Ɛsodɔɔ 19:1-25
19 Mɛɛ Isɔluɛiya fula o lɛŋnde Ichipi leŋ niŋ o paŋgii yaa nduɛi niŋ, o paale pilɛle leŋ choo kpe, ma kua o pollo niŋ Sanai.
2 Mɛɛ nda faŋaŋ Luɛfidim, ma kua o pollo niŋ Sanai, okoŋ ma kila dɔɔŋgɔɔ loŋ. Mi Isɔluɛiya kila dɔɔŋgɔɔ loŋ Pembii Sanai Ve lachi.
3 Okoŋ, mi Muuse hel pembei naa Mɛlɛka tonyaa chua. Mi Chɛhowa dimul ndu o pembii keŋ choo aa: “Nyɛ ŋ nɔ ma dimul Isɔluɛiya wo cho hoo ni,
4 ‘Mi nyapila cha pɛɛŋ nyɛ ya tosal waŋnda Ichipi le nya wo. Mi chua nya mɛɛ kowɔɔ chua nuaa chuauwaa nduaa yɛ, mi huŋ a nya o ya lo.
5 Lelaŋ, te la diikuŋ ya pɛ o nyɛ o nyɛ niŋ, nduyɛ mi la kɛsi kpema nuu, la cho simnɔŋ nyɛm kɛŋ niŋ teŋgeŋndoŋ waŋnda tɛɛŋ kpou. Kanifuule lɛŋndeŋ kpou, le ya le cho ni.
6 La cho simnɔŋ kaale diandaa leŋ, a wanaa soliaa lasalaa cho wa masaa wa le ya.’* Diomndaŋ ndaŋ ŋ nɔ ni ma dimul Isɔluɛiya.”
7 Okoŋ, mi Muuse kɔ chuuŋgiaa waŋ banaa waŋnda tɛɛŋ, mbo dimul nda nyɛ o nyɛ Chɛhowa dimul ndu.
8 Okoŋ kɔɔli, mi waŋnda kpou dimi diompilɛ aa: “Nyɛ o nyɛ Chɛhowa dimi, ŋ chɛl le ndu tosaa.” O lepilɛ niŋ kpe, mi Muuse kua le mbo kɔ doonuŋ Chɛhowa kona a nyɛ waŋnda dimi wo okɔɔ.
9 Mi Chɛhowa dimul Muuse aa: “I cho hunɔɔ naa num chua o yumbu yumbu piimiɛiyo niŋ, mi soo o num ndo le halikpeŋ mi waŋnda tuei. Nduyɛ, keŋ cho tosa ma dɔu laalaŋndo o num niŋ le teleŋ o teleŋ.” Okoŋ, mi Muuse doonuŋ Chɛhowa kona a nyɛ waŋnda dimi wo okɔɔ.
10 Mi Chɛhowa dimul Muuse aa: “Miiŋgu ma kɔ dimul waŋnda le ma dindiŋ hau a siɔdii. Nduyɛ a nɔ ma tɔɔ nyɛla ndalaŋ.
11 A nɔ ma wa a bɛɛndiaŋnda o paale yaa ndɔ leŋ choo. Kanifuule o paale yaa ndɔ leŋ choo, Chɛhowa cho tolɔɔ o Pembii Sanai Ve choo waŋnda kpou o hɔl.
12 Handu kpeleŋndo o pembei balɔɔ chɛ chɛ le waŋnda, nduyɛ ma dimul nda aa, ‘Wana o wana nɔ mbo hiou kpeleŋndo, ɔɔ mbo hel o pembei choo le. Wana o wana pilaŋ pembei pɛ, o nɔ mbo sɔla piɔmndo.
13 Wana o wana nɔ mbo hol wana koŋ baa le. Kɛ a nɔ ma vii vii ndu a poutaŋ, ɔɔ ma vɛ ndu a chiŋɔleŋ.* O wa chɔlu ɔɔ wana chiee, o nɔ mbo sɔla piɔmndo.’ Kɛ te a tuei pɛ buloo* diom, a nɔla ma hel o pembei choo.”
14 Okoŋ mi Muuse tual pembei, mbo kɔ dimul waŋnda le ma dindiŋ, nduyɛ ma tɔɔ nyɛla ndalaŋ.
15 Mbo dimul waŋnda aa: “La bɛɛndiaŋ le paale yaa ndɔ leŋ. Nduyɛ wana o wana nɔ mbo tosa suɛi wana lanɔ le.”*
16 O paale yaa ndɔ leŋ choo idiiyo, taŋndaŋ ma wa deŋioo, mi nyɔɔ wa kiolioo ŋualalɛi ŋualalɛi. Mi yumbu yumboo kumbu pembei kpu, nduyɛ mi buloo suaa choo choo kpeleŋ. Okoŋ mi wanaa wa o dɔɔŋgɔɔ niŋnda kpou kandu nyiiyaa kpa kpa a siooŋnde.
17 Mi Muuse soli waŋnda o dɔɔŋgɔɔ niŋ, mbo kua a nda Mɛlɛka tonyaa lachi, ma kɔ sim o pembei bɛŋgu.
18 Le mɛɛ Chɛhowa tol o Pembii Sanai Ve choo o yiŋndeŋ niŋ yɛ, mi kumnde kumbu ndi kpu. Kumnde wa helɔɔ tukpe tukpe maa kumii yiŋnde tondo. Nduyɛ, pembei kpou wa hiilɔŋndo woku woku.
19 Mɛɛ buloo wa diomndo helɔɔ fau, lende koni Muuse wa suɛi ni. Nduyɛ, mi Mɛlɛka tonyaa muli ndu diom.
20 Okoŋ, mi Chɛhowa tual o Pembii Sanai Ve bolleŋ. Mi Chɛhowa dimul Muuse le mbo hel o Pembei choo. Okoŋ mi Muuse hel.
21 Mi Chɛhowa dimul ndu aa: “Tol ma kɔ dimul waŋnda maa, a kindiŋ le ya Chɛhowa chɔɔ le, yɔŋii wanaa bɔɔbɔɔ sɔla piɔmndo.
22 Dimul wanaa soliaa lasalaa sɔɔŋguu ya Chɛhowa ikɛi teleŋ o teleŋ nda le ma dindi ndapila, yɔŋii ya Chɛhowa diu nda.”*
23 Okoŋ mi Muuse dimul Chɛhowa aa: “Waŋnda tiuba ma hel o Pembii Sanai Ve choo le, kanifuule numpila chii naa sila, ma dimul la aa, ‘Kɛsi kpeleŋndo o pembei balɔɔ chɛ chɛ, le chɔmndo maa pembii diandɛi i cho ni.’”
24 Mi Chɛhowa dimul ndu aa: “Tol pembei mi la kɔ huŋ nya Elɔŋ. Kɛ chɛl mi wanaa soliaa lasalaa a waŋnda hiou kpeleŋndo le ma hiŋ naa ya Chɛhowa chua le, yɔŋii ya diu nda.”
25 Okoŋ mi Muuse tual pembei, mbo kɔ doonuŋ waŋnda kona.
Tɛɛsiaalaŋ
^ Hibuluiye, “masale wanaa soliaa lasalaa.”
^ Ɔɔ naapum, “ma vɛ du a ballo.”
^ Hibuluiye, “lee saa.”
^ Hibuluiye, “Wana o wana nɔ mbo sɔɔŋguu wana lanɔɔ ikɛi le.”
^ Hibuluiye, “yimi yimi nda.”
