Ɛsodɔɔ 24:1-18
24 Okoŋ, mi Chɛhowa dimul Muuse aa: “Num, Elɔŋ, Nadabi, Abaihu, a waŋ banaa 70 o Isɔluɛi niŋ, la hel o pembei choo naa ya chua, mi la baŋ wulaŋ tiŋ landaŋ.
2 Num Muuse kinɛi nɔ ni ma sɔɔŋguu ya Chɛhowa ikɛi. Kɛ a tuaa nɔ ma sɔɔŋguu le, nduyɛ Isɔluɛiyaa tuaa bɛɛ nɔ ma hel o pembei choo le.”
3 Mi Muuse kɔ dimul waŋnda nyɛ o nyɛ Chɛhowa dimul ndu vɛlɛ a sawala o ke ndu laŋ kpou. Okoŋ, mi waŋnda kpou dimi diompilɛ aa: “Nyɛ o nyɛ Chɛhowa dimi, ŋ chɛl le ndu tosaa.”
4 Nduyɛ nyɛ o nyɛ Chɛhowa dimi, mi Muuse poonyiaa kpou. Mbo chaŋ idiiyo puŋ, mbo taŋgul bandu luamaa lasalaa o pembei bɛŋgu a suŋgbuaŋ 12. Nduyɛ, suŋgbuaŋ maŋ maa sim le kaala 12 ndaŋ o Isɔluɛi niŋ ni.
5 Okoŋ kɔɔli, mi Muuse viam chuaa piaanduaa Isɔluɛiya ma kɔ soli salala luamaa laŋ, nduyɛ ma soli nauwaa towaa salala kɔl nyulu laŋ o Chɛhowa lo.
6 Mi Muuse chua kooma maŋ tɛndaa tɛɛŋ mbo wou o hɛŋgɛilaŋ niŋ, nduyɛ mbo fasaŋiaa ma tuaŋ o bandu luamaa lasalaa choo.
7 Okoŋ mi Muuse chua yau kpemaa, mbo veelul nda diomndaŋ leniŋ choo choo kpeleŋ. Ma dimi aa: “Nyɛ o nyɛ Chɛhowa dimi, ŋ chɛl le ndu tosaa, nduyɛ ŋ cho ndu diikɔŋ.”
8 Okoŋ kɔɔli, mi Muuse chua koowaŋ mbo fasaŋiaa maŋ waŋnda choo, mbo dimul nda aa: “A mɛɛ nya tuei o diomndaŋ ndaŋ niŋ yɛ, koowaŋ maŋ ma chɔm ni maa kpema Chɛhowa yii a nya wo kanduŋ.”
9 Mi Muuse, Elɔŋ, Nadabi, Abaihu, a waŋ banaa 70 o Isɔluɛi niŋ kua o pembei choo,
10 ma kɔ chɔ Mɛlɛka Isɔluɛiya. Nyɔɔ wa ndu o tɛlɛkaa o peloŋ bɛŋgu maa pou safaluɛɛ wo. Nduyɛ, o wa o diandaa fo fo maa halaa o choo choo niŋ.
11 O yɔŋ laŋgbaa kalaa kaŋ o Isɔluɛi niŋ nyɛ o nyɛ le. Ma cha yilaŋii Mɛlɛka tonyaa, ma dia nyɛdiaa, nduyɛ ma kol.
12 Mi Chɛhowa dimul Muuse aa: “Huŋ naa ya chua o pembei choo, ma wa nanuŋ. I cho num pouta yɛndɛlaŋ ke. Nduyɛ, o laŋ choo ya cho sawalaŋ poonyiaa ni, le mi chɔm waŋnda nyɛ nda nɔ ma tosa wo.”
13 Mi Muuse nda Chɔɔsuaa buɛi ndɔ bɛɛndiaŋ le kɔlaŋ, okoŋ mi Muuse kua o pembei choo naa Mɛlɛka tonyaa chua.
14 Kɛ mbo dimul waŋ banaa aa: “La chum naa nanuŋ haaa miŋ miiŋgu. Elɔŋ nda Hɔɔ cho wa a nya latulu. Wana o wana nɔ isɔɔ pɛ, o kɔ o nda lo.”
15 Okoŋ, mi Muuse kua o pembei choo. A teleŋ koŋ, pembei wa i kumbaa kpu a yumbu yumboo.
16 Paŋgele Chɛhowa wo wa o Pembii Sanai Ve choo. Nduyɛ le palɛi i ŋɔmpum, pembei wa i kumbaa kpu a yumbu yumboo. O paale ŋɔmmɛu leŋ choo, mi Mɛlɛka veelu Muuse o yumbu yumboo niŋ.
17 Mi Isɔluɛiyaa wa tofaa wa cha paŋgele Chɛhowa wo o pembei choo, mɛɛ yiŋndeŋ le wa nuaa biyɔɔ wule wule yɛ.
18 Okoŋ, mi Muuse luɛi o yumbu yumboo niŋ, mbo kua o pembei choo. Nduyɛ mbo kɔ wa loŋ le palɛi 40 a nyumndaŋ 40.
