Ɛsodɔɔ 21:1-36
21 “Sawalaŋ ndaŋ ŋ nɔ ni ma chɔm nda:
2 “Te a pendu pɛ Hibuluinɔɔ le mbo wa chɛ numndo, o nɔ mbo tosal num wallo le wɔsilaŋ la ŋɔmpum. Kɛ o wɔsi ŋɔmmɛu wo niŋ, a nɔ ma mal ndu mbo kuɛŋnuŋ, o paawa* nyɛ o nyɛ le.
3 Te o yɔŋ pɛ maa ndupilɛ hiŋ ni, ndupilɛ cho la kɔ ni. Kɛ te nda laa ndɔ hiŋ ni, nda ndu cho lakɔ ni.
4 Te o yɔŋ pɛ mi masanɔ ndɔɔ ke ndu lanɔɔ, nduyɛ mbo vilul ndu chuauwa, lanɔ koŋ ni, chuauwaa nduaa ni, le masanɔ ndɔɔ nda cho wa ni, mi ndupila kuɛŋnuŋ.
5 Kɛ te chɛ koŋ kɛɛ pɛ le kɔlaŋ mbo dimi aa, ‘I kaala masanɔ nuu, laa nuu, vɛlɛ a chuauwaa niaa, lelaŋ I cho lakɔ le,’
6 masanɔ ndɔɔ nɔ mbo kuɛ a ndu Mɛlɛka tonyaa lachi. Okoŋ mbo sɔɔŋguu ndu o dioo ikɛi, mbo handu ndu nileŋ o dio, nduyɛ mbo buli ndu nileŋ a chiliŋii sɛɛmbiɛi. Okoŋ kɔɔli, mbo simnuŋ chɛ ndɔɔ haaa a yoomu ndɔɔ mɛɛlulaŋ.
7 “Te waŋndo pisi pɛ chua ndɔɔ le mbo wa chiɔɔ, masanɔ ndɔɔ nɔ mbo mal chua koŋ mbo kuɛŋnuŋ mɛɛ nda mal wana pɔnɔ chiɔɔ yɛ le.
8 Kɛ te masanɔ ndɔɔ yeema lɛ a ndu le, nduyɛ mbo kɛɛ le mbo simnuŋ laa ndɔ pɔmbɔ, okoŋ mbo yeema le ndu pisioo wana cheleŋ o ba,* o nɔ di mbo pisi ndu mialla o ba le, kanifuule o hui ndu.
9 Te o yeema pɛ mbo ke ndu po ndɔɔ le mbo wa laa ndɔ, o nɔ mbo bii ndu maa chua ndɔ vialaa.
10 Te o yɔŋ pɛ mbo* chua lanɔ cheleŋ le ndupila, o nɔ mbo wa lanɔ tasoo nyɛdiaa a nyɛ chuɛyaŋndo kioo. Nduyɛ, o nɔ mbo hiou lachi a yeemɛi nduɛi chiɛiniŋnde peeloo.
11 Te o yɔŋ pɛ maa o nɔla mbo tosal ndu sɔɔŋ yaa woŋ muŋ te, mɛɛ o nɔ mbo mal chua koŋ mbo kuɛŋnuŋ, o paawa nyɛ o nyɛ le.
12 “Wana o wana lɔɔ pɛ chaaŋ ndɔ wanachioo mbo dii ndu, ndu bɛɛ o nɔ mbo sɔla piɔmndo.
13 Kɛ te o ve a siɛlɛi fuu le o tosa ndi le, nduyɛ mi ya Mɛlɛka tonyaa chɛl mi i yɔŋnuŋ, I cho fondaŋndo hɛli le mbo nyaanuŋ loŋ.
14 Te o yɔŋ pɛ mi waŋndo tuulu kɔllo ŋama ŋama a chaaŋ ndɔ wanachioo, nduyɛ mbo dii ndu a hɔlaa vesɛi sɛɛŋ, o yɔŋ bɛɛ mi wana koŋ kɔ vioŋnuŋ o bandu ni luamaa lasalaa, o nɔ mbo sɔla piɔmndo.
15 Wana o wana lɔɔ pɛ finya ndɔ ɔɔ kala ndɔ, o nɔ mbo sɔla piɔmndo.
16 “Wana o wana bii pɛ chaaŋ ndɔ wanachioo mbo pisi ndu, ɔɔ mbo kɛsiŋ ndu o ba ma bii ndu, o nɔ mbo sɔla piɔmndo.
17 “Wana o wana yei* finya ndɔ ɔɔ kala ndɔ pɛ, o nɔ mbo sɔla piɔmndo.
18 “Te puaa a ŋiɔɔŋ sɛɛŋgiaŋ pɛ, mi wana pilɛ lɔɔ chaaŋ ndɔ a pouwo ɔɔ a bɔtaa kɛ mbo vi le, nduyɛ mbo wa ihini chiɛiniŋ, nyɛ nya nɔ mi la tosa wo cho hoo ni:
19 Te o yɔŋ pɛ mi wana koŋ chɛŋ, mbo nɔla balɔɔ o bɛɛ a tindaa, mɛɛ a nɔ ma tusi wana lɔɔ ndu wo nyɛpalaa choo le. Nduyɛ, haaa mi wana nda yɔŋul lo seŋgu kpɛlɛkɛ, palɛi o cho chii o kue o wali ndɔɔ niŋ te ve kinɛi, wana yɔŋul ndu wo nɔ mbo paawa ndu le palɛi keŋ.
