Ɛsodɔɔ 2:1-25
2 A teleŋ koŋ, mi po pilɛ fulaa o yuŋgu Livai yo choo chua wana lanɔ Livainɔɔ o nɔɔ niŋ.
2 Mi chuaa hoo chua folioo* mbo vialu poo. Mɛɛ o che mɛɛ poombɔɔ hoo ndoo naŋ yɛ, mbo viaŋ ndu le paŋgoŋ ŋgaa.
3 Mɛɛ o che maa o nɔla lɛ ndu vioŋɔɔ le, mbo chua kambɛiyo mbo yikpa ndu a kotɛiyo* nyɛkɛndɛi, mbo wou poombɔɔ leniŋ. Okoŋ, mbo kɔ kɛsi ndu o billo niŋ o Pioo Nail ikɛi.
4 Kɛ mi yema ndɔ sim tiŋ landaŋ le mbo che nyɛ cho ndu yɔŋnɔŋ ndo.
5 Mɛɛ chua Felo wo hiŋ pulɔŋndo o Pioo Nail, buɛiyaa nduaa laanduaa wa ndu kɔlaŋ kɔɔli o Pioo Nail daŋgala. Okoŋ, mbo cha kambɛiyo o billo tɛɛŋ. O lepilɛ niŋ kpe, mbo viam buɛi ndɔ laandoo le mbo kɔ chua ndu.
6 Mɛɛ o kumbi kambɛiyo, mbo cha poombɔɔ leniŋ, nduyɛ o wa chaŋndo. Mi nyiɛɛye bii ndu le ndu. Kɛ mbo dimi aa: “Hibuluinɔɔ velu poombɔɔ hoo ni.”
7 Mi yema ndɔ nyuna chua Felo wo aa: “I kɔ veelul num komsa Hibuluinɔɔ mbo mandal num ndu?”
8 Mi chua Felo wo mulul ndu aa: “Ei, kɔ!” O lepilɛ niŋ kpe, mi chuaambɔɔ mal mbo kɔ veelu kalaa poombɔɔ.
9 Okoŋ, mi chua Felo wo dimul kalaa poombɔɔ aa: “Kɔ a chɛlɛkpɔɔ hoo ma mandal la ndu, mi wa num paawaa.”* Okoŋ mi chuaa kua a chɛlɛkpɔɔ mbo kɔ manda ndu.
10 Mɛɛ poombɔɔ sul, mbo kua a ndu o chua Felo wo lo, mbo simnuŋ po ndɔ. Okoŋ, mi chua Felo wo ke ndu diolaŋ aa Muuse.* Mbo dimi aa: “Kanifuule o peelo ya saaluŋ ndu ni.”
11 Okoŋ kɔɔli, mɛɛ Muuse simnuŋ kaasoŋnɔ, mbo kua o puaapiliaa nduaa Hibuluiya lo le chɔɔ nyɛkindilaa nda wa bɛŋgu wo. Okoŋ mbo cha mi Ichipiaŋnɔɔ wa Hibuluinɔɔ lɔɔ.
12 Mɛɛ o mɛɛndaŋ o chi wana le, mbo dii Ichipiaŋnɔɔ mbo kumbu ndu o siooŋnde niŋ.
13 Kɛ mɛɛ o kuɛ vɛlɛ diimandɔɔ, mbo komal puaa Hibuluiya a ŋiɔɔŋ sɔŋgaa. Mbo dimul wana ndoo nɔ di le wo aa: “Le yɛɛnɛ ŋ cho yɛ chaaŋ num lɔɔ?”
14 Okoŋ mi poo nyuna ndu aa: “Nɛɛnɛ siiŋguu yɛ num masaa a wana kialaa ŋyamaa naa choo? Baa a yeema ma dii ya mɛɛ ŋ dii po Ichipiaŋnɔɔ yɛ?” Le hei, mi siooŋnde bii Muuse. Mbo dimiŋ o kɔl niŋ aa: “I che maa waŋnda sina a suɛi hei okɔɔ!”
