Yɛɛnɛ Cho yɛ Hoo?”
^ Tofa Tɛɛsiaa B14.