20 “Te o yɔŋ pɛ mi waŋndo lɔɔ buɛi ndɔ piaandoo ɔɔ buɛi ndɔ laandoo a yɔmndo mbo dii ndu, ndu bɛɛ a nɔ ma tusi ndu nyɛpalaa choo.
21 Kɛ te o yɔŋ pɛ mbo chii paaleŋ le pilɛ ɔɔ palɛi i ŋiiŋ mbo vi le, a nɔ ma tusi ndu nyɛpalaa choo le, kanifuule a kanii* nduɛi o pendu ndu ni.
22 “Te puaa lo pɛ sɔŋgaa mi wana pilɛ kundu wana folioo,* nduyɛ mbo vialu a boondii o nɔ mbo velu le ve,* kɛ mi kalaa ɔɔ chualeŋ le vi le,* nyɛ o nyɛ pɔnɔɔ chuaa kelu pɛ, wana kundu ndu wo nɔ mbo paawa nyɛ koŋ o wanaa kialaa ŋyamaa lo.
23 Kɛ te wana pilɛ vi pɛ, la nɔ mi la yɔŋgu yoomoo le yoomoo,
24 hɔlteŋ le hɔlteŋ, chiŋnde le chiŋnde, baa le baa, pelei le pelei.
25 Nduyɛ te o lom pɛ chaaŋ ndɔ, ɔɔ mbo yɔŋul ndu, ɔɔ mbo lɔɔ ndu a bɔtaa, ndu bɛɛ la tosal ndu nyɛ pilɛ koŋ kpe.
26 “Te o yɔŋ pɛ mi waŋndo lɔɔ buɛi ndɔ piaandoo ɔɔ buɛi ndɔ laandoo hɔlteŋ mi le tambu, o nɔ mbo mal ndu mbo kuɛŋnuŋ le sɔŋgɔ hɔlte ndɔleŋ.
27 Nduyɛ, te o bɛŋi pɛ buɛi ndɔ piaandoo ɔɔ buɛi ndɔ laandoo chiŋnde, o nɔ mbo mal ndu mbo kuɛŋnuŋ sɔŋgɔ chiŋii nduɛi.
28 “Te nauwo kundu pɛ waŋndo mbo vi, a nɔ ma vii vii nau koŋ a poutaŋ, ma dii ndu. Kɛ a nɔ ma de visiŋ ndɔŋ te, nduyɛ a nɔ ma tusi wana nɔ nau koŋ ndo nyɛpalaa choo le.
29 Kɛ te o yɔŋ pɛ mi nauwo luɛi seesiɛi mbo kandu kuindioo, nduyɛ ma dimul wana nyɔɔ a ndi okɔɔ kɛ mbo bee ndu le, okoŋ mbo kɔ kundu waŋndo mbo dii ndu, a nɔ ma vii vii nau koŋ a poutaŋ, nduyɛ wana nɔ ndu wo bɛɛ ma dii ndu.
30 Te a kilul pɛ wana nɔ nauwo wo nyɛ le mbo yɔŋgu le yoomu ndɔɔ baŋaa, nyɛ o nyɛ nda kilul ndu pɛ, o nɔ mbo yɔŋgu.
31 O yɔŋ bɛɛ aa poombɔɔ ɔɔ chuaambɔɔ nauwo kundu ni, nyɛ pilɛ koŋ kpe nda nɔ ni ma tosal wana nɔ nauwo wo, a mɛɛ sawaa hoo dimi yɛ.
32 Te o yɔŋ pɛ aa buɛi piaandoo ɔɔ buɛi laandoo nauwo kundu ni, wana nɔ nauwo wo nɔ mbo ke buɛi koŋ masanɔ ndɔɔ siɛkɛlloŋ 30,* nduyɛ ma vii vii nauwo a poutaŋ, ma dii ndu.
33 “Te waŋndo tou pɛ sooŋndo mbo mal ndu o kumbiaa lende, okoŋ mi nauwo ɔɔ sofɛlɔɔ del leniŋ,
34 wana tou sooŋ koŋ ndo nɔ mbo paawa le chɔlu vi koŋ ndo. O nɔ mbo ke wana chɔloo kaniei le chɔlu ndɔɔ, nduyɛ mi chɔlu vilɛiyo lo le ndu.
35 Te nau waŋndo yɔŋul pɛ nau chaaŋ ndɔ wo mbo vi, a nɔ ma pisi nau cho yoomu wo ma piɔuwaŋ kanii keŋ, nduyɛ ma piɔuwaŋ vɛlɛ nau vilɛi koŋ.
36 Kɛ te o yɔŋ pɛ maa seesiɛi nauwo luɛi ni mbo kandu kuindioo, kɛ mi wana nauwo bee ndu le, o nɔ mbo yɔŋgu nauwo sɔŋgɔ nau vi wo, mi ndu chua nau vilɛiyo.
Tɛɛsiaalaŋ
^ Ɔɔ “sala.”
^ Hibuluiye, “le mi wana cheleŋ baŋa ndu.”
^ O wa le masanɔ ndɔɔ ɔɔ po masanɔ ndɔɔ.
^ Ɔɔ “mɛna.”
^ Ɔɔ “wolii.”
^ Ɔɔ “yollo.”
^ Hibuluiye, “mi chuauwaa nduaa fula ndu o dembe.”
^ Ɔɔ “yɔŋuluŋ tau tau le.”
^ Tofa Tɛɛsiaa B14.