15 Mi Felo tuɛi a ndi okɔɔ, nduyɛ mbo yeema le Muuse diyɔɔ. Kɛ mi Muuse nyaanuŋ, mbo kua o lɛŋnde Midiaŋ ndeŋ niŋ, mbo kɔ chal o sooŋ mamɛŋndo ikɛi.
16 Wana soliaa lasala pilɛ wa o Midiaŋ niŋ ndoo velu waŋ laanduaa a ŋɔmmɛu. Nduyɛ ma huŋ mɛŋndaŋ kɔndɔɔ le ma wou o nyɛ chɔluaa kol lo niŋ, le mi chɔluaa finya nda wa kol.
17 Kɛ mi wanaa mandaa lasaa pum huŋ tou nda mɛɛ nda tuau nda paandu yɛ. Le hei, mi Muuse chaŋ mbo piŋi waŋ laanduaa haa, nduyɛ mbo mala nda mɛŋndaŋ kɔndɔɔ mi chɔluaa ndaa kol.
18 Mɛɛ nda miiŋgu chiee naa Luyɛɛ* finya nda chua, mbo nyuna nda aa: “La vɛ hau keleŋaa hunɔɔ hoo?”
19 Ma mulul ndu aa: “Po Ichipiaŋnɔ pilɛ piŋi naa wanaa mandaa lasaa o ba ni. Nduyɛ pɛŋ, mbo kondul naa mɛŋndaŋ mi chɔluaa kol.”
20 Mbo nyuna chuauwaa nduaa aa: “Kuɛɛnɛ o cho yɛ? Vɛ la hiŋ nya ndaa le? La kɔ veelu ndu miŋ huŋ dioŋnuŋ nyɛdiaa latulu.”
21 Okoŋ kɔɔli, mi Muuse chɛl le mbo wa Luyɛɛ o bɛŋgu choo. Nduyɛ, mi Luyɛɛ ke Muuse Sipoolua chua ndɔ o nɔɔ niŋ.
22 Okoŋ mi Sipoolua vialu poo, mi Muuse ke ndu diolaŋ aa Kɛɛsiɔm.* Mbo dimi aa, “I simnuŋ miallo o lɛŋnde isumialteŋ niŋ.”
23 Wɔsila bɔɔbɔɔ* hiouwɔɔ okoŋ kɔɔli, mi masaa le Ichipi wu. Kɛ Isɔluɛiya wa hiouwɔɔ lachi a mɔnɛi biyɔɔ, nduyɛ ma wa chaŋndaŋ le chɛle nda wa niŋndeŋ. A wa hiouwɔɔ lachi a chaŋndaŋ kpeekpei le malaa, nduyɛ mi chaŋnda ndalaŋ la fuuluu o Mɛlɛka tonyaa lo.
24 Okoŋ, mi Mɛlɛka tuɛi chaŋnda imɔnɔla nda wa laŋ, nduyɛ mbo loonuŋ a kpema o yii a Ebilaham, Aase, vɛlɛ a Chekɔpu wo.
25 Mi Mɛlɛka cha nyɛpalaa Isɔluɛiya wa niŋndo, nduyɛ mi nyiɛɛye bii ndu le nda.
Tɛɛsiaalaŋ
^ Ɔɔ “yollo.”
^ Ɔɔ “kudulɔŋndo.”
^ Ɔɔ “salaa.”
^ Diolaŋ ndaŋ la sim, “Solioo.” Koŋ cho ni, wana nda chiindiaa o peelo wo.
^ Koŋ cho ni, Chɛtulo.
^ Diolaŋ ndaŋ la sim, “Miallo o Lɛŋnde Leŋ Niŋ.”
^ Hibuluiye, “palɛi bɔɔbɔɔ.”